இனி PF பணம் எடுக்க செக் புக் தேவையில்லை! அதிரடி மாற்றத்தை கொண்டு வந்த EPFO அமைப்பு!

ஊழியர் வருங்கால வைப்பு நிதி அமைப்பு (EPFO) தொடர்ந்து தங்கள் உறுப்பினர்களுக்காக பல்வேறு மாற்றங்களை கொண்டு வருகிறது. அந்த வகையில் EPF பணம் எடுப்பதிலும் தற்போது சில மாற்றங்கள் வரவுள்ளன. இதற்கு முன்னர் இபிஎப் பணத்தை எடுக்க விண்ணப்பிக்கும் போது உங்கள் வங்கி கணக்கு சரியானதா? என உறுதிப்படுத்த சில ஆவணங்கள் தேவைப்பட்டன.

குறிப்பாக உங்கள் பெயர் அச்சிடப்பட்ட செக் புத்தகம் அல்லது வங்கி அதிகாரி கையெழுத்திட்ட பாஸ்புக் தேவைப்படும். அதோடு உங்கள் வங்கி கணக்கை உங்கள் இபிஎப் கணக்குடன் இணைக்க நீங்கள் பணிபுரியும் நிறுவனத்தின் முதலாளி அனுமதி தேவைப்பட்டது. இப்போது அரசு இந்த இரண்டு நடைமுறைகளையும் எளிதாக்கியுள்ளது.

EPF கிளைம் செயல்முறை நிராகரிக்கப்படுவதற்கு இது ஒரு முக்கிய காரணமாக இருந்தது. ஆனால் இந்த நடைமுறை சிக்கலானதாகவும் தாமதத்தை ஏற்படுத்துவதாகவும் இருப்பதாக கஸ்டடியன் டாட் லைப்-இன் நிறுவனர் மற்றும் தலைமை நிர்வாக அதிகாரியான குணால் கப்ரா கூறியுள்ளார்.

அதோடு ஏற்கனவே வங்கியில் KYC கட்டாயத் தேவையாக இருப்பதால் உரிமை கோரலின் போது காசோலை வழங்குவது தேவையற்ற செயல் என்றும் கூறியுள்ளார். ஏனெனில் கேஒய்சி சரிபார்ப்பு செய்யும்போதே வாடிக்கையாளரின் அடையாளம் மற்றும் முகவரி போன்ற தகவல்கள் சரிபார்க்கப்படும். EPF பணத்தை எடுக்கும் போது ஏற்கனவே கேஒய்சி சரிபார்ப்பு முடிந்த வங்கி கணக்கை வைத்திருந்தால் எளிதாக பணம் பெறலாம். இது தேவையற்ற பணிச்சுமையை குறைக்க உதவும்.

தற்போது இந்த சரிபார்ப்பு செயல்முறை நீக்கப்படுவதால்.. இதனால் மோசடிகள் நடைபெறும் வாய்ப்புள்ளது. எனவே EPFO அமைப்பு தனது உறுப்பினர்களின் பணத்தை பாதுகாக்க புதிய செயல் முறையை கொண்டு வர வேண்டும் என்றும் கப்ரா கூறியுள்ளார்.

EPFO அமைப்பு வங்கி கணக்கையும், UAN நம்பரையும் சரிபார்க்க NPCI தளத்தைப் பயன்படுத்தி வருகிறது. NPCI இந்தியாவில் பணப்பரிவர்த்தனை மற்றும் வங்கி கணக்கு பற்றிய தகவல்களைக் கொண்ட ஒரு அமைப்பு. இதன் மூலம் வங்கி கணக்கு சரியாக உள்ளதா? இல்லையா? என்பதைச் சரிபார்க்க முடியும்.

இந்த சரிபார்ப்பு வங்கி கணக்கு மற்றும் UAN ஆகிய இரண்டும் ஒரே நபருக்கு உரியதா? என்பதை உறுதிப்படுத்தும். எனவே EPFO அமைப்பு உறுப்பினர்களின் பணம் மோசடியாக வெளியேறாமல் பாதுகாக்க ஒரு வலுவான செயல்முறையை உருவாக்க வேண்டும் என்றும் தெரிவித்துள்ளார்.