ISRO பாகுபலி-க்கு உதவும் எலான் மஸ்க்.. கொண்டு வாங்கடா அந்த ஜிசாட்-20..!!

இந்தியாவின் மிகப்பெரிய தகவல் தொடர்பு செயற்கைக்கோள் ஜிசாட்-20 செயற்கைக்கோள்-ஐ மத்திய அரசின் கட்டுப்பாட்டில் இயங்கும் இஸ்ரோ, எலான் மஸ்க்-ன் ஸ்பேஸ் எக்ஸ் மூலம் விண்ணில் செலுத்த உதவியை நாடியுள்ளது. இது இந்தியா மற்றும் அமெரிக்காவின் விண்வெளித்துறைகளுக்கு இடையிலான ஒரு முக்கியமான கூட்டு முயற்சியாகப் பார்க்கப்படுகிறது.

இஸ்ரோவும், எலான் மஸ்க்-ன் ஸ்பேஸ்எக்ஸ் நிறுவனமும் பல முக்கியமான முயற்சிகளை விண்வெளி துறையில் செய்து வருகிறது, இஸ்ரோவில் பல முயற்சிகளை எலான் மஸ்க் பாராட்டியுள்ளார். இந்த நிலையில் இஸ்ரோ அமைப்பு தவிர்க்க முடியாத காரணத்தால் எலான் மஸ்க்-ன் ஸ்பேஸ் எக்ஸ் நிறுவனத்தின் உதவியை நாடியுள்ளது.

4,700 கிலோ எடையுள்ள ஜிசாட்-20 செயற்கைக்கோள், இந்தியாவின் தற்போதைய ஹெவி-லிஃப்ட் ராக்கெட்டான எல்விஎம்-3 இன் திறனை விட அதிகமாக உள்ளது. இதனால், அதிக உந்து திறன் கொண்ட ராக்கெட் தேவைப்பட்டது. இந்த ஜிசாட்-20 செயற்கைக்கோள்-ஐ பாகுபலி எனவும் அழைக்கப்பட்டு வருகிறது.

இஸ்ரோவின் எல்விஎம்-3 ராக்கெட் 4 டன் அதாவது 4000 கிலோ எடை வரையில் விண்ணில் செலுத்தும் திறன் கொண்டது. எனவே ஜிசாட்-20 செயற்கைக்கோள் 4,700 கிலோ எடை கொண்டுள்ளதால் மாற்று லான்ச் வெஹிக்கல் தேவை.

இந்த நிலையில், ஸ்பேஸ் எக்ஸின் ஃபால்கன்-9 ராக்கெட்-ஐ பயன்படுத்த இஸ்ரோ முடிவு செய்துள்ளது. இந்த ராக்கெட் 8.3 டன் வரையில் பேலோடு கொண்டு செல்லும் திறன் உள்ளது. இந்தப் பெரிய செயற்கைக்கோளை ஜியோஸ்டேஷனரி டிரான்ஸ்பர் ஆர்பிட் (eostationary transfer orbit) எனப்படும் நிலையில் கொண்டு சேர்க்க ஃபால்கன்-9 ராக்கெட் திறன் போதுமானதாக இருக்கும்.

இஸ்ரோ பொதுவாக பெரிய செயற்கைக்கோள்களை ஏவ ஐரோப்பாவின் அரியன்ஸ்பேஸை (Arianespace) நம்பியிருந்தது. ஆனால் அரியானே-5 ராக்கெட் ஓய்வு பெற்றதாலும், அடுத்த தலைமுறை ராக்கெட்டான அரியானே-6 பயன்படுத்துவதற்கான வாய்ப்புகள் இல்லாத காரணத்தாலும் ஸ்பேஸ்எக்ஸ் உதவியை நாடியுள்ளது இஸ்ரோ. அரியானே-6 பயன்படுத்து கமர்சியல் ஸ்லாட் இல்லை என்பது தான் தற்போதைய பிரச்சனை.

இதேவேளையில் ரஷ்யா-வின் உக்ரைன் போர் காரணமாக சர்வதேச அரசியல் சூழலில் தற்போது ரஷ்யா உடன் இணைந்து விண்வெளி துறையில் பணியாற்றுவது சிறந்தாக இருக்காது என்பதால், ஸ்பேஸ் எக்ஸ் இஸ்ரோ-வின் விருப்பமாக மாறியுள்ளது.

14 ஆண்டுகள் ஆயுள் காலம் கொண்ட ஜிசாட்-20 செயற்கைக்கோள், 70 Gbit/s தரவு பரிமாற்ற திறன் கொண்ட சக்திவாய்ந்த கே-பேண்ட் உயர்-திறன் தகவல் தொடர்பு பேலோட் கொண்டுள்ளது. இந்த செயற்கைக்கோள் மூலம் இந்தியாவின் தகவல் தொடர்பு கட்டமைப்பை பெரிதும் மேம்படுத்தும்.

இஸ்ரோவின் இந்த ஜிசாட்-20 செயற்கைக்கோள் மூலம் இந்தியாவில் தொலைதூரப் பகுதிகளில் வேகமான இணைய இணைப்பை செயல்படுத்த முடியும். இந்த செயற்கைக்கோள் அரசின் ஸ்மார்ட் சிட்டி திட்டத்தையும், விமானங்களில் இணைய இணைப்பை கொண்டு வரவும் உதவும் என எதிர்பார்க்கப்படுகிறது.

ஜிசாட்-20 மூலம் எதிர்கொண்ட பிரச்சனையை சமாளிக்க, இஸ்ரோ தனது அடுத்த தலைமுறை ராக்கெட் ஆன என்ஜிஎல்வி (Next Generation Launch Vehicle)யை உருவாக்கி வருகிறது. தற்போதைய எல்விஎம்-3 இன் 4 டன் திறனை மூன்று மடங்கு அதிகரிக்கும் வகையில் இந்த சக்திவாய்ந்த ராக்கெட் வடிவமைக்கப்பட்டுள்ளது.

இந்த புதிய ராக்கெட் இஸ்ரோ-வின் பயன்பாட்டு லிஸ்ட்டில் சேர்ந்தால் Arianespace, ஸ்பேஸ்எக்ஸ் உதவியை நாட வேண்டிய அவசியம் இருக்காது. இஸ்ரோ சொந்தமாக அதிக எடை கொண்ட செயற்கைக்கோள்-ஐ விண்ணில் செலுத்த முடியும்.