ஹோம் லோன் வாங்கி இருக்கீங்களா? EMI ரூ.3000 வரை குறையப்போகுது.. நிபுணர்கள் சொன்ன குட் நியூஸ்!

பலருக்கும் தங்களுடைய கனவு வீட்டை எப்படியாவது கட்டிவிட வேண்டும் என்ற எண்ணம் இருக்கும். அதற்காக பட்ஜெட் இல்லாதவர்கள் நாடுவது வங்கி கடன்களை தான். இந்நிலையில் வங்கி கடன் வாங்கியவர்களுக்கு இனிப்பான செய்தி ஒன்று 2025-ஆம் ஆண்டில் வெளியாகும் என்று எதிர்பார்க்கப்படுகிறது. 2025-ஆம் ஆண்டின் பிப்ரவரி மாதத்தில் வீட்டுக் கடன் வாங்கியவர்களுக்கு நிவாரணம் கிடைக்கும் வகையில் ரெப்போ வட்டி விகிதம் குறைய வாய்ப்பிருப்பதாக கூறப்படுகிறது. இதன் மூலம் வங்கிகளும் கடனுக்கு வழங்கும் வட்டி விகிதத்தை குறைக்கும்.

2025-ஆம் ஆண்டின் பிப்ரவரி மாதத்தில் நடக்கவிருக்கும் நிதி கொள்கை கூட்டத்தில் ரிசர்வ் வங்கி ரெப்போ ரேட் விகிதத்தை குறைந்தபட்சம் 25 அடிப்படை புள்ளிகள் குறைக்க வாய்ப்புள்ளதாக நிபுணர்கள் கருதுகின்றனர். 2025-ஆம் ஆண்டில் பிப்ரவரி, ஏப்ரல், ஜூன், ஆகஸ்ட், அக்டோபர் மற்றும் டிசம்பர் மாதங்களில் சுமார் 6 நிதி கொள்கை கூட்டங்களை நடத்தவுள்ளது.

இதில் சுமார் நான்கு கூட்டங்களில்.. ஒவ்வொரு முறைக்கும் 25 அடிப்படை புள்ளிகள் வீதம் மொத்தம் 100 அடிப்படை புள்ளிகள் ரெப்போ விகிதம் குறைக்கப்படும் என்று நிபுணர்கள் கருத்துள்ளனர். இந்த ஆண்டில் RBI-யால் 100 அடிப்படை புள்ளிகள் ரெப்போ விகிதம் குறைக்கப்பட்டால் கடன் வாங்குபவர்களுக்கு அது நிவாரணம் அளிக்கும் என்று எதிர்பார்க்கப்படுகிறது.

டிசம்பர் 6-ஆம் தேதி அன்று நடந்த பணவியல் கொள்கை மதிப்பாய்வில் ரிசர்வ் வங்கி 11-வது முறையாக அதன் பெஞ்சு மார்க் விகிதத்தை 6.5 சதவீதமாக அப்படியே வைத்திருக்க முடிவு செய்துள்ளது. ஆனால் 2025-ஆம் ஆண்டு ரெப்போ வட்டி விகிதம் குறையும் என்று ஆய்வாளர்கள் கருதுகின்றனர். பிப்ரவரி மற்றும் ஏப்ரல் மாதங்களில் ஆர்பிஐ சுமார் 25 அடிப்படை புள்ளிகள் வீதம் 2 வட்டி விகிதக் குறிப்புகளை செயல்படுத்தலாம் என்று எதிர்பார்க்கப்படுவதாக தெரிவித்துள்ளது. இது ரெப்போ விகிதத்தை 6 சதவீதம் குறைக்கும்.

ஜப்பானிய முதலீட்டு வங்கியான நோமுரா 2025-ஆம் ஆண்டில் ஆர்பிஐ 100 அடிப்படை புள்ளிகள் வரை வட்டி விகிதத்தை குறைக்கும் என்று எதிர்பார்க்கிறது. இது கடன் வாங்கியவர்களுக்கு நிவாரணத்தை வழங்கும்.

100 அடிப்படை புள்ளிகள் ரெப்போ ரேட் குறைந்தால் வீட்டு கடன் இஎம்ஐ வெகுவாக குறையும். தற்போது முன்னணி வங்கிகள் வீட்டுக் கடனுக்கு 9.75 சதவீதம் வரை வட்டி வசூலிக்கின்றன. உதாரணமாக 9.25% வட்டி விகிதத்தில் 20 ஆண்டுகளுக்கு ஒருவர் ரூ.50 லட்சம் கடன் வாங்கி இருக்கிறார் என்று வைத்துக்கொள்வோம். அதற்கு மாதம் 45,793 ரூபாய் இஎம்ஐ செலுத்தி வருகிறார் என்றால் வட்டி விகிதம் 1 சதவீதம் குறைந்தால் இஎம்ஐ தொகை ரூ.42,603 ஆகக் குறையும். இதன் மூலம் மாதம் ரூ.3190 வரை சேமிக்கலாம்.