83% போனஸ் அறிவித்தும் மகிழ்ச்சி இல்லை.. இன்ஃபோசிஸ் நிறுவனம் மீது ஊழியர்கள் அதிருப்தி.. என்ன காரணம்.?

இந்தியாவின் மிகப்பெரிய தகவல் தொழில்நுட்ப நிறுவனங்களில் ஒன்றான இன்ஃபோசிஸ், செப்டம்பர் மாதம் முடிவடைந்த காலாண்டுக்கான (ஜூலை முதல் செப்டம்பர்) போனஸ் தொகையை தனது ஊழியர்களுக்கு அதிகாரப்பூர்வமாக அறிவித்துள்ளது. இதன் மூலம் பல்வேறு வேலை நிலைகளில் (Job Levels) உள்ள ஊழியர்களுக்கு போனஸ் குறித்த விவரங்கள் அடங்கிய கடிதங்கள் வெள்ளிக்கிழமை அன்று அனுப்பப்பட்டுள்ளன. வெளியான அறிக்கைகளின்படி, இன்ஃபோசிஸ் நிறுவனம் சராசரியாக 75% போனஸ் வழங்கியுள்ளது. சில ஊழியர்களுக்கு, அவர்களின் செயல்பாட்டை பொறுத்து 83% வரையிலும் போனஸ் தொகை கிடைத்துள்ளது.

போனஸ் விகிதங்கள் : இன்ஃபோசிஸ் நிறுவனம் இந்த போனஸ் தொகையை ஊழியர்களின் செயல்திறனை அடிப்படையாக கொண்ட சிறந்த செயல்திறன் (Outstanding), பாராட்டத்தக்க செயல்திறன் (Commendable), மற்றும் எதிர்பார்ப்புகளைப் பூர்த்தி செய்தவர்கள் (Met Expectations) போன்ற பிரிவுகளின் அடிப்படையில் வழங்கியுள்ளது. உதாரணமாக, நிலை 4 (Level 4) பிரிவில், மிக சிறப்பாக செயல்பட்டவர்களுக்கு 83% போனஸும், சராசரி எதிர்பார்ப்புகளை பூர்த்தி செய்தவர்களுக்கு 75% போனஸும் வழங்கப்பட்டுள்ளது.

இருப்பினும், ஊழியர்கள் மத்தியில் சில அதிருப்திகளும் நிலவி வருவதாக கூறப்படுகிறது. ஏனென்றால், முந்தைய ஏப்ரல் - ஜூன் காலாண்டில் ஊழியர்களுக்கு சராசரியாக சுமார் 80% போனஸ் வழங்கப்பட்டது. ஆனால், இப்போது அந்த போனஸ் 75% ஆக குறைந்துள்ளது. இதனால், சில ஊழியர்கள் தங்களுக்கு முந்தைய காலாண்டைவிட 7% முதல் 8% வரை போனஸ் குறைவாக கிடைத்திருப்பதாக அதிருப்தியில் உள்ளனர். மொத்தத்தில், தகுதியுள்ள அனைத்து பிரிவுகளிலும் போனஸ் விகிதம் 70.5% முதல் 83% வரையில் உள்ளது.

யார் யாருக்கு போனஸ்..?:இன்ஃபோசிஸ் நிறுவனம், நிலை 4, 5 மற்றும் 6 ஆகிய பிரிவுகளில் உள்ள ஊழியர்களுக்கு இந்தக் காலாண்டு போனஸை வழங்கியுள்ளது. இந்தப் பிரிவுகளில் மென்பொருள் பொறியாளர்கள், டீம் லீடர்கள் மற்றும் மூத்த மேலாளர்கள் போன்றோர் உள்ளனர். இவர்கள் சுமார் 3.23 லட்சம் ஊழியர்களை கொண்ட இன்ஃபோசிஸ் நிறுவனத்தில் பெரும்பான்மையாக உள்ளனர்.

இந்த போனஸ் தொகை, ஊழியரின் வருடாந்திர மாறக்கூடிய ஊதியத்தின் ஒரு பகுதியாக கணக்கிடப்படுகிறது. உதாரணமாக, ஒரு ஊழியரின் ஆண்டுக்குரிய மாறக்கூடிய ஊதியம் ரூ.1 லட்சம் என்றால், ஒரு காலாண்டுக்கான அவரது பங்கு ரூ.25,000 ஆகும். இப்போது 75% போனஸ் வழங்கப்பட்டால், அவருக்கு அந்த காலாண்டுக்கு ரூ.18,750 கிடைக்கும். இந்த போனஸ் தொகை நவம்பர் மாதத்தில் ஊழியர்களின் சம்பள கணக்குகளில் சேர்க்கப்படும் என்றும், இது வழக்கமாக ஒவ்வொரு காலாண்டின் இரண்டாவது மாதத்தில் வழங்கப்படும் என்றும் இன்ஃபோசிஸ் நிறுவனம் சார்பில் தெரிவிக்கப்பட்டு உள்ளது.