இந்தியர்களின் சேமிப்பு கரைகிறது.. கடன் அதிகரிக்கிறது.. வெளியான ஆய்வறிக்கை!

விலைவாசி உயர்வும், மக்களின் வருமானத்தில் ஏற்பட்ட சரிவு இந்திய மக்களை எந்த அளவுக்குப் பாதித்துள்ளது என்பது பொதுத்தேர்தலுக்கு முன்பு வெளிவந்துள்ளது மிகவும் முக்கியமானதாகப் பார்க்கப்படுகிறது.

இந்தியா குடும்பங்களின் கடன் அளவு 2023 (household debt level) டிசம்பர் காலாண்டில் நாட்டின் மொத்த உள்நாட்டு உற்பத்தி (GDP) மதிப்பில் 40 சதவீதத்தை எட்டியுள்ளதாக மோதிலால் ஒஸ்வால் நிறுவனத்தின் ஆய்வறிக்கை தெரிவிக்கிறது. இது கவலைக்குரிய விஷயம் மட்டும் அல்லாமல் வரலாற்றில் முதல் முறையாக நாட்டு மக்களின் கடன் அளவு 40 சதவீதம் வரையில் உயர்ந்துள்ளது

அதே நேரத்தில், குடும்பங்களின் நிதி சேமிப்பு மொத்த உள்நாட்டு உற்பத்தியில் சுமார் 5 சதவீதமாகச் சரிந்துள்ளது கூடுதல் அதிர்ச்சி அளிக்கும் செயலாக மாறியுள்ளது.

பாதுகாப்பற்ற கடன்களின் வளர்ச்சி: மோதிலால் ஒஸ்வால் நிறுவனத்தின் ஆய்வறிக்கையில், குடும்ப கடன்களில், பாதுகாப்பற்ற தனிநபர் கடன்கள் மிக வேகமாக வளர்ச்சியடைந்துள்ளதாகவும், இதனைத் தொடர்ந்து வீட்டுக் கடன், விவசாயக் கடன் மற்றும் வியாபாரக் கடன்கள் அதிகரித்துள்ளதாகவும் தெரிவித்துள்ளது.

சேமிப்பு ஓர் பக்கம் - கடன் இன்னொரு பக்கம்: கடந்த நிதிய ஆண்டின் முதல் ஒன்பது மாதங்களில் அதாவது மார்ச் 2023 முதல் டிசம்பர் 2023 வரையிலான காலகட்டத்தில் இந்தியக் குடும்பங்களின் மொத்த நிதி சேமிப்பு (gross financial savings) 2022-23 ம் ஆண்டின் இதே காலகட்டத்துடன் ஒப்பிடும்போது 10.5 சதவீதத்திலிருந்து 10.8 சதவீதம் கணிசமாக அதிகரித்துள்ளது.

இதே காலகட்டத்தில், இந்தியக் குடும்பங்களின் மொத்த கடன்களும் 5.5 சதவீதத்திலிருந்து 5.8 சதவீதமாக அதிகரித்துள்ளன என்று மோதிலால் ஒஸ்வால் நிறுவனத்தின் ஆய்வறிக்கை சுட்டிக்காட்டுகிறது.

2022-23 ம் ஆண்டில் இந்திய குடும்பங்களின் மொத்த கடன் வாங்குதல் (annual borrowings) அளவீடு, உள்நாட்டு உற்பத்தியில் 5.8 சதவீதமாக உயர்ந்துள்ளது. இது சுதந்திர இந்தியாவில் இரண்டாவது அதிகப்படியான உயர்வாகும்.

சேமிப்பு பத்தாண்டுகளின் சரிவு: 2022-23ம் ஆண்டில் இந்திய குடும்பங்களின் கைவச சேமிப்பு பத்தாண்டுகளின் உச்சத்தை எட்டிய போதிலும், அவற்றின் மொத்த சேமிப்பு ஜிடிபி-யில் 18.4 சதவீதமாக ஆறு ஆண்டுகளின் சரிவைச் சந்தித்துள்ளது.

இந்தியாவின் மொத்த உள்நாட்டு சேமிப்பு (GDS) 2013-14 மற்றும் 2018-19 க்கு இடைப்பட்ட காலத்தில் பதிவான 31-32 சதவீத வரம்பை விட 30.2 சதவீதம் என்ற குறைவான அளவீடு பதிவாகியுள்ளது. இந்தியக் குடும்பங்களின் நிதி சேமிப்பு விகிதம் "கவலைக்கிடமான அளவுக்கு" சரிந்துள்ளதாக அறிக்கை வலியுறுத்துகிறது.

நிதி நெருக்கடிக்கான அபாயம்: குடும்பங்களின் நிதி சேமிப்பு (HHNFS) என்பது அவற்றின் மொத்த நிதி சேமிப்பு மற்றும் நிதி கடன்களுக்கு இடையே உள்ள சமநிலையைப் பொறுத்தே அமைகிறது. இந்த சமநிலையில் ஏற்படும் சரிவு காரணமாக குடும்பங்கள் நிதி நெருக்கடியை எதிர்கொள்ளும் அபாயம் உருவாகும்.