பெங்களூரு: RCB அணியை வாங்குகிறாரா கௌதம் அதானி? மகாபிரபு இங்கயும் வந்துட்டீங்களா!!

இந்தியாவில் ஐபிஎல் கிரிக்கெட் போட்டிகள் மிக முக்கியமான பொழுதுபோக்கு அம்சமாக இருக்கின்றன. ஐபிஎல் கிரிக்கெட் போட்டிகள் கோடிக்கணக்கான ரசிகர்களைக் கொண்டதாக இருக்கிறது. அதுமட்டுமில்லாமல் பல லட்சம் கோடி பிசினஸ் கொண்ட ஒரு பொழுதுபோக்கு நிகழ்வாகவும் தொடர்ந்து நீடிக்கிறது.

ஆண்டுதோறும் ஐபிஎல் போட்டிகள் நடைபெறக்கூடிய அந்த மூன்று மாத காலமும் இந்தியா எங்கும், சமூக வலைத்தளங்கள் எங்கும் இந்த போட்டிகள் குறித்து தான் பரபரப்பாக பேசப்படும். அந்த அளவிற்கு மக்கள் மனதில் இடம் பிடித்து இருக்கக்கூடிய ஒரு பொழுதுபோக்கு அம்சம் தான் ஐபிஎல் போட்டிகள்.

ஐபிஎல் கிரிக்கெட் தொடர் வரலாற்றிலேயே இந்த ஆண்டுதான் முதன் முறையாக பெங்களூர் அணி கோப்பை வென்றது. இந்த நிலையில் தான் பெங்களூர் அணி உரிமையாளரான டியாஜியோ நிறுவனம் அணியை விற்பனை செய்வதாக அறிவித்தது. சுமார் 17,000 கோடிக்கு தற்போது பெங்களூரு ராயல் சேலஞ்சர்ஸ் அணியை வாங்குவதில் கடும் போட்டி நிலவுவதாக தகவல் வெளியாகியுள்ளது.

பெங்களூரு அணியை கையகப்படுத்துவதில் பெரிய தலைகள் இடையே போட்டா போட்டி நிகழ்கிறது. சீரம் இன்ஸ்டிட்யூட் நிறுவனத்தின் அடர் பூனவல்லா எப்படியாவது ராயல் சேலஞ்சர்ஸ் பெங்களூர் ஐபிஎல் அணியை கைப்பற்றி விட வேண்டும் என்பதில் மிக தீவிரமாக இருக்கிறார். ஆனால் இவருடன் வேறு சில முக்கியமான தலைகளும் ஐபிஎல் பெங்களூர் அணியை வாங்கும் போட்டியில் தீவிரமாக இறங்கி இருக்கின்றன.

அதானி குழுமத்தின் கௌதம் அதானி, ஜேஎஸ்டபிள்யூ குழுமத்தின் பார்த் ஜிண்டால் மற்றும் அமெரிக்காவை சேர்ந்த இரண்டு ஈக்விட்டி நிறுவனங்கள் பெங்களூரு அணியை வாங்குவதில் மிகவும் ஆர்வமாக இருக்கின்றன. இதில் ஜேஎஸ்டபிள்யூ குழுமத்தின் பார்த் ஜிண்டால் டெல்லி கேப்பிடல்ஸ் அணியின் தற்போதைய இணை உரிமையாளராக இருக்கிறார். இருந்தாலும் ஆர்சிபி அணியை முழுமையாக கைப்பற்றுவதில் கவனம் செலுத்துகிறார்.

கௌதம் அதானியை பொறுத்தவரை பல ஆண்டுகளாகவே ஐபிஎல் அணியை வாங்குவதில் ஆர்வம் கொண்டிருக்கிறார். ஏற்கனவே 2022 ஆம் ஆண்டிலேயே குஜராத் டைடன்ஸ் ஐபிஎல் அணியை வாங்க முயற்சி செய்தது அதானி குழுமம். ஆனால் அப்போது அந்த நிறுவனத்தால் குஜராத் டைடன்ஸ் அணியை கைப்பற்ற முடியவில்லை. ஆனால் மகளிர் ஐபிஎல் போட்டியில் குஜராத் அணியை சொந்தமாக வைத்துள்ளது.

எப்படியாவது ஆண்கள் பிரிவில் ஒரு ஐபிஎல் அணியை வாங்கி விட வேண்டும் என்பதில் அதானி குழுமம் கவனம் செலுத்தி வருவதால் பெங்களூரு அணியை வாங்குவதற்கான அனைத்து முயற்சிகளையும் கையில் எடுத்துள்ளது. இந்தியாவில் அம்பானி, சன் குழுமம் என முன்னணி தொழில் குழுமங்கள் அனைத்துமே தங்களுக்கு சொந்தமானதாக ஒரு ஐபிஎல் அணியை வைத்திருக்கின்றன. எனவே அதானிக்கு ஒரு ஐபிஎல் அணியை சொந்தமாக வைத்திருப்பது ஒரு அந்தஸ்தாகவும் பார்க்கப்படுகிறது.