15 ரூபாயில் 20 கிமீ மைலேஜ்.. எலக்ட்ரிக் கார்-ஐ விடவும் பெஸ்ட்..?! #Ethanol

இந்தியாவில் மாற்று எரிபொருளுக்கு அதிகப்படியான முக்கியத்துவம் அளிக்கப்பட்டு வரும் வேளையில் வெறும் 15 ரூபாய் செலவில் 20-25 கிமீ மைலேஜ் கொடுக்கும் புதிய எரிபொருளில் இயங்கும் கார்கள் அடுத்தடுத்து அறிமுகம் செய்யப்பட உள்ளது.

இந்தியாவில் பெட்ரோல் 102 ரூபாய்க்கு விற்பனை செய்யப்படும் வேளையில் மத்திய அரசின் முக்கிய அமைச்சர்கள் அடங்கிய குழு 400 நாட்களாக எவ்விதமான விலை மாற்றமும் இல்லாமல் விற்பனை செய்யப்படும் பெட்ரோல், டீசல் விலை குறித்து சமீபத்தில் ஆலோசனை செய்தது.

இந்த நிலையில் 15 ரூபாயில் எந்த எரிபொருள் கிடைக்கும் என்ற கேள்விக்கு விடை தேடுவதற்குள், மத்திய சாலை போக்குவரத்து மற்றும் நெஞ்சாலை துறை அமைச்சர் நித்தின் கட்கரி-யின் சமீபத்திய பேச்சு மிகவும் முக்கியமானதாக ஆட்டோமொபைல் சந்தையில் பார்க்கப்படுகிறது.

இந்தியாவில் கடந்த சில ஆண்டுகளாக பெட்ரோல், டீசல் பயன்பாட்டை குறைக்க அதிகப்படியான முயற்சிகள் மேற்கொள்ளப்பட்டு வரும் வேளையில், பெட்ரோல் உடன் எத்தனால் (ETHANOL) கலந்து விற்பனை செய்யும் முறை மத்திய அரசால் கொண்டு வரப்பட்டு பெரிய அளவிலான மாற்றத்தை கொண்டு வந்தது.

இந்த நிலையில் இந்தியாவில் விரைவில் எத்தனால் (ETHANOL) மட்டுமே எரிபொருளாக கொண்டு இயங்கும் வாகனங்கள் அடுத்தடுத்து அறிமுகம் செய்யப்பட உள்ளது. இதில் முன்னோடியாக ஜப்பான் நாட்டின் முன்னணி ஆட்டோமொபைல் நிறுவனமான டோயோட்டா விரைவில் எத்தனால் (ETHANOL) மட்டுமே எரிபொருளாக கொண்டு இயங்கும் Camry கார்-ஐ அறிமுகம் செய்ய உள்ளது.

இந்த எத்தனால் எரிபொருளில் இயங்கும் Toyota Camry கார் வருகிற ஆகஸ்ட் மாதம் அறிமுகம் செய்யப்பட உள்ளது. இதேபோல் டிவிஎஸ், பஜாஜ், ஹீரோ போன்ற இரு சக்கர வாகன உற்பத்தி நிறுவனங்களும் முழுமையாக எத்தனால் (ETHANOL) எரிபொருளில் இயங்கும் கார்களை அறிமுகம் செய்ய உள்ளதாகவும் மத்திய அமைச்சர் நித்தின் கட்கரி தெரிவித்தார்.

மேலும் நித்தின் கட்கரி எத்தனால்-ஐ முழுமையாக பயன்படுத்தும் போது வெறும் 15 ரூபாயில் ஒரு லிட்டர் எரிபொருள்-ஐ பெற முடியும். தற்போது பெட்ரோல் 120 ரூபாய் விலையில் விற்கப்படுகிறது, இதேபோல் எத்தனால் 60 ரூபாயில் விற்பனை செய்யப்படுகிறது. எத்தனால் மூலம் 40 சதவீதம் மின்சாரம் தயாரிக்கப்படும் காரணத்தால் இதன் சராசரி விலை லிட்டருக்கு 15 ரூபாய் மட்டுமே வரும் என தெரிவித்தார்.

மேலும் எத்தனால் எரிபொருளில் பெட்ரோல்-ஐ காட்டிலும் கூடுதலான ஆக்டேன் இருக்கும் காரணத்தால் மைலேஜ் கூடுதலாக கிடைக்கும். இப்படி இல்லாவிட்டாலும் தற்போது கிடைக்கும் 20 கிமீ மைலேஜ் கட்டாயம் கிடைக்கும் என கணிக்கப்படுகிறது.

ஆனால் எத்தனாலில் இயங்கும் டோயோட்டா கேம்ரி கார் விலை என்ன என்பது தான் முக்கிய கேள்வி..? இதேபோல் எலக்ட்ரிக் வாகனங்களுக்கு போட்டியாக எத்தனால் வாகனங்கள் உருவெடுக்குமா என்ற கேள்வியும் மத்திய அமைச்சர் நித்தின் கட்கரி-யின் 15 ரூபாய் கணக்கீடு உருவாக்கியுள்ளது.