ஏஐ, பணிநீக்கம், ஹெச்1பி விசா கட்டுப்பாடு : டெக்கிகளுக்கு மோசமான ஆண்டா 2025?

2025 ஆம் ஆண்டில், உலக நாடுகள் மென்பொருள் பொறியாளர்கள், செயற்கை நுண்ணறிவு நிபுணர்கள், சிப் வடிவமைப்பாளர்கள் மற்றும் இணையப் பாதுகாப்பு வல்லுநர்களை ஈர்க்க தங்கள் குடியேற்ற விதிகள் , விசா கட்டணங்கள், சம்பள வரம்புகள் மற்றும் குடியுரிமைப் பலன்களை மாற்றி அமைத்தன. இந்தக் கொள்கை மாற்றங்கள் இந்தியாவை சேர்ந்த டெக்கிகளுகு சாதகமாகவும் பாதகமாகவும் அமைந்தன.

அமெரிக்கா 2025 இல் ஹெச்1பி விசா அணுகலைக் கடுமையாக்கியது. H-1B திட்ட மாற்றங்கள் முதலாளிகளுக்கு செலவுகளை அதிகரித்து, விண்ணப்பதாரர்களுக்கான கட்டுப்பாடுகளை அதிகப்படுத்தியது. செப்டம்பரில், அதிபர் உத்தரவின் மூலம் H-1B விசா விண்ணப்பங்களுக்கு 100,000 டாலர் கட்டணம் செலுத்த வேண்டும் என்று அறிவிக்கப்பட்டது, இது முந்தைய 2,000-5,000 டாலர் வரம்பை விட மிக அதிகம். இது H-1B திட்டத்தில் நடக்கும் முறைகேடுகளைக் கட்டுப்படுத்தும் என அமெரிக்க அரசு கூறியது.

இது தவிர விசா விண்ணப்பம் செய்பவர்களின் சமூக வலைதள கணக்குகளை கட்டாயம் சோதிக்க வேண்டும் என டிரம்ப் அரசு அமெரிக்க தூதரகங்களுக்கு ஆணையிட்டது. இதனால் ஹெச்1பி விசா மூலம் இந்தியர்கள் அமெரிக்கா சென்று வேலை செய்வது கடுமையானதாக மாறியது. இது ஒரு புறம் என்றால் ஏற்கனவே இந்த விசாவில் அமெரிக்கா சென்றவர்கள் அடிக்கடி பரிசோதனைக்கு ஆளாக்கப்பட்டனர். இதனால் இந்தியர்களின் அமெரிக்க கனவு படிபடியாக கரைந்து வருகிறது.

2025 ஆம் ஆண்டில், பிரிட்டன் திறமையான பணியாளர் வேலைவாய்ப்புகளுக்கான செலவை உயர்த்தியது. ஜூலை 22 முதல் நடைமுறைக்கு வந்த குடிவரவு விதி மாற்றங்கள், பல தொழில்நுட்ப நிறுவனங்கள் பயன்படுத்தும் Skilled Worker விசாக்களின் சம்பள வரம்புகளையும், "நிலையான கட்டணங்களையும்" புதுப்பித்தன. இதனால், பணியமர்த்தல் செலவுகள் அதிகரித்தன.

கனடா தொழில்நுட்பத் திறமைகளுக்கு தொடர்ந்து கதவுகளைத் திறந்து வைத்தாலும், குடிவரவு திட்டத்தை மிகவும் கடுமையான மேலாண்மையின் கீழ் கொண்டுவந்தது. 2025-2027 ஆம் ஆண்டுக்கான குடிவரவுத் திட்டம், நிரந்தர மற்றும் தற்காலிகக் குடியுரிமை பெறுபவர்களுக்கான இலக்குகளை முதன்முறையாக நிர்ணயித்தது. இதில் மாணவர்கள், வெளிநாட்டுப் பணியாளர்கள் அடங்குவர். STEM பிரிவு “எக்ஸ்பிரஸ் என்ட்ரி” அழைப்புகளையும் தொடர்ந்த கனடா, தொழில்நுட்ப வல்லுநர்களுக்கு ஒரு நிலையான இடமாகத் தன்னை நிலைநிறுத்தியது.

