தீபாவளிக்கு தயாராகும் எலக்ட்ரானிக்ஸ் நிறுவனங்கள்.. மக்களின் நிலை என்ன..?

கொரோனா முதல் அலை தணிந்த பின்பு நாட்டின் வர்த்தகம் மற்றும் பொருளாதாரம் வளர்ச்சிப் பாதைக்குத் திரும்ப மிகவும் முக்கிய காரணமாக இருந்தது விழாக்கால விற்பனை தான்.

சந்தை வல்லுனர்கள் கணிக்கப்பட்டதை விடவும் மிகவும் சிறப்பான வர்த்தகம் பதிவு செய்யப்பட்ட காரணத்தால், இந்த வருடப் பண்டிகை கால விற்பனைக்கு எலக்ட்ரானிக்ஸ் மற்றும் ஸ்மார்ட்போன் நிறுவனங்கள் முன்கூட்டியே தயாராகியுள்ளது.

கொரோனா முதல் அலை

கொரோனா முதல் அலையில் நாட்டின் வர்த்தகம் மாறும் வேலைவாய்ப்பு என அனைத்தும் பாதிக்கப்பட்டு மக்களின் நிதிநிலை மிகவும் மோசமான நிலைக்குப் தள்ளப்பட்டது. இந்த சூழ்நிலையிலும் பண்டிகை கால விற்பனை மிகவும் சிறப்பாக இருந்த காரணத்தால் இந்த வருடம் முன் கூட்டியே தயாராகி வருகிறது எலக்ட்ரானிக்ஸ் நிறுவனங்கள்.

கொரோனா 2வது அலை

கொரோனா 2வது அலையில் அதிகளவிலான வர்த்தக பாதிப்பு இல்லாத காரணத்தால் மக்களின் வேலைவாய்ப்பு அளவீடும் பாதிக்கப்படவில்லை, இதனால் மக்கள் கையில் போதுமான பணம் இருக்க அதிக வாய்ப்புகள் உள்ளது. இதன் மூலம் கடந்த வருடத்தை விடவும் இந்த வருடம் பண்டிகை கால விற்பனை மிகவும் சிறப்பாக இருக்கும் என எதிர் பார்க்கப்படுகிறது.

பண்டிகை கால விற்பனை

பொதுவாக நிறுவனங்கள் ஆகஸ்ட் மாதத்தின் கடைசியில் இருந்து தான் பண்டிகை கால விற்பனைக்காக உற்பத்தியைத் துவங்கும். ஆனால் தற்போது ஜூலை மாதத்தில் இருந்து உற்பத்தியைத் துவக்கவுள்ளது.

உற்பத்தி மந்தம்

நாட்டின் பல பகுதிகளில் இன்னும் கொரோனா தொற்று இருக்கும் காரணத்தால் உற்பத்தி பணிகள் மந்தமாகவே உள்ளது. ஒரு பக்கம் பண்டிகை காலத்தில் வர்த்தகம் அதிகரிக்கும் எனக் கணிக்கப்பட்டு உள்ளது, இதேவேளையில் உற்பத்தியும் மந்தமாக இருக்கும் காரணத்தால் உற்பத்தி பணிகளை முன்கூட்டியே துவங்கியுள்ளது.

முக்கிய நிறுவனங்கள்

இந்நிலையில் தற்போது கிடைத்துள்ள தகவல்கள் படி எல்ஜி, சாம்சங், காட்ரிஜ், ஹேயர், விவோ, ரியல்மீ, ஆப்பிள், பேனாசோனிக், சியோமி ஆகிய நிறுவனங்கள் ஜூலை மாத துவக்கத்தில் இருந்து உற்பத்தியை அதிகரிக்க முடிவு செய்துள்ளது.