FD முதலீடு செய்ய செப்டம்பர் 30 வரை தான் டைம் இருக்கு.. 7.85 சதவீத வட்டி வழங்கும் முன்னணி வங்கிகள்!

பல வங்கிகள் குறிப்பிட்ட காலத்திற்கு அதிக வட்டி விகிதங்களுடன் சிறப்பு பிக்சட் டெபாசிட்களை வழங்குகின்றனர். அந்த வகையில் ஸ்டேட் பேங்க் ஆப் இந்தியா, ஐடிபிஐ பேங்க், இந்தியன் பேங்க், பஞ்சாப் & சிந்து பேங்க் போன்ற வங்கிகள் சிறப்பு பிக்சட் டெபாசிட் திட்டங்களை அறிமுகப்படுத்தியுள்ளன. இந்தத் திட்டங்களுக்கு விண்ணப்பிக்க இந்த மாதம் செப்டம்பர் 30-ஆம் தேதி வரை காலக்கெடு வழங்கப்பட்டுள்ளது. இதற்குப் பின்னர் இந்த சிறப்பு பிக்சட் டெபாசிட் திட்டங்கள் வாடிக்கையாளர்களுக்கு கிடைக்காது.

IDBI வங்கியின் சிறப்பு FD காலக்கெடு: ஐடிபிஐ பேங்க் உத்சவ் என்ற சிறப்பு பிக்சட் டெபாசிட்டை அறிமுகப்படுத்தியுள்ளது. இந்த வகை பிக்சட் டெபாசிட்களுக்கு 300 நாட்கள், 375 நாட்கள், 444 நாட்கள், 700 நாட்கள் என வெவ்வேறு முதிர்வு காலங்கள் வழங்கப்படுகின்றன. இந்தத் திட்டங்களில் முதலீடு செய்வதற்கான கடைசி தேதி செப்டம்பர் 30, 2024 ஆகும்.

300 நாட்களில் முதிர்ச்சி அடையும் உத்சவ் பிக்சட் டெபாசிட்களுக்கு 7.05 சதவீத வட்டி வழங்கப்படுகிறது. மூத்த குடிமக்களுக்கு 7.55 சதவீத வட்டி வழங்கப்படுகிறது.

375 நாட்களில் முதிர்ச்சியடையும் உத்சவ் FD-களுக்கு 7.15 சதவீத வட்டி வழங்கப்படுகிறது. மூத்த குடிமக்களுக்கு 7.65 சதவீத வட்டி வழங்கப்படுகிறது.

444 நாட்கள் கொண்ட பிக்சட் டெபாசிட்களுக்கு பொது வாடிக்கையாளர்களுக்கு 7.35% வட்டியும், மூத்த குடிமக்களுக்கு 7.85 சதவீத வட்டியும் வழங்கப்படுகிறது.

700 நாட்கள் முதிர்வு காலம் கொண்ட ஃபிக்ஸட் டெபாசிட்களுக்கு பொது வாடிக்கையாளர்களுக்கு 7.20% வட்டியும், மூத்த குடிமக்களுக்கு 7.70 சதவீத வட்டியும் வழங்கப்படுகிறது.

இந்தியன் பேங்கின் சிறப்பு FD காலக்கெடு: இந்தியன் பேங்கின் சிறப்பு FD-யில் முதலீடு செய்வதற்கான கடைசி தேதி செப்டம்பர் 30, 2024 ஆகும். இந்தியன் பேங்க் தற்போது "Ind Super 300" என்ற சிறப்பு பிக்சட் டெபாசிட் திட்டத்தை வழங்குகிறது.

300 நாட்கள் வழங்கப்படும் சிறப்பு பிக்சட் டெபாசிட் திட்டத்திற்கு பொது வாடிக்கையாளர்களுக்கு 7.5% வட்டி வழங்கப்படுகிறது. மூத்த குடிமக்களுக்கு 7.55 சதவீத வட்டி வழங்கப்படுகிறது. சூப்பர் சீனியர் சிட்டிசன்களாக இருந்தால் அவர்களுக்கு 7.80 சதவீத வட்டி வழங்கப்படுகிறது.

400 நாட்கள் முதிர்வு காலம் கொண்ட பிக்சட் டெபாசிட் திட்டத்திற்கு பொது வாடிக்கையாளர்களுக்கு 7.25% வட்டியும், மூத்த குடிமக்களுக்கு 7.75% வட்டியும், சூப்பர் சீனியர் சிட்டிசன்களாக இருந்தால் அவர்களுக்கு 8% வட்டியும் வழங்கப்படுகிறது.

பஞ்சாப் & சிந்து பேங்க் சிறப்பு FD காலக்கெடு: 222 நாட்கள் கொண்ட சிறப்பு FD-களுக்கு வங்கி 6.30% வட்டி விகிதத்தை வழங்குகிறது. 333 நாட்கள் கொண்ட சிறப்பு FD-களுக்கு 7.15% வட்டி வழங்கப்படுகிறது. 444 நாட்கள் கொண்ட சிறப்பு FD-களுக்கு 7.25% வட்டி வழங்கப்படுகிறது. இந்தத் திட்டங்களில் முதலீடு செய்வதற்கான கடைசி தேதி செப்டம்பர் 30, 2024 ஆகும்.

SBI அம்ரித் கலாஷ் FD: SBI வாடிக்கையாளர்கள் செப்டம்பர் 30, 2024 வரை அம்ரித் கலாஷில் முதலீடு செய்யலாம். வங்கி இணையதளத்தின்படி, "400 நாட்கள்" கொண்ட இந்த சிறப்பு பிக்சட் டெபாசிட்களுக்கு பொது வாடிக்கையாளர்களுக்கு 7.1% வட்டியும், மூத்த குடிமக்களுக்கு 7.60 சதவீத வட்டியும் வழங்கப்படுகிறது. இந்தத் திட்டம் செப்டம்பர் 30, 2024 வரை மட்டுமே செல்லுபடியாகும்.