HDFC கிரெடிட் கார்டு வைத்துள்ளீர்களா.. முதல்ல இதை படிங்க..!!

சென்னை: இந்தியாவில் பல்வேறு வங்கிகள் தங்களது கிரெடிட் மற்றும் டெபிட் கார்டுகளுக்கான விதிமுறைகளை மாற்றியுள்ளன. இந்த மாற்றங்கள் ஆகஸ்ட், செப்டம்பர் மற்றும் அக்டோபர் 2024 முதல் நடைமுறைக்கு வர உள்ளதால் மக்கள் அனைவரும், உஷார் கிரெடிட் கார்டு மூலம் பண பரிமாற்றத்தை செய்யுமாறு கேட்டுக்கொள்ளப்படுகிறார்கள். இந்த நிலையில் நாட்டின் முன்னணி வங்கிகளில் ஒன்றாக இருக்கும் ஹெச்டிஎப்சி வங்கி அறிவித்துள்ள புதிய மாற்றங்களை இப்போது பார்ப்போம்.

HDFC வங்கி கிரெடிட் கார்டுகள் வைத்துள்ள அனைவரும் இதுவரையில் தாங்கள் செய்து வந்த பல்வேறு பேமெண்ட்களில் பல சலுகைகளைப் பெற்றிருக்கக் கூடும், ஆனால் இனி வரும் நாட்களில் சில சலுகைகள் குறைக்கப்பட உள்ளது.

வாடகை பேமெண்ட்: ஆகஸ்ட் 1 ஆம் தேதி முதல் ஹெச்டிஎப்சி வங்கி வாடிக்கையாளர்கள் CRED, PayTM, Cheq, MobiKwik, Freecharge போன்ற சேவைகளைப் பயன்படுத்தி வாடகை செலுத்தினால், பரிவர்த்தனைத் தொகையில் 1% கட்டணம் வசூலிக்கப்படும். அதிகபட்சமாக ஒரு பரிவர்த்தனைக்கு ரூ.3000 வரை வசூலிக்கப்படும் எனவும் அறிவிக்கப்பட்டு உள்ளது.

பெட்ரோல் பேமெண்ட்:

கன்ஸ்யூமர் கிரெடிட் கார்டு: ஒரு சிங்கிள் பரிமாற்றத்தில் ரூ.15,000-க்கும் குறைவாக பெட்ரோல் அல்லது டீசல் வாங்கினால் கூடுதல் கட்டணம் இல்லை. ஆனால் ரூ.15,000-க்கும் அதிகமாக வாங்கினால் மொத்தத் தொகையில் 1% கட்டணம் விதிக்கப்படும். அதிகபட்சமாக ஒரு பரிவர்த்தனைக்கு ரூ.3000 வரை விதிக்கப்படும்.

வணிக கார்டுகள்: ஒரு பரிவர்த்தனைக்கு ரூ.30,000-க்கும் குறைவாக பெட்ரோல் வாங்கினால் கூடுதல் கட்டணம் இல்லை. ஆனால் ரூ.30,000-க்கும் அதிகமாக வாங்கினால் மொத்தத் தொகையில் 1% கட்டணம் விதிக்கப்படும். அதிகபட்சமாக ஒரு பரிவர்த்தனைக்கு ரூ.3000 வரை விதிக்கப்படும்.

சர்வதேச பரிமாற்றங்கள்: சர்வதேச அல்லது வெளிநாட்டு கிரெடிட் கார்டு பரிவர்த்தனைக்கு 3.5% கூடுதல் கட்டணம் விதிக்கப்படும். இன்ஃபினியா, இன்ஃபினியா (மெட்டல் எடிஷன்), டைனர்ஸ் பிளாக், டைனர்ஸ் பிளாக் (மெட்டல் எடிஷன்), பிஸ் பிளாக் மெட்டல் கார்டு, ரெகாலியா கோல்ட், பிஸ் பவர், டாட்டா நியூ இன்ஃபினிட்டி HDFC வங்கி கார்டுகளுக்கு ஏற்கனவே இருக்கும் 2% கட்டணம் தொடரும். இதோடு 6E ரிவார்ட்ஸ் இண்டிகோ எக்ஸ்எல் கார்டுக்கு 2.5% கட்டணம் தொடரும்.

ஹெச்டிஎப்சி வங்கி கிரெடிட் கார்டு லாயல்டி திட்டம்: சில கிரெடிட் கார்டுகளுக்கான லாயல்டி திட்டத்தை ஹெச்டிஎப்சி வங்கி மாற்றியுள்ளது. புதிய விதிமுறைகள் செப்டம்பர் 1, 2024 முதல் நடைமுறைக்கு வரும். இந்த மாற்றங்கள் காரணமாக கிரெடிட் கார்டு பயனர்கள் தங்களின் செலவு செய்யும் பழக்கத்தை மறுபரிசீலனை செய்ய வேண்டியிருக்கும்.