உங்ககிட்ட EPFO கணக்கு இருக்கா..அப்போ மொதல்ல இத பண்ணுங்க..ரொம்ப முக்கியம்!

சென்னை: பணியாளர்கள் அனைவரும் தங்களுடைய எம்ப்ளாயீஸ் பிராவிடண்ட் பண்ட் அக்கவுண்ட்டை தங்களுடைய பிற ஆவணங்களான ஆதார் மற்றும் பான் கார்டு போன்றவற்றோடு இணைக்க வேண்டும் என்பது சட்டப்படி கட்டாயமாக்கப்பட்டுள்ளது.

ஊழியர்களின் வருங்கால வைப்பு நிதித் திட்டம், ஓய்வு பெற்ற பிறகு ஊழியர்களுக்கு நிதிப் பாதுகாப்பை வழங்குவதற்காக உருவாக்கப்பட்டது. இந்த திட்டத்திற்கு முதலாளிகள் மற்றும் ஊழியர்கள் இருவரும் சேர்ந்து பங்களிப்புகளை அளிக்கிறார்கள். வருங்கால வைப்பு நிதி EPFO அமைப்பால் நிர்வகிக்கப்படுகிறது. இந்தத் திட்டத்தில், பணியாளரின் சம்பளத்தில் ஒரு பகுதி அவர்களின் பிஎஃப் (PF) கணக்கில் செலுத்தப்படுகிறது. இந்தத் தொகையை பணியாளர் ஓய்வு பெறும்போது, ராஜினாமா செய்யும்போது அல்லது ஊழியர் இறந்தால் அவரது குடும்பத்தினரால் திரும்பப் பெற முடியும்.

இன்றைய இன்டர்நெட் உலகில் மோசடிகள் அதிகம் நடந்து கொண்டிருப்பதால் பாதுகாப்பை உறுதி செய்ய நோ யுவர் கஸ்டமர்(KYC)க்கான தேவை அதிகரித்துள்ளது. மேலும் கேஒய்சி வெரிஃபை செய்யப்பட்ட உறுப்பினர்களுக்கு என எம்பிளாயி பிராவிடண்ட் பண்ட் நிறுவனம் பிரத்தியேகமான நன்மைகளை வழங்குகிறது. ஆன்லைன் மூலம் EPFக்கான KYC சரிபார்ப்பு எப்படி செய்ய வேண்டும் என்பது குறித்து பார்ப்போம்.

EPFக்கான KYC சரிபார்ப்புக்கு தேவையான ஆவணங்கள்:

தேசிய மக்கள் தொகைப் பதிவேடு (NPR) அட்டை
ஆதார் அட்டை
நிரந்தர கணக்கு எண் (PAN) அட்டை
வங்கிக் கணக்கின் விவரங்கள்
பாஸ்போர்ட் எண்
ஓட்டுநர் உரிமம்
தேர்தல் அட்டை
ரேஷன் கார்டு

EPF அக்கௌன்ட்டில் ஆன்லைன் KYC பெறுவதற்கான ஸ்டெப்ஸ்:

Step 1: அதிகாரப்பூர்வ EPFO இணையதளத்திற்குச் செல்லவும்.
'Services' மெனுவை கிளிக் செய்து, கீழ்தோன்றும் மெனுவிலிருந்து 'For Employess' என்பதைத் தேர்ந்தெடுக்கவும்.

Step 2: உங்கள் UAN உறுப்பினர் போர்ட்டலில் உள்நுழையவும். 'Member UAN/Online Service (OCS/OTCP)’ என்பதைக் கிளிக் செய்யவும். யுனிவர்சல் கணக்கு எண் (UAN) மற்றும் password மூலம் லாகின் செய்யவும்.

Step 3: இணையதளத்திற்கு செல்லவும், 'Manage' மெனுவைக் கண்டுபிடித்து, 'KYC' என்பதைத் தேர்ந்தெடுக்கவும்.

Step 4: பான், ஆதார், பாஸ்போர்ட், வங்கிக் கணக்கு, ஓட்டுநர் உரிமம் போன்றவற்றை நீங்கள் புதுப்பிக்கக்கூடிய ஆவணங்களின் பட்டியலைக் காண்பீர்கள். நீங்கள் புதுப்பிக்க விரும்பும் ஆவண வகையைத் தேர்ந்தெடுத்து, தொடர்புடைய விவரங்களை உள்ளிடவும்.

முடிந்த பின்னர் 'Save' பட்டன்னை கிளிக் செய்வதன் மூலம் உள்ளிட்ட விவரங்களைச் சேமிக்கவும்.

Step 5: KYC விவரங்களுக்கு ஒப்புதல், புதுப்பிக்கப்பட்ட KYC விவரங்கள் உங்கள் கம்பெனியின் ஒப்புதலுக்காக அனுப்பப்படும். உங்களுக்கு வேலை வழங்குபவர் விவரங்களை அங்கீகரித்தவுடன், உங்கள் EPF கணக்கில் அவை 'Verified’ எனக் குறிக்கப்படும்.

Step 6: KYC நிலையை சரிபார்க்கவும், 'Manage' மெனுவுக்கு சென்று மீண்டும் 'KYC' என்பதைத் தேர்ந்தெடுப்பதன் மூலம் உங்கள் KYC புதுப்பிப்பின் ஸ்டேட்டஸை, நீங்கள் சரிபார்க்கலாம்.

நீங்கள் உள்ளிடும் விவரங்கள் உங்கள் ஆவணங்களில் உள்ள விவரங்களுடன் சரியாகப் பொருந்துவதை உறுதிசெய்யவும். உங்கள் ஆவணங்களைப் பதிவேற்றம் செய்ய வேண்டியிருந்தால் அவற்றின் ஸ்கேன் செய்யப்பட்ட நகல்களைத் தயாராக வைத்திருக்கவும். உங்கள் KYC புதுப்பிப்பு உங்கள் முதலாளியால் அங்கீகரிக்கப்பட்டுள்ளதா என்பதை உறுதிப்படுத்த, அதன் ஸ்டேட்டஸை தவறாமல் சரிபார்க்கவும். இந்தப் ஸ்டேப்களைப் பின்பற்றுவதன் மூலம், உங்கள் EPF, KYC விவரங்களை ஆன்லைனில் எளிதாகப் புதுப்பிக்கலாம்.