HDFC கிரெடிட் கார்ட் வாடிக்கையாளர்களுக்கு பெரிய ஷாக்! ரூ. 3000 வரை கட்டண உயர்வு ஆகஸ்ட் 1 முதல் அமல்!

கிரெடிட் கார்டைப் பயன்படுத்தும் வாடிக்கையாளர்களுக்கு HDFC பேங்க் அதிர்ச்சி தரும் தகவலைத் தெரிவித்துள்ளது. வருகின்ற ஆகஸ்ட் 1-ஆம் தேதி முதல், வாடகை, எரிபொருள் மற்றும் பிற பயன்பாட்டு கட்டணங்கள் உள்ளிட்ட பல்வேறு பரிவர்த்தனைகளுக்கான கட்டணங்களில் மாற்றங்கள் செய்யப்பட்டுள்ளன. இந்த மாற்றங்கள் உங்கள் கிரெடிட் கார்டு செலவுகளில் எந்த அளவுக்கு தாக்கத்தை ஏற்படுத்துகிறது என்பதைப் பற்றி தெரிந்துகொள்வது அவசியம்.

PayTM, CRED, MobiKwik, Cheq மூலம் செய்யப்படும் வாடகை பரிவர்த்தனைகளுக்கு 1% கட்டணம் விதிக்கப்படும். இந்த கட்டணம் ஒரு பரிவர்த்தனைக்கு அதிகபட்சமாக ரூ.3000 ஆகும்.

பொதுப்பயன்பாட்டு பில்கள் (Utility bill): ரூ.50,000-க்கும் குறைவான தொகையுள்ள பரிவர்த்தனைகள் இதனால் பாதிக்கப்படாது. ஆனால் அதற்கு மேற்பட்ட தொகைக்கு 1 % கட்டணம் விதிக்கப்படும். அதிகபட்ச கட்டணமாக ரூ.3000 வரை இருக்கலாம். காப்பீடு தொடர்பான பரிவர்த்தனைகள் இந்த புதிய கட்டணங்களுக்கு உட்படாது.

கல்வி கட்டணங்கள்: CRED மற்றும் PayTM மூலம் செய்யப்படும் கல்வி கட்டணங்களுக்கு 1 % கட்டணம் விதிக்கப்படும். கல்வி நிறுவனங்களின் வலைத்தளங்கள் அல்லது POS இயந்திரங்கள் மூலம் செய்யப்படும் கட்டணங்களுக்கு எந்தவித கட்டணமும் இல்லை. சர்வதேச கல்வி கட்டணங்களுக்கு இந்தப் புதிய கட்டணத்தில் இருந்து விலக்கு அளிக்கப்படுகிறது.

சர்வதேச பரிவர்த்தனைகள்: அனைத்து கிராஸ்-கரன்சி பரிவர்த்தனைகளுக்கும் 3.5% மார்க்அப் கட்டணத்தை HDFC பேங்க் விதிக்கவுள்ளது. வெளிநாட்டில் அடிக்கடி பொருட்களை வாங்கி பணம் செலுத்தும் வாடிக்கையாளர்களை இது பாதிக்கும்.

எரிபொருள் பரிவர்த்தனைகள்: ரூ.15,000-க்கும் மேற்பட்ட தொகைகளுக்கு 1 % கட்டணம் விதிக்கப்படும். அதிகபட்சம் இந்தக் கட்டணம் ரூ.3000 வரை இருக்கும்.

செயலாக்கக் கட்டணம்: Easy-EMI வசதியைப் பயன்படுத்துபவர்களுக்கு, ஆன்லைன் மற்றும் ஆஃப்லைன் ஸ்டோர்களில் வாங்கும் பொருட்களை EMI-களாக மாற்றுவதற்கு, 299 ரூபாய் வரை செயலாக்கக் கட்டணம் வசூலிக்கப்படும்.

ரிவார்டுகள்: HDFC வங்கி, Tata Neu Infinity மற்றும் Tata Neu Plus கிரெடிட் கார்டு வைத்திருப்பவர்களுக்கான ரிவார்டுகளை மேம்படுத்தியுள்ளது. Tata Neu Infinity HDFC வங்கி கிரெடிட் கார்டு பயனர்கள் Tata Neu UPI ஐடி மூலம் செய்யப்படும் UPI பரிவர்த்தனைகளில் 1.5 % NeuCoins-ஐப் பெறுவார்கள். அதே நேரத்தில் பிற UPI ஐடிகளுடன் பரிவர்த்தனை செய்தால் 0.50 % NeuCoins கிடைக்கும்.

Tata Neu Plus HDFC வங்கி கிரெடிட் கார்டு வைத்திருப்பவர்கள், Tata Neu UPI ஐடியுடன் UPI பரிவர்த்தனை செய்யும் போது 1% NeuCoins மற்றும் பிற UPI ஐடிகளைப் பயன்படுத்தி பரிவர்த்தனை செய்யும் போது 0.25% NeuCoins பெறுவார்கள்.