இலக்கியம் மற்றும் அமைதிக்கான நோபல் பரிசு பெற்ற பெண்கள்.. இவர்களை உங்களுக்கு தெரியுமா?

பெண்கள் பெரும்பாலும் அனைத்து விஷயங்களிலும் சாதித்து வருகின்றனர். பெண்களை முன்னோடியாக கொண்ட எத்தனையோ விஷயங்கள் நாட்டில் நடைபெற்று வருகின்றன. அந்த வகையில், கடந்த காலங்களில் இருந்து இப்போது வரை எத்தனையோ பெண்கள் நோபல் பரிசுகளை வாங்கியுள்ளனர். அந்த வகையில், இலக்கியம் மற்றும் அமைத்திக்கான நோபல் பரிசு பெற்றவர்கள் யார் யார் என்பதை பார்க்கலாம்.

இலக்கியத்திற்கான நோபல் பரிசு: இதுவரை இலக்கியத்திற்கான நோபல் பரிசு 18 பெண்கள் பெற்றுள்ளனர். தென் கொரிய எழுத்தாளர் ஹான் காங்கிற்கு (Han Kang) 2024ம் ஆண்டு இலக்கியத்துக்கான நோபல் பரிசு அறிவிக்கப்பட்டுள்ளது. 53 வயதான புனைகதை எழுத்தாளர் ஹான் காங், 2007-ஆம் ஆண்டு எழுதிய தி வெஜிடேரியன்' (The Vegetarian) என்னும் நாவலுக்காக 'மேன் புக்கர்' சர்வதேச பரிசுப் பெற்றார்.

அன்னி எர்னாக்ஸ் (Annie Ernaux) ஒரு பிரெஞ்சு எழுத்தாளர் மற்றும் பேராசிரியர். 2022-ம் ஆண்டு இலக்கியத்திற்கான நோபல் பரிசை அவர் வென்றார். அவரது எழுத்து பாணி தனிப்பட்ட அனுபவங்களை உள்ளடக்கிய சுயசரிதை (Autobiographical) மற்றும் சமூக விமர்சனங்கள் அடிப்படையிலானது. அவர் பெண்களின் வாழ்க்கை, நினைவுகள், சமூக வர்க்கத்திற்குள் இருக்கும் சமத்துவமின்மை, காதல், பாலியல் மற்றும் குடும்ப உறவுகள் ஆகியவற்றைப் பதிவு செய்கிறார்.

லூயிஸ் க்ளக் (Louise Glück) ஒரு அமெரிக்கக் கவிஞரும் 2020 ஆம் ஆண்டு இலக்கியத்திற்கான நோபல் பரிசு பெற்றவரும் ஆவார். அவரது கவிதைகள் தனிமை, குழந்தைப் பருவ நினைவுகள், குடும்ப உறவுகள், அழிவு மற்றும் புனரமைப்பு போன்ற ஆழமான உணர்ச்சிகளை பிரதிபலிக்கின்றன. அவரது எழுத்துக்கள் எளிமையான முறையில் இருந்தாலும், அதில் உள்ள ஆழமான பொருள் மற்றும் உணர்ச்சி வெளிப்பாடுகளால் அவர் சிறப்புப் பெற்றவர்.

ஓல்கா டோகார்சுக் (Olga Tokarczuk) ஒரு போலந்து எழுத்தாளர் மற்றும் 2018 ஆம் ஆண்டு இலக்கியத்திற்கான நோபல் பரிசு பெற்றவர். அவர் நவீன இலக்கியத்தில் முக்கியமான குரல்களில் ஒருவராக கருதப்படுகிறார். அவரது எழுத்துக்கள் மனித வாழ்வின் ஆழமான விவரிப்புகள், வரலாற்று விழிப்புணர்வு, மற்றும் ஆன்மீக ஆய்வுகள் ஆகியவற்றை உள்ளடக்கியவை. ஸ்வெட்லானா அலெக்ஸிவிச் (Svetlana Alexievich) ஒரு பெலாரூசிய எழுத்தாளர் மற்றும் 2015 ஆம் ஆண்டு இலக்கியத்திற்கான நோபல் பரிசு பெற்றவர்.

ஆலிஸ் மன்றோ (Alice Munro) ஒரு கனேடிய எழுத்தாளர் மற்றும் 2013ஆம் ஆண்டு இலக்கியத்திற்கான நோபல் பரிசு பெற்றவர். அவர் சிறுகதை இலக்கியத்தில் மிகப்பெரிய சாதனை புரிந்தவர். அவரது கதைகள் பெண்களின் வாழ்க்கை, நேர்மையான உணர்வுகள், குற்றமுணர்வு, உறவுகள் மற்றும் சாதாரண வாழ்க்கையின் ஆழமான உண்மைகள் ஆகியவற்றை வெளிப்படுத்துகின்றன.

