குளு குளு பிஸ்னஸ் பிளான்.. ஹிந்துஸ்தான் யுனிலீவர் வெளியிட்ட அடேங்கப்பா அறிவிப்பு

இந்தியாவில் முன்னணி வர்த்தக சாம்ராஜ்ஜியங்கள் தனது முக்கியமான வர்த்தக பிரிவை தனியாகப் பிரித்து பங்குச்சந்தையில் முதலீட்டாளர்களின் கூடுதல் முதலீட்களையும் ஈர்க்கவும், நிறுவனத்தின் மதிப்பை அதிகரிக்கவும் சமீப காலமாக டீமெர்ஜிங் பணிகளை தீவிரப்படுத்தியுள்ளது. இதில் முதல் முறையாக பெரிய அளவில் வெற்றி அடைந்தது முகேஷ் அம்பானியின் ஜியோ பைனான்சியல் சர்வீசஸ் நிறுவனம் தான்.

ஜியோ பைனான்சியல் சர்வீசஸ் நிறுவனத்தின் வெற்றியை தொடர்ந்து பல முன்னணி வர்த்தக சாம்ராஜ்ஜியங்கள் Demerging திட்டத்தில் குதித்துள்ளது. அதில் முக்கியமாக ஐடிசி தனது ஹோட்டல் வர்த்தகத்தை தனியாக பிரிக்க உள்ளது, இதன் வழியில் ஹிந்துஸ்தான் யுனிலீவர் தற்போது முக்கியான முடிவை எடுத்துள்ளது.

ஹிந்துஸ்தான் யுனிலீவர் லிமிடெட் (HUL) தனது ஐஸ்கிரீம் பிரிவை தனியாக பிரித்து பட்டியலிடும் முக்கியமான முடிவை இன்று அறிவித்துள்ளது. இந்த முடிவு ஹிந்துஸ்தான் யுனிலீவர் நிர்வாகத்தை நியமிக்கப்பட்ட ஒரு தனிப்பட்ட குழுவால் ஆய்வு செய்யப்பட்ட பின்னர் எடுக்கப்பட்டது. இந்த நடவடிக்கை நிறுவனத்தின் நீண்ட கால வளர்ச்சி மற்றும் நிறுவனத்தின் மதிப்பை அதிகரிப்பதற்குப் பயனுள்ளதாக இருக்கும் என்று இக்குழு கண்டறிந்துள்ளது.

ஹிந்துஸ்தான் யுனிலீவர் நிறுவனத்தின் கீழ் இந்தியாவில் குவாலிட்டி வால்ஸ், கார்னெட்டோ மற்றும் மேக்னம் உள்ளிட்ட ஐஸ்கிரீம் பிராண்டுகள் உள்ளது. இந்த 3 பிராண்டுகள் HUL நிறுவனத்தின் வருடாந்தி மொத்த விற்பனையில் சுமார் 3 சதவீத பங்கீட்டை வைத்துள்ளது. அதாவது ஹிந்துஸ்தான் யுனிலீவர் -ன் மொத்த ரூ.60,000 கோடி விற்பனையில் ஐஸ்கிரீம் மட்டும் 1800 கோடி ரூபாய்க்கு விற்பனை செய்கிறது.

ஐஸ்கிரீம் வணிகம் HUL இன் மொத்த வருவாயில் சுமார் 3% மட்டுமே பங்களித்தாலும், அதிக வளர்ச்சி கொண்ட பிரிவாக உள்ளது. இப்பிரிவின் நீண்ட கால வளர்ச்சிக்கு ஏதுவாக சிறப்பு குளிர் சங்கிலி உள்கட்டமைப்பு மற்றும் தனித்துவமான விநியோக சேனல்கள் கொண்டுள்ளது.

ஹிந்துஸ்தான் யுனிலீவர் ஐஸ்கிரீம் வணிகத்தை பிரிப்பதன் மூலம், இதன் பிற முக்கியமான அழகு, உணவு, சுகாதாரம் மற்றும் வெல்னஸ் போன்ற அதன் முக்கிய வணிகப் பகுதிகளில் அதிக கவனம் செலுத்த முடியும். மேலும் ஐஸ்கிரீம் வணிகத்தை நிர்வாகம் செய்ய தனியாக ஒரு நிர்வாக குழுவை அமைக்க உள்ளது.

ஹிந்துஸ்தான் யுனிலீவர் ஐஸ்கிரீம் வணிகத்தை எப்படி, எப்போது பிரிக்கும் என்பது இனி தான் திட்டமிடும். ஆனால் இது ஹிந்துஸ்தான் யுனிலீவர் முதலீட்டாளர்கள் கவனிக்க வேண்டிய முக்கியமான விஷயமாக உள்ளது.