என்னது கௌதம் அதானியோட சம்பளம் இவ்வளவுதானா?..

இந்தியாவில் அம்பானி குடும்பத்திற்கு பிறகு மிகப்பெரிய தொழில் சாம்ராஜ்யமாக வளர்ந்து நிற்கிறது அதானி குழுமம்.

இதன் மூலம் இந்தியாவின் இரண்டாவது பெரும் பணக்காரராக உருவெடுத்துள்ளார் கௌதம் அதானி. ப்ளூம்பெர்க் தளம் வெளியிட்டுள்ள தகவலின் அடிப்படையில் கௌதம் அதானியின் நிகர சொத்து மதிப்பு 106 பில்லியன் அமெரிக்க டாலர்கள் ஆகும். இந்திய ரூபாயின் மதிப்பில் இது சுமார் 8.8 லட்சம் கோடி ரூபாய் ஆகும்.

அதானி குழுமத்தின் முதன்மை நிறுவனமாக அதானி எண்டர்பிரைசஸ் செயல்படுகிறது. அதானி எண்டர்பிரைசஸ் நிறுவனத்தில் கௌதம் அதானி எவ்வளவு ஊதியம் பெறுகிறார், என்பன உள்ளிட்ட விவரங்கள் தற்போது வெளியாகியுள்ளன. 2024ஆம் நிதியாண்டுக்கான அதானி எண்டர்பிரைசஸ் நிறுவனத்தின் நிதி அறிக்கை வெளியாகியுள்ளது.

இதில் யாருக்கெல்லாம் எவ்வளவு ஊதியம் வழங்கப்பட்டது என்ற தகவல் வெளியாகியுள்ளது. இதன்படி அதானி எண்டர்பிரைசஸ் தலைவரான கௌதம் அதானி 2024ஆம் நிதியாண்டில் 2.46 கோடி ரூபாயை மட்டுமே ஊதியமாக பெற்றுள்ளார்.

இது கடந்த ஆண்டு பெற்ற ஊதியத்தை விட 3 சதவீதம் அதிகம். 2023 ஆம் நிதியாண்டில் 2.39 கோடி ரூபாயை ஊதியமாக பெற்ற கௌதம் அதானி அதை விட 3 சதவிகிதம் கூடுதலாக 2.46 கோடி ரூபாயை ஊதியமாக பெற்றுள்ளார். இதில் 27 லட்சம் ரூபாய் அவருக்கான அலோவென்ஸ் மற்றும் பிற பலன்களாக வழங்கப்பட்டுள்ளன.

இருப்பினும் அதானி எண்டர்பிரைசஸில் அதிக ஊதியம் பெற்ற பெரும் நபர் என்ற பெயர்கூட கெளதம் அதானிக்கு இல்லை. ஏனெனில் அதானி எண்டர்பிரைசஸ் நிறுவனத்தில் அதிக ஊதியம் பெறக்கூடிய நபராக வினய் பிரகாஷ் என்பவர் இருக்கிறார். அதானி எண்டர்பிரைசஸின் தலைமை செயல் அதிகாரியாக செயல்பட்டு வருபவர் வினய் பிரகாஷ்.

2024ஆம் நிதியாண்டில் இவரது மொத்த ஊதியம் 89.37 கோடி ரூபாய் ஆகும். இதில் வினய் பிரகாஷின் ஊதியம் 2.54 கோடி தான் ஆனால் அவருக்கு அலோவென்ஸ் மற்றும் பிற பலன்களாக கிடைத்த தொகை மட்டும் 86.83 கோடி ரூபாய் என தெரியவந்துள்ளது.

வினய் பிரகாஷின் நிர்வாக திறமையால் அதானி எண்டர்பிரைசஸ் கணிசமான வளர்ச்சியை கண்டுள்ளதால் இவருக்கு ஊக்கத்தொகையாக மட்டுமே பல கோடி ரூபாயை வழங்கியதாக அதானி குழுமம் கூறியுள்ளது.

அதே வேளையில் கௌதம் அதானின் இளைய சகோதரரான ராஜேஷ் அதானி 8.37 கோடி ரூபாய் சம்பளத்தையும் , மற்றொரு சகோதரரான பிரணவ் அதானி 6.46 கோடி ரூபாய் சம்பளத்தையும் பெற்றுள்ளனர்.

Story Written by: Devika