லிமிட் என்ன.. உங்கள் ஆதார் கார்டை எத்தனை முறை புதுப்பிக்கலாம்?

சென்னை: நாம் முக்கியமாக வங்கி சேவைகளிலும் பிற இடங்களிலும் பயன்படுத்தப்படும் ஆதார் கார்டை எத்தனை முறை புதுப்பிக்க முடியும் என்பதை பற்றி இந்த பதிவில் பார்ப்போம்.

நம் நாட்டில் பயன்படுத்தப்படும் முக்கியமான ஆவணங்களில் ஆதார் கார்டும் ஒன்று. ஆதார் கார்டு பேங்க், மருத்துவமனைகள், போஸ்ட் ஆபீஸ், பத்திரப்பதிவு அலுவலகம் மற்றும் பல இடங்களில் முக்கிய பங்கு வகிக்கிறது. மேலும் கேஒய்சி சரி பார்ப்பிற்கு தேவைப்படும் ஆவணங்களில் முக்கியமானதாக கருதப்படுகிறது. ஆதார் கார்டில் பெயர், முகவரி, போன் நம்பர் மற்றும் 12 இலக்க பிரத்தியேக எண் இருக்கும். இந்த எண் ஒவ்வொருவருக்கும் மாறுபடும். கைரேகை மற்றும் கருவிழிகளை ஸ்கேன் செய்து இந்திய தனித்துவ அடையாள ஆணையத்தின் (UIDAI) மூலம் ஆதார் கார்டு வழங்கப்படுகிறது.

மானியங்கள், மருத்துவம், ஓய்வூதியங்கள், உதவித்தொகை போன்ற பல அரசு திட்டங்கள் ஆதாருடன் இணைக்கப்பட்டுள்ளன. புதுப்பிக்கப்பட்ட ஆதாரை வைத்திருப்பது, இந்த பலன்களைப் பெறுவதில் தாமதங்கள் அல்லது இடையூறுகளைச் சந்திக்காமல் இருப்பதை உறுதிசெய்கிறது. எடுத்துக்காட்டாக, புதுப்பிக்கப்பட்ட முகவரியுடன் உங்கள் ரேஷன் கார்டு இணைக்கப்படவில்லை எனில், மானிய விலையில் ரேஷன்களைப் பெறுவதில் சிக்கல்களைச் சந்திக்க நேரிடும்.

உங்களின் அனைத்து அரசு ஆவணங்களும் ஒரே மாதிரியான பெயர், முகவரி மற்றும் இதர விவரங்களை கொண்டு உள்ளதா என்று சரி பார்த்துக் கொள்வது அவசியம். அப்படி உங்கள் ஆதார் கார்டில் ஏதேனும் பிழை இருந்தால் அவற்றை எத்தனை முறை திருத்த இயலும் என்பதை பற்றி இந்த பதிவில் பார்ப்போம்.

1) பெயர்: உங்கள் வாழ்நாள் முழுவதும் இரண்டு முறை ஆதார் அட்டையில் உங்கள் பெயரை மாற்றிக்கொள்ளலாம். திருமணம் அல்லது பத்திரப்பதிவு போன்ற விஷயங்களுக்காக, உங்கள் ஆதார் கார்டில் பெயர் மாற்றம் செய்து கொள்ளலாம்.

2) பாலினம்: வாழ்நாளில் ஒருமுறை.

3) பிறந்த தேதி: உங்கள் பிறந்த தேதியை மாற்ற தேவையில்லை. இருப்பினும், பதிவு செய்யும் போது தவறு ஏற்பட்டால், அதை ஒருமுறை புதுப்பிக்கலாம். பிறந்த தேதி ஒரு முக்கியமான தகவலாக இருப்பதால், இந்தப் புதுப்பித்தலுக்கு வலுவான ஆதார ஆவணங்கள் கட்டாயம் தேவை.

4) முகவரி: பெயர் மற்றும் பிறந்த தேதி போலன்றி, உங்கள் ஆதார் அட்டையில் உங்கள் முகவரியைப் புதுப்பிப்பதற்கு வரம்பு இல்லை. நீங்கள் வாடகை குடியிருப்புகளில் இருக