ஆஸ்திரேலியா தனது முக்கிய முதலாளிகள் விசாக்களுக்கு (employer-sponsored visa) ஒரு புதிய மாற்று அமைப்பை அறிமுகப்படுத்தியது. "Skills in Demand" விசா (துணைப்பிரிவு 482) செயல்படும் முதலாளிகள் சிகப்பு வழியாக பட்டியலிடப்பட்டது. மே 2025 இல் அதிகாரப்பூர்வ வழிகாட்டுதல்கள் புதுப்பிக்கப்பட்டன. இது பழைய "Temporary Skill Shortage" கட்டமைப்பை மாற்றி, புதிய அமைப்பின் கீழ் பணியமர்த்தல் நடவடிக்கைகளை கொண்டுவந்தது.

ஐக்கிய அரபு எமிரேட்ஸ், நிபுணர்கள் மற்றும் திறமையாளர்களை இலக்காகக் கொண்ட புதிய வருகை விசா வகைகளை அறிமுகப்படுத்தியது. செப்டம்பர் 2025 இல், அடையாள, குடியுரிமை, சுங்க மற்றும் துறைமுகப் பாதுகாப்புக்கான கூட்டாட்சி ஆணையம் (ICP) நான்கு புதிய வருகை விசா வகைகளைச் சேர்த்ததுடன், தற்போதுள்ள விசாக்களின் நிபந்தனைகளையும் திருத்தியது. இத்திட்டம், ஐக்கிய அரபு எமிரேட்ஸின் நீண்டகால கோல்டன் விசா திட்டத்துடன் இணைந்து செயல்படுகிறது.

2025 ஆம் ஆண்டில், சவுதி அரேபியா உயர்நிலைத் தொழில்நுட்பத் திறமைகளை ஈர்ப்பதற்கு குடியுரிமைச் சலுகைகளைப் பயன்படுத்தியது. உள்நாட்டுத் தொழில்நுட்பச் சூழலை உருவாக்குவதற்கான பரந்த முயற்சியின் ஒரு பகுதியாக, தேர்ந்தெடுக்கப்பட்ட நிபுணர்கள் மற்றும் ஆராய்ச்சியாளர்களுக்கு பிரீமியம் குடியுரிமை அந்தஸ்து வழங்கப்பட்டது. இந்த அணுகுமுறை குடிவரவுப் பலன்களைத் துறைசார் முன்னுரிமைகளுடன் நேரடியாக இணைத்தது.

ரியாத்தில் நடைபெற்ற LEAP தொழில்நுட்பக் கருத்தரங்கில், சவுதி அரேபியாவின் தகவல் தொடர்பு மற்றும் தகவல் தொழில்நுட்ப அமைச்சகம் ஒரு முக்கிய அறிவிப்பை வெளியிட்டது. 2025 பிப்ரவரியில், தொழில்நுட்பத் துறையில் உள்ள 685 சிறந்த திறமையாளர்கள் மற்றும் ஆராய்ச்சியாளர்கள் சிறப்புத் திறமைத் திட்டத்தின் கீழ் பிரீமியம் குடியுரிமைகளைப் பெற்றனர்.

அமெரிக்கா வேண்டாம் என விரட்டினாலும் இந்திய டெக்கிகளுக்கு மற்ற நாடுகள் கதவுகளை திறந்தன. அதே வேளையில் கூகுள், மைக்ரோசாப்ட், டிசிஎஸ் உள்ளிட்ட நிறுவனங்கள் இந்த ஆண்டில் மட்டும் சுமார் 2 லட்சம் பேரை பணிநீக்கம் செய்து பணிபாதுகாப்பு குறித்த கேள்விகளை வலுவாக எழுப்பியுள்ளன. அது ஒரு புறம் என்றால் ஏஐ வருகையும் பெரும் சவாலாக மாறி இருக்கிறது.

2025 ஆம் ஆண்டு சில நாடுகள் உள்நாட்டு நலன்களைக் கருதி குடியேற்ற தடைகளை உயர்த்தின, மற்றவை வேகம், ஸ்திரத்தன்மை மற்றும் சலுகைகளைப் பயன்படுத்தி திறமையாளர்களை ஈர்த்தன. தொழில்நுட்ப வல்லுநர்களுக்கு வாய்ப்புகள் அதிகரித்தாலும், சிக்கல்களும் கூடின.