பெங்களூரின் டாப் 5 பணக்காரர்கள் இவர்கள் தான்..! 5ல் 2 பேர் இன்போசிஸ் நிறுவனர்..!

பெங்களூர்: புதிதாக தொழில் தொடங்க வேண்டும் என விரும்புபவர்களின் பிரதான தேர்வாக பெங்களூர் நகரம் இருக்கிறது. ஏனெனில் தொழில் தொடங்கி வெற்றி பெற்ற பலரது புகலிடமாக பெங்களூர் தான். அண்மையில் வெளியான ஹாரன் இந்திய பணக்காரர்கள் பட்டியலும் இதனை உறுதிப்படுத்துகிறது.

ஹாரன் இந்திய பணக்காரர்கள் பட்டியலின் படி, தற்போது இந்தியாவில் 334 பில்லினியர்கள் இருக்கின்றனர். இந்த பட்டியலில் இடம்பெற்றுள்ள பெங்களூரில் வசிக்கும் ஐந்து முக்கிய பணக்காரர்கள் யார் என்பது குறித்து நாம் இந்த கட்டுரையில் தெரிந்து கொள்ள போகிறோம்.

1. அசிம் பிரேம்ஜி - ஹாரன் இந்திய பணக்காரர்கள் பட்டியலில் முதல் 10 இடங்களில் இருப்பவர் தான் அசிம் பிரேம்ஜி. விப்ரோ நிறுவனத்தின் முன்னாள் தலைவரான இவர் பெங்களூரில் தான் வசிக்கிறார். இந்திய பணக்காரர்கள் பட்டியலில் இவர் ஒன்பதாவது இடத்தை பிடித்திருக்கிறார். இவரது சொத்து மதிப்பு ஒரு லட்சத்து 90,700 கோடி ரூபாய் ஆகும். கடந்த ஓராண்டில் மட்டும் இவரது சொத்து மதிப்பு 24 சதவீதம் உயர்ந்துள்ளது.

2. இர்ஃபான் ரசாக் - இந்திய பணக்காரர்கள் பட்டியலில் 51ஆவது இடத்தில் இருப்பவர் தான் இர்ஃபான் ரசாக். இவரும் பெங்களூர் வாசி தான். பிரஸ்டீஜ் குழுமத்தின் மேலாண் இயக்குனராக செயல்பட்டு வரக்கூடிய இவருடைய சொத்து மதிப்பு 43600 கோடி ரூபாய் ஆகும். இந்தியாவின் முன்னணி பிராபெர்டி டெவெலப்பராக பிரஸ்டீஜ் குழுமம் இயங்கி வருகிறது. கடந்த ஓராண்டில் மட்டும் இவருடைய சொத்து மதிப்பு 178 சதவீதம் அதிகரித்துள்ளது.

3. நிதின் காமத் - ஸெரோதா நிறுவனத்தின் தலைமை செயல் அதிகாரியான நிதின் காமத் இந்திய பணக்காரர்கள் பட்டியலில் 57ஆவது இடத்தில் இருக்கிறார். இவருடைய சொத்து மதிப்பு 41,000 கோடி ரூபாய் ஆகும். கடந்த ஓராண்டில் சொத்து மதிப்பு 16 சதவீதம் அதிகரித்துள்ளது. இவரும் பெங்களூரில் தான் வசிக்கிறார்.

4. எஸ். கோபாலகிருஷ்ணன் - இந்திய பணக்காரர்கள் பட்டியலில் 62 ஆவது இடத்தை பிடித்திருப்பவர். இன்போசிஸ் நிறுவனத்தின் இணை நிறுவனர்களில் இவரும் ஒருவராவார். இவர் இன்போசிஸ் நிறுவனத்தின் தலைமை செயல் அதிகாரியாக 2007 முதல் 2011 வரை செயல்பட்டு வந்தார். கடந்த ஓராண்டு காலத்தில் இவரின் சொத்து மதிப்பு 24 சதவீதம் அதிகரித்து 38,500 கோடி ரூபாயாக இருக்கிறது.

5. என் ஆர் நாராயணமூர்த்தி - தகவல் தொழில்நுட்பத் துறையில் மிகவும் அறியப்பட்ட ஒரு பெயர்தான் நாராயணமூர்த்தி. இன்போசிஸ் நிறுவனத்தின் இணை நிறுவனரான இவர் இந்திய பணக்காரர்கள் பட்டியில் 69 வது இடத்தில் இருக்கிறார். இவருடைய சொத்து மதிப்பு 36,600 கோடி ஆகும். 1981 முதல் 2020 வரை 21 ஆண்டு காலம் இன்போசிஸ் நிறுவனத்தின் தலைமை செயல் அதிகாரியாக இருந்தவர் தான் நாராயண மூர்த்தி.

இவர்கள் மட்டும் இல்லாமல் ஜிஎம்ஆர் குழுமத்தின் நிறுவனர் ஜி எம் ராவ், மணிபால் மருத்துவக் குழுமத்தின் தலைவர் ரஞ்சன் பை, பயோகான் நிறுவனத்தின் நிறுவனர் கிரண் மசுந்தர் ஷா ஆகியோரும் பணக்காரர்கள் பட்டியலில் இடம் பிடித்துள்ள பெங்களூர்வாசிகள் ஆவர்.