2009ஆம் ஆண்டில் ருமேனிய-ஜெர்மன் எழுத்தாளரான ஹெர்டா முல்லர் (Herta Müller),2007ல் பிரிட்டிஷ் எழுத்தாளரான டோரிஸ் லெசிங் (Doris Lessing), 2004 ஆம் ஆண்டில் ஆஸ்திரிய எழுத்தாளர் எல்ஃப்ரீட் ஜெலினெக் (Elfriede Jelinek), 1996ல் போலந்து நாட்டைச் சேர்ந்த கவிஞர் விஸ்லாவா சிம்போர்ஸ்கா (Wisława Szymborska), 1993ல் அமெரிக்கா எழுத்தாளரான டோனி மோரிசன் (Toni Morrison),1991ஆம் ஆண்டு தென் ஆப்ரிக்க எழுத்தாளரான நாடின் கோர்டிமர் (Nadine Gordimer), 1966ல் ஜெர்மன்-ஸ்வீடிஷ் கவிஞரான நெல்லி சாக்ஸ் (Nelly Sachs), 1945ஆம் ஆண்டில் சிலி நாட்டை சேர்ந்த கவிஞரான கேப்ரியலா மிஸ்ட்ரல் (Gabriela Mistral), 1938ஆம் ஆண்டு அமெரிக்க எழுத்தாளர் பேர்ல் பக் (Pearl S. Buck), 1928ஆம் ஆண்டு நார்வேயின் புகழ்பெற்ற எழுத்தாளரான சிக்ரிட் அண்ட்செட் (Sigrid Undset), 1926ஆம் ஆண்டில் இத்தாலிய எழுத்தாளரான கிராசியா டெலெட்டா (Grazia Deledda), 1909ஆம் ஆண்டு ஸ்வீடன் நாட்டைச் சேர்ந்த எழுத்தாளரான செல்மா லாகர்லோஃப் (Selma Lagerlöf) ஆகியோர் இலக்கியத்திற்கான நோபல் பரிசை பெற்றுள்ளனர்.

அமைதிக்கான நோபல் பரிசு: இதுவரை 19 பெண்கள் அமைதிக்கான நோபல் பரிசு பெற்றுள்ளனர். நர்கஸ் முகமதி (Narges Mohammadi) ஒரு இரானிய மனித உரிமை ஆர்வலரும், பெண்கள் உரிமைக்காக தன்னுடைய வாழ்க்கையை அர்ப்பணித்த ஒரு போராளியும் ஆவார். 2023ஆம் ஆண்டு, மனித உரிமைகள் மற்றும் மகளிர் உரிமைக்காக ஆற்றிய பணிக்காக அமைதிக்கான நோபல் பரிசு பெற்றார்.

மரியா ரெஸ்ஸா (Maria Ressa) ஒரு பிலிப்பைன்ஸ் நாட்டைச் சேர்ந்த புகழ்பெற்ற செய்தியாளரும், ஊடக உரிமை மற்றும் ஜனநாயகத்தை பாதுகாக்க அயராது போராடிய மனித உரிமை செயற்பாட்டாளரும் ஆவார். 2021ஆம் ஆண்டு, பத்திரிகையாளர் திமித்ரி முரடோவுடன் (Dmitry Muratov) இணைந்து, ஊடக சுதந்திரத்திற்காக ஆற்றிய பணிக்காக அமைதிக்கான நோபல் பரிசு பெற்றார்.

நதியா முராத் (Nadia Murad) ஒரு இராக்கிய யெசீதி (Yazidi) இனத்தவரும், மனித உரிமை செயற்பாட்டாளரும், பாலியல் வன்முறையின் எதிராக குரல் கொடுத்த போராளியும் ஆவார். 2018ஆம் ஆண்டு, காங்கோவைச் சேர்ந்த மருத்துவர் டெனிஸ் முக்வேகே (Denis Mukwege) உடன் இணைந்து, பாலியல் வன்முறையை போர்வழிக் கருவியாக பயன்படுத்துவதை எதிர்த்து போராடியதற்காக அமைதிக்கான நோபல் பரிசு பெற்றார்.

