ரூம் பாய் முதல் 2 நிறுவனங்களின் சிஇஓ வரை.. அனிமேஷன் துறையில் கலக்கும் முன்னாள் இன்போசிஸ் ஊழியர்..!

இன்போசிஸ் நிறுவனத்தில் ஆபீஸ் பாயாக இருந்தவர் தற்போது இரண்டு நிறுவனங்களின் தலைமை செயல் அதிகாரியாக உயர்ந்திருக்கிறார். வாழ்க்கையில் விடாமுயற்சியும் மன உறுதியும் இருந்தால் எத்தகைய உயரத்தையும் அடைய முடியும் என்பதற்கு உதாரணமான ஒரு நபரின் கதை தான் இது. மகாராஷ்டிரா மாநிலம் பீட் என்ற சிறிய கிராமத்தை சேர்ந்தவர் தான் தாதா சாகிப் பாகத். தன்னுடைய பள்ளிப் படிப்பையும் , ஐடிஐ டிப்ளமோ படிப்பையும் முடித்துவிட்டு தன்னுடைய கிராமத்திலிருந்து வேலை தேடி புனேவுக்கு இடம் பெயர்ந்தார்.

அங்கே தன்னுடைய அன்றாட செலவுகளுக்கு கூட பணம் இல்லாமல் தவித்து வந்தவர் தனக்கு கிடைத்த வேலைகளை எல்லாம் செய்தார். அப்படித்தான் இன்போசிஸ் நிறுவனத்தில் ரூம் சர்வீஸ் பாயாக அவர் பணியாற்றினார். அப்போது அவருக்கு மாத ஊதியம் 9,000 ரூபாய். இப்படி வேலை பார்த்துக் கொண்டே மாலையில் அனிமேஷன் கற்றுத்தரும் வகுப்புகளுக்கு சென்றார்.

இந்த முடிவு தான் அவர் வாழ்க்கையை மாற்றியது. அனிமேஷன் படிப்பை முடித்தவுடன் வேலை கிடைத்து ஹைதராபாத்தில் குடிபெயர்ந்தார். டிசைன் மற்றும் கிராபிக்ஸ் கம்பெனியில் வேலை பார்த்து வந்த இவர் அத்துடனே பைத்தான் மற்றும் சி++ ஆகிய கணினி மொழிகளை கற்றுக் கொண்டார். மேலும் தனக்கே உரிய பாணியில் விஷுவல் எஃபக்டுகளை உருவாக்கி ஆன்லைனில் அவற்றை விற்பனை செய்ய தொடங்கினார். இப்படித்தான் அவருடைய தொழில் வளர தொடங்கியது. இவர் நார்னியா, ஸ்டார்வார் உள்ளிட்ட பல்வேறு படங்களில் அனிமேஷன் மற்றும் கிராபிக்ஸ் பிரிவுகளில் பணியாற்றியுள்ளார்.

இதனை அடுத்து ரிலையன்ஸ் மீடியா ஒர்க்ஸ் உள்ளிட்ட முன்னணி நிறுவனங்களில் எல்லாம் இவர் பணி செய்து இருக்கிறார். 2015 ஆம் ஆண்டு திடீரென இவருக்கு கார் விபத்து ஏற்பட்டது அந்த சமயத்தில் ரெஸ்ட்டில் இருந்த இவர் ஃப்ரீலான்ஸ் முறையில் பணிகளை செய்யத் தொடங்கினார். இது அவருக்கு நல்ல வருவாயை பெற்று தந்தது. எனவே Ninthmotion, மோஷன் என்ற பெயரில் ஒரு அனிமேஷன் நிறுவனத்தை தொடங்கினார். இவரது அனிமேஷன் நிறுவனம் பிபிசி ஸ்டுடியோஸ் போன்ற உலகின் முன்னணி நிறுவனங்களுக்கு எல்லாம் ப்ராஜெக்டுகளை செய்து தந்துள்ளது.

இந்த பணி அனுபவத்தின் மூலம் DooGraphics என்ற ஒரு தளத்தையும் இவர் உருவாக்கினார். இது கேன்வாவை போன்ற ஒரு தளமாகும். கிட்டத்தட்ட ஆறு மாதங்களிலேயே DooGraphics தளத்தில் சுமார் 10,000 பயனாளர்கள் இணைந்து பயன்பெற தொடங்கினர். தற்போது DooGraphics சுமார் ஒரு ஒரு லட்சம் பயனாளர்களை கொண்டுள்ளது. சுமார் 1000 பேர் இதன் மூலம் வேலை வாய்ப்பினை பெற்றுள்ளனர். இந்த நிறுவனம் ஆண்டுக்கு 2 கோடி ரூபாய் வருமானம் ஈட்டுகிறது.

தான் கஷ்டப்பட்டு வளர்ந்த கிராமத்தில் இவர் தான் இப்போது ஹீரோ. அண்மையில் கூட இவர் ஷார்க் டேங்க் இந்தியா நிகழ்ச்சியில் கலந்து கொண்டு அமன் குப்தாவிடமிருந்து ஒரு கோடி ரூபாய் அளவிலான முதலீடுகளை ஈர்த்தார்.

Story written by: Devika