பேஸ்புக்-ன் புதிய ஸ்மார்ட்வாட்ச் மார்க் ஜூக்கர்பெர்க்-ன் பிரம்மாண்ட திட்டம் அதிர்ச்சியில் ஆப்பிள்!

கன்ஸ்யூமர் எலக்ட்ரானிக்ஸ் பிரிவில் ஆப்பிள் நிறுவனத்தின் மாபெரும் வெற்றியைக் கண்டு யாருக்குத் தான் பொறாமை இருக்காது. ஆப்பிள் நிறுவனத்தைப் போலவே தற்போது பல முன்னணி நிறுவனங்கள் எல்க்ட்ரானிக்ஸ் கருவிகளைத் தனது பிராண்டில் தயாரித்து விற்பனை சந்தைக்குக் கொண்டு வர முயற்சி செய்து வருகிறது.

ஏற்கனவே மைக்ரோசாப்ட், கூகிள் ஆகிய நிறுவனங்கள் இந்தத் துறையில் தீவிரமாகப் பணியாற்றி வரும் நிலையில், தற்போது புதிதாகப் பேஸ்புக் நிறுவனம் பிரத்தியேகமாகத் தனது பிராண்டில் ஸ்மார்ட்வாட்ச் தயாரித்து விற்பனை செய்ய முடிவு செய்துள்ளதாகத் தகவல் வெளியாகியுள்ளது.

பேஸ்புக் அதிரடி

கன்ஸ்யூமர் எலக்ட்ரானிக்ஸ் பிரிவில் முதலில் கம்பியூட்டர் நிறுவனங்கள் மட்டுமே வந்த நிலையில், தற்போது டிஜிட்டல் சேவை நிறுவனங்கள் பெரிய அளவிலான வர்த்தகத்தையும், பிராண்டையும் கொண்டுள்ள காரணத்தால் இத்துறையில் இறக்க முடிவு செய்துள்ளது. இதன் தொடர்ச்சியாகத் தான் பேஸ்புக்.

பேஸ்புக் மார்க் ஜூக்கர்பெர்க்

சில வருடங்களுக்கு முன்பு பேஸ்புக் ஸ்மாட்ர்போன் அறிமுகம் செய்யத் திட்டமிட்டு கைவிட்ட நிலையில், தற்போது ஸ்மார்ட்வாட்ச் தயாரிப்பில் இறங்க முடிவு செய்துள்ளது. இதற்காக மார்க் ஜூக்கர்பெர்க் பிரம்மாண்ட திட்டத்தைத் தீட்டியுள்ளதாகவும், 2022ஆம் ஆண்டுக் கோடைக்காலத்தில் ஸ்மார்ட்வாட்ச்-ஐ அறிமுகம் செய்ய உள்ளதாகத் தகவல் வெளியாகியுள்ளது.

பேஸ்புக் ஸ்மார்ட்வாட்ச்

பேஸ்புக் அறிமுகம் செய்யும் ஸ்மார்ட்வாட்ச்-ல் இரண்டு கேமரா இருக்கும் என்று, அதைத் தனியாக வெளியே எடுத்து கோப்ரோ போலப் பயன்படுத்திப் போட்டோ மற்றும் வீடியோ எடுக்க முடியும் வகையில் உருவாக்கப்பட்டு உள்ளதாகக் கூறப்படுகிறது.

பேஸ்புக், இன்ஸ்டாகிராம், வாட்ஸ்அப்

இந்த ஸ்மாட்ர்வாட்ச் கேமராவில் எடுக்கப்படும் வீடியோ மற்றும் போட்டோக்களைப் பேஸ்புக், இன்ஸ்டாகிராம், வாட்ஸ்அப் ஆகியவற்றில் பகிர்ந்துகொள்ளும் வசதியும் உள்ளதாகத் தகவல் வெளியாகியுள்ளது. இதன் மூலம் இந்தக் கருவி பேஸ்புக்-ன் சேவைகளை மேம்படுத்தக்கூடிய ஒன்றாகவே உள்ளது.

400 டாலர் விலை

பேஸ்புக் இந்த ஸ்மார்ட்வாட்ச்-ஐ 1பில்லியன் டாலர் முதலீட்டில் ஆராய்ச்சி செய்து உருவாக்கி வருவதாகவும், 2022 கோடைக் காலத்தில் அறிமுகம் செய்யப்படும் இந்த ஸ்மார்ட்வாட்ச் 400 டாலருக்கு விற்பனை செய்ய உள்ளதாகவும் தகவல் கிடைத்துள்ளது.

ஆனால் இதுவரை பேஸ்புக் இதுகுறித்து எவ்விதமான அதிகாரப்பூர்வ தகவல்களையும் வெளியிடவில்லை.

ஆப்பிள் மற்றும் கூகிள்

ஸ்மார்ட்வாட்ச் விற்பனையில் சுமார் 55 சதவீத சந்தையைக் கொண்டு உலகளவில் மிகப்பெரிய அளவில் ஆதிக்கம் செலுத்துகிறது ஆப்பிள். இந்தச் சந்தையில் நுழைய வேண்டும் என்பதற்காகக் கூகுள் சமீபத்தில் Fitbit நிறுவனத்தைக் கைப்பற்றியது. தற்போது பேஸ்புக் இறங்கியுள்ளது.