சிறிய தவறால் ரூ.52 லட்சம் மாத இழப்பு.. Replaceable என்று நினைத்து பணியாளரை நீக்கம் செய்த நிறுவனம்.!!

ஒரு நடுத்தர நிறுவனம், ஒரு ஊழியரை எளிதில் மாற்றத்தக்கவர் என்று கருதி, எந்தவிதமான காரணமும் தெரிவிக்காமல் அவரைப் பணிநீக்கம் செய்தது. ஆனால், இந்த அவசரமான முடிவால், அந்த நிறுவனம் மாதந்தோறும் ரூ.52 லட்சம் வருமானம் ஈட்டித்தந்த ஒரு முக்கிய வாடிக்கையாளர் ஒப்பந்தத்தையே இழந்தது.

திடீர் பணிநீக்கம்: ரெட்டிட் (Reddit) சமூக வலைத்தளத்தில் தனது அனுபவத்தைப் பகிர்ந்த அந்த முன்னாள் ஊழியர், தனது தொழில் வாழ்க்கையின் ஆரம்பத்தில் நடந்த இந்த திடீர் பணிநீக்கம் பற்றி விளக்கினார். அவர் ஒரு சாதாரண நிர்வாகப் பதவியில் இருந்தபோதிலும், நிறுவனத்தின் மிக முக்கியமான வாடிக்கையாளருடன் வலுவான தனிப்பட்ட உறவை அவர் வளர்த்துக் கொண்டிருந்தார். அந்த வாடிக்கையாளரின் அனைத்து திட்டங்களையும் அவர்தான் நிர்வகித்து வந்தார்.

இந்த நெருக்கமான தொடர்பு இருந்தபோதிலும், ஒருநாள் HR அவரை அழைத்து, அவர் மீது சில புகார்கள் உள்ளதாகவும், அதற்கான விளக்கம் அளிக்கும் வாய்ப்பு கூடக் கொடுக்கப்படாமல் அவரை உடனடியாகப் பணிநீக்கம் செய்ததாகவும் அந்த ஊழியர் கூறினார். இதனால் அவமானமாக உணர்ந்த அவர், தனது தொழில் வாழ்க்கை முடிந்துவிட்டதாகவே நினைத்து நிறுவனத்தை விட்டு வெளியேறினார்.

வாடிக்கையாளரின் விசுவாசம்: ஆனால், சில வாரங்களுக்குப் பிறகு நிலைமை தலைகீழாக மாறியது. பணிநீக்கம் செய்யப்பட்ட பிறகு, அந்த வாடிக்கையாளர் வழக்கம் போல் நேரடியாக அந்த ஊழியரைத் தொடர்பு கொண்டார். அப்போதுதான், அவர் இனி அந்த நிறுவனத்தில் இல்லை என்பதை அறிந்து கொண்டார்.

இதைக் கேட்டதும், அந்த வாடிக்கையாளர் அந்த நிறுவனத்துடன் தொடர்பை முறித்துக்கொண்டு, நேரடியாக முன்னாள் ஊழியரை அணுகினார். அவரே எல்லாப் பொறுப்புகளையும் திறம்படக் கையாண்டதால், நேரடியாக அவருடன் இணைந்து பணியாற்றுவதுதான் சரியாக இருக்கும் என்று வாடிக்கையாளர் உணர்ந்தார். எந்தவித நேர்காணலும் இல்லாமல், அந்த முன்னாள் ஊழியர் உடனடியாக அந்த வாடிக்கையாளருக்குச் சேவை வழங்கத் தொடங்கினார்.

நிறுவனத்தின் விலையுயர்ந்த பாடம்: சரியான மதிப்பீடு இல்லாமல் ஒரு முக்கிய ஊழியரை நீக்கியதால், நிறுவனம் ஒரு ஊழியரை மட்டுமல்லாமல், தனது மிகப்பெரிய வாடிக்கையாளரின் நம்பிக்கையையும் வணிகத்தையும் இழந்தது. மாதத்திற்கு சுமார் $60,000 (தோராயமாக ரூ.52 லட்சம்) மதிப்புள்ள அந்த ஒப்பந்தம், முன்னாள் ஊழியரின் புதிய நிறுவனத்திற்கு முழுமையாக மாற்றப்பட்டது.

இந்த சம்பவம், வாடிக்கையாளர் உறவுகளைப் பராமரிப்பதில் முக்கியப் பங்கு வகிக்கும் ஊழியர்களின் மதிப்பைக் குறைத்து மதிப்பிடுவது எவ்வளவு பெரிய நிதி இழப்பை ஏற்படுத்தும் என்பதைக் காட்டுகிறது. ஒரு பணியாளரை எளிதில் மாற்றிவிடலாம் என்ற முதலாளியின் தவறான அனுமானம், நிறுவனத்திற்கு நிதி இழப்பையும், நற்பெயர் பாதிப்பையும் ஏற்படுத்தியது.