கூரையை பிச்சுகிட்டு கொட்டும் பணம்!! 5 வருஷத்துல ரூ. 6,000 கோடியை ரூ.20,000 கோடியாக மாற்றிய பிசிசிஐ!

இந்தியா கிரிக்கெட் கட்டுப்பாட்டு வாரியமான பிசிசிஐ, தேசிய அளவில் கிரிக்கெட் விளையாட்டினை மேலாண்மை செய்து வரும் ஒரு அமைப்பு. உலகிலேயே சக்திவாய்ந்த ஒரு கிரிக்கெட் அமைப்பாக மட்டுமில்லாமல் நிதி ரீதியாக வலுவான ஒரு அமைப்பாகவும் பிசிசிஐ மாறி இருக்கிறது.

பிசிசிஐயின் ஆண்டு பொது குழு கூட்டம் வரும் 28ஆம் தேதி மும்பையில் நடைபெற இருக்கிறது. பிசிசிஐ யின் புதிய தலைவர் தலைவராக யார் தேர்ந்தெடுக்கப்பட போகிறார் என்பது தான் தற்போது பரபரப்பாக பேசப்பட்டு வருகிறது. இதற்கிடையே பிசிசிஐ-இன் வருமானம் குறித்த தகவல்களை வெளியாகி ரசிகர்களை வாயடைத்து போக செய்திருக்கிறது.

பிசிசிஐ கடந்த ஐந்து ஆண்டுகளில் மட்டும் 14,627 கோடி ரூபாய் வருமானம் ஈட்டியுள்ளது. இதில் கடந்த நிதியாண்டில் மட்டும் 4,193 கோடி ரூபாயை பிசிசிஐ தன்னுடைய கருவூலத்தில் சேர்த்திருக்கிறதாம். இதன் மூலம் பிசிசிஐ இடம் இருக்கக்கூடிய வங்கி இருப்பு மற்றும் ரொக்க இருப்பு உள்ளிட்டவற்றின் மொத்த மதிப்பு 20,686 கோடி ரூபாய் என தகவல்கள் தெரிவிக்கின்றன. cricbuzz இது தொடர்பாக வெளியிட்டுள்ள செய்தியில் இந்த தகவல் வெளியாகியிருக்கிறது.

அனைத்து மாநில பிரிவுகளுக்கும் வழங்க வேண்டிய நிதிகளை வழங்கிவிட்டு மீதமுள்ள தொகை மதிப்பீடு செய்தாலே இத்தனை ஆயிரம் கோடி இருக்கிறதாம். பிசிசிஐ ஆண்டு பொதுக்குழு கூட்டம் நடைபெற இருக்கும் சூழலில் இந்த நிதி சார்ந்த தகவல்கள் வெளியாகி இருக்கின்றன. அதில் 2019 ஆம் ஆண்டிலிருந்து பிசிசிஐயின் வங்கி இருப்பு மற்றும் ரொக்க இருப்பு என்பது 6,059 கோடி ரூபாயாக இருந்து 5 ஆண்டுகளில் அது 20 ,686 கோடி ரூபாய் என அதிகரித்திருப்பதாக தெரிவித்திருக்கிறது.

இதன் மூலம் கடந்த ஐந்து ஆண்டுகளில் மட்டும் பிசிசிஐ அமைப்பு 14 , 627 கோடியை வருமானமாக பெற்றுள்ளது தெரியவந்துள்ளது. பிசிசிஐ அமைப்புக்கு ஐபிஎல் கிரிக்கெட் போட்டிகள் தான் அதிக வருமானத்தை தருகின்றன. பிசிசிஐ வருமான வரியே செலுத்துவதில்லை என்ற விமர்சனம் இருக்கும் நிலையில் சுமார் 3,000 கோடி ரூபாயை வருமான வரி செலுத்துவதற்காகவே ஒதுக்கி வைத்திருப்பதாக தகவல்கள் தெரிவிக்கின்றன.

ஐபிஎல் போட்டிகள் மூலம் வந்த வருமானம், ஐசிசி எனப்படும் சர்வதேச கிரிக்கெட் கவுன்சில் பகிர்ந்த வருமானம் ஆகியவற்றை தாண்டி வங்கிகளில் வைத்திருக்கும் ஃபிக்சட் டெபாசிட்களின் மூலம் மட்டுமே 986 கோடி ரூபாயை வருமானமாக பெற்றுள்ளது பிசிசிஐ.

1928ஆம் ஆண்டு மெட்ராஸில் தொடங்கப்பட்டது தான் பிசிசிஐ. சுதந்திரமான ஒரு அமைப்பாக இது செயல்படுகிறது. சர்வதேச போட்டிகளுக்கு ஆண்கள் கிரிக்கெட் அணி, மகளிர் கிரிக்கெட் அணி, 19 வயதுக்கு உட்பட்டோருக்கான ஆண்கள் மற்றும் மகளிர் கிரிக்கெட் அணிகளை நிர்வாகம் செய்கிறது.