ரூ.40,000 முதலீட்டில் தொடங்கப்பட்டு.. மாபெரும் சாம்ராஜ்ஜியமாக மாறிய India Mart-ன் வெற்றி கதை..!

சென்னை: இந்தியாவின் முக்கியமான பி2பி இணையதளமாக இருக்கிறது இந்தியாமார்ட். மொத்தமாக பொருட்களை வாங்க வேண்டும் என நினைப்பவர்களுக்கும், வியாபாரிகளுக்கும் இந்த தளம் பெருமளவில் உதவியாக இருக்கிறது. இதன் பின்னணியில் இருப்பவர் தினேஷ் அகர்வால்.

அமெரிக்க வேலையை விட்டுவிட்டு இந்தியாவிற்கு திரும்பி இந்தியா மார்ட் எனும் நிறுவனத்தை உருவாக்கினார் தினேஷ் அகர்வால். 1995 ஆம் ஆண்டு தினேஷ் அகர்வால் அமெரிக்காவில் ஹெச்சிஎல் நிறுவனத்தில் வேலை செய்து வந்தார்.

நல்ல சம்பளம், அமெரிக்காவில் வேலை இப்படி ஒரு வாய்ப்பை யாரும் தவற விட மாட்டார்கள். ஆனால் தினேஷ் அகர்வால் அமெரிக்க வேலையை விட்டுவிட்டு தாயகத்துக்கு திரும்பினார். அப்படி தாயகம் திரும்பிய அவர் 40 ஆயிரம் ரூபாய் முதலீட்டில் தொடங்கியது தான் இந்தியா மார்ட் நிறுவனம்.

தினேஷ் அகர்வால் தன்னுடைய சகோதரர் பிரஜேஷ் அகர்வாலுடன் இணைந்து 1996ஆம் ஆண்டில் இந்தியா மார்ட் நிறுவனத்தை உருவாக்கினார். இந்தியாவை சேர்ந்த ஏற்றுமதியாளர்களை உலக சந்தையுடன் இணைப்பது தான் இவர்களது நோக்கமாக இருந்தது.

தற்போது இந்தியாவின் புகழ்பெற்ற ஆன்லைன் பி2பி மார்க்கெட் தளமாக இந்தியா மார்ட் தளம் செயல்படுகிறது. 1997 முதல் 2001 ஆம் ஆண்டு வரை இந்தியாமார்ட் தளத்தின் பக்கத்தில் ஏற்றுமதியாளர்கள் இலவசமாக தங்களுடைய பொருட்களை சந்தைப்படுத்திக் கொள்ளலாம். இதன் மூலம் பல்வேறு நிறுவனங்களுக்கான ஆன்லைன் விற்பனை வாய்ப்பை ஏற்படுத்திக் கொடுத்தது இந்தியா மார்ட் தளம்.

2008 ஆம் ஆண்டு ஏற்பட்ட சர்வதேச அளவிலான பொருளாதார மந்த நிலை இந்தியா மார்ட் நிறுவனத்தின் நிலைமையும் தலைகீழாக்கியது. எனவே இந்த நிறுவனம் சர்வதேச சந்தையிலிருந்து உள்நாட்டு சந்தை நோக்கி தன்னுடைய கவனத்தை திருப்பியது. இப்படித்தான் இந்தியா மார்ட் நிறுவனம் இந்தியாவிற்குள் தொழில் புரிபவர்களுக்கும் ஒரு மிகப்பெரிய வாய்ப்பினை ஏற்படுத்தி தந்தது. இந்த உள்நாட்டு b2b தளத்தை உருவாக்கியதன் மூலம் இந்த நிறுவனம் வேகமாக வளர்ச்சி அடைந்தது. இந்த நிறுவனம் 52 வாரங்களிலேயே 52 புதிய அலுவலகங்களை திறந்தது.

இந்தியாவின் பல்வேறு வியாபாரிகளுக்கும் இந்த தளம், பெரிய அளவிலான தொழில் வாய்ப்புகளை வழங்குகிறது. தற்போது தினேஷ் அகர்வாலின் சொத்து மதிப்பு 5000 கோடி ரூபாய் ஆகும் இந்தியா மார்ட் நிறுவனத்தின் மதிப்பு 18,765 கோடி ரூபாய் ஆகும். அதுமட்டுமின்றி தினேஷ் அகர்வால் தற்போது 45 ஸ்டார்ட் அப் நிறுவனங்களில் முதலீடு செய்து இருக்கிறார்.

Story written by: Devika