அப்படி போடு! தமிழ்நாட்டில் பணத்தைக் கொட்டும் Foxconn! ஆயிரக் கணக்கில் வேலை வாய்ப்புகள்!

Foxconn. இந்த கம்பெனி பெயரை எங்கோ கேள்விப்பட்டது போல் இருக்கிறதா..? அட ஆமாங்க. உலகின் முன்னணி பிரீமியம் ஸ்மார்ட்ஃபோன்களைத் தயாரிக்கும் ஆப்பிள் கம்பெனியின் உற்பத்தியாளர் தான் இந்த ஃபாக்ஸ் கான் (Foxconn).

இந்த ஃபாக்ஸ் கான் (Foxconn) ஸ்மார்ட்ஃபோன் தயாரிப்பு கம்பெனிக்கு, ஏற்கனவே சென்னைக்கு சுமார் 50 கிலோமீட்டர் தொலைவிலுள்ள ஸ்ரீபெரும்புதூரில் ஒரு உற்பத்தி ஆலை இருப்பதும் இங்கு நினைவு கூறத்தக்கது.

இப்போது அந்த ஆலையை விரிவாக்கம் செய்யவே கூடுதலாக முதலீடு செய்யப் போகிறார்களாம். அதாவது தமிழகத்துக்கு முதலீடுகள் வரப் போகிறது.

எவ்வளவு முதலீடு

ஃபாக்ஸ் கான் (Foxconn) கம்பெனி, தமிழகத்தின் ஸ்ரீபெரும்புதூர் பகுதியில் இருக்கும் ஆப்பிள் ஐபோன் உற்பத்தி ஆலையை விரிவாக்கம் செய்ய சுமார் 1 பில்லியன் டாலர் (இந்திய மதிப்பில் 7,500 கோடி ரூபாய்) முதலீடு செய்யப் போவதாக ராய்டர்ஸ் நிறுவனம் செய்தி வெளியிட்டு இருக்கிறது.

ஏன் திடீர் முதலீடு

ஆப்பிள் நிறுவனம், சீனாவில் உற்பத்தி செய்யப்படும் தன் ஸ்மார்ட்ஃபோன்களை, வேறு நாடுகளுக்கு மடை மாற்ற திட்டமிட்டுக் கொண்டிருப்பதாகச் செய்திகள் வெளியாயின. அதோடு சீனாவைச் சார்ந்து இருப்பதையும் கணிசமாக குறைக்க விரும்புகிறது ஆப்பிள். எனவே, ஆப்பிள் ஸ்மார்ட்ஃபோன்களை உற்பத்தி செய்து கொடுக்கும் ஃபாக்ஸ் கான் (Foxconn) கம்பெனி தன் ஸ்ரீபெரும்புதூர் ஆலையை விரிவாக்க முதலீடு செய்வதாகவும் செய்திகள் சொல்கின்றன.

3 ஆண்டுகளில் முதலீடு

இந்த 1 பில்லியன் டாலர் (7,500 கோடி ரூபாய்) முதலீட்டை ஒரே அடியாக முதலீடு செய்யப் போவதில்லையாம். மெல்ல பகுதி பகுதியாக, அடுத்த மூன்று ஆண்டுகளில் முதலீடு செய்யப் போகிறார்களாம். மத்திய அரசின் production-linked incentive திட்டத்தில் பயன்பெற விரும்பும் ஒரு கம்பெனியாகவும் ஃபாக்ஸ் கான் (Foxconn) விண்ணப்பித்து இருக்கிறதாம்.

தமிழக மக்களுக்கு ஜாக்பாட்

தற்போதைய சூழலில் வேலை வாய்ப்புகள் கிடைப்பது என்பது மிகவும் சிரமமான விஷயம். ஆனால் ஃபாக்ஸ் கான் (Foxconn) கம்பெனியின் இந்த விரிவாக்கத் திட்டத்தினால், ஸ்ரீபெரும்புதூர் ஆலையில், சுமாராக 6,000 வேலை வாய்ப்புகள் அதிகரிக்கும் எனவும் சொல்லி இருக்கிறார்கள். இது உண்மையாகவே தமிழக மக்களுக்கு கிடைத்த நல்ல வாய்ப்பு தான்.

கொஞ்சம் வரலாறு

தமிழகத்தில் ஸ்ரீபெரும்புதூரில் இருக்கும் ஃபாக்ஸ் கான் (Foxconn) உற்பத்தி ஆலையில் தான், ஆப்பிள் நிறுவனத்தின் ஐபோன் எக்ஸ் ஆர் (iPhone XR) ரக போன்கள் தயாரிக்கப்படுகின்றன. ஆப்பிள் நிறுவனத்தின் ஐபோன்களிலேயே விலை மலிவான ஐபோன்களின் ஒன்று இந்த ஐபோன் எக்ஸ் ஆர் என்பது குறிப்பிடத்தக்கது.

சியாமிக்கும் இவர்கள் தான்

இதே ஃபாக்ஸ் கான் (Foxconn) நிறுவனம் தான், சீனாவின் மிகப் பெரிய ஸ்மார்ட்ஃபோன் கம்பெனியான சியாமிக்கும் ஸ்மார்ட்ஃபோன்களை உற்பத்தி செய்து கொடுத்துக் கொண்டு இருக்கிறது. ஆனால், சியாமி ஸ்மார்ட்ஃபோன்கள், ஆந்திரப் பிரதேசத்தில் உள்ள ஃபாக்ஸ் கான் (Foxconn) உற்பத்தி ஆலைகளில் தயாரிக்கப்படுகிறதாம். தற்போது, ஃபாக்ஸ் கான் (Foxconn) செய்ய இருக்கும் முதலீடு தமிழகத்தில் இருக்கும், ஐபோன் உற்பத்தி ஆலைகளில் தான் செய்ய போகிறார்களாம்.