மலாலா யூசுப்சாய் (Malala Yousafzai) ஒரு பாக்கிஸ்தானிய கல்வி உரிமை செயற்பாட்டாளரும், பெண்களின் கல்விக்கான போராளியும் ஆவார். 2014ஆம் ஆண்டு, குழந்தைகளின் கல்வி உரிமைக்காக போராடியதற்காக 17 வயதில் அமைதிக்கான நோபல் பரிசு பெற்றவர். இதன் மூலம் நோபல் பரிசு பெற்ற மிக இளையவராகும்.

எல்லன் ஜான்சன் சர்லீஃப் (Ellen Johnson Sirleaf) ஒரு லைபீரிய அரசியல்வாதியும், ஆப்பிரிக்காவில் ஜனநாயக முறையில் தேர்ந்தெடுக்கப்பட்ட முதல் பெண் அரசுத் தலைவர் (நாடு: லைபீரியா) ஆவார். 2011 ஆம் ஆண்டு, பெண்களின் பாதுகாப்பு மற்றும் சமத்துவத்திற்காக மேற்கொண்ட முயற்சிகளுக்காக அமைதிக்கான நோபல் பரிசு பெற்றார்.

இதேபோல், 2011ஆம் ஆண்டு லைபீரிய அமைதிப் போராளியான லேமா போவீ (Leymah Gbowee), 2011ஆம் ஆண்டு ஏமனிய நிருபர், மனித உரிமை செயற்பாட்டாளர் மற்றும் ஜனநாயக ஆதரவாளரான தவக்கோல் கர்மன் (Tawakkol Karman), 2004ஆம் ஆண்டில் கென்யாவின் சுற்றுச்சூழல் செயற்பாட்டாளர், அரசியல் தலைவர் மற்றும் மனித உரிமை போராளியான வாங்கரி மாத்தாய் (Wangari Maathai), 2003ஆம் ஆண்டில் இரானிய மனித உரிமை வழக்கறிஞர், நீதிபதி, எழுத்தாளர் மற்றும் செயற்பாட்டாளரான ஷிரின் எபாடி (Shirin Ebadi), 1997ஆம் ஆண்டில் அமெரிக்காவை சேர்ந்த ஜோடி வில்லியம்ஸ், 1992ல் குவாத்திமாலாவைச் சேர்ந்த ரிகோபெர்டா மென்சு டம் (Rigoberta Menchú Tum), 1991ஆம் ஆண்டு மியான்மர் (பர்மா) அரசியல் தலைவரும், ஜனநாயக மற்றும் மனித உரிமை போராட்ட செயற்பாட்டாளருமான ஆங் சான் சூ கி (Aung San Suu Kyi), 1982ஆம் ஆண்டில் ஸ்வீடன் நாட்டைச் சேர்ந்த சமூக சீர்திருத்தவாதி ஆல்வா மிர்டல் (Alva Myrdal) ஆகியோரும் அமைதிக்கான நோபல் பரிசை பெற்றுள்ளனர்.

அன்னை தெரேசா (Mother Teresa) பொறுப்பு, சேவை, கருணை ஆகியவற்றின் உயிர்ப்புமிகு உருவமாக விளங்கும் ஒரு மகானி. இந்தியாவில் வசித்த இவர், நோயாளிகள், ஆதரவற்றோர், மற்றும் ஓய்வற்ற உழைப்பாளர்களுக்காக தனது வாழ்க்கையை அர்ப்பணித்தார். 1979ஆம் ஆண்டு, ஏழைகள், நோயாளிகள் மற்றும் துன்புறும் மக்களுக்கு சேவை புரிந்ததற்காக அமைதிக்கான நோபல் பரிசு வழங்கப்பட்டது.

1976 ஆம் ஆண்டில் ஐரிஷ் அமைதி செயற்பாட்டாளர்களான பெட்டி வில்லியம்ஸ் (Betty Williams),மைரீட் கோரிகன் (Mairead Corrigan) ஆகியோர், 1946ல் அமெரிக்காவை சேர்ந்த எமிலி கிரீன் பால்ச் (Emily Greene Balch), 1931 ஆம் ஆண்டில் அமெரிக்க சமூக செயற்பாட்டாளரான ஜேன் ஆடம்ஸ் (Jane Addams), 1905 ஆம் ஆண்டில் ஆஸ்திரிய எழுத்தாளர்,மனிதநேய செயற்பாட்டாளரான பெர்த்தா வான் சட்னர் (Bertha von Suttner) ஆகியோருக்கு அமைதிக்கான நோபல் பரிசு வழங்கப்பட்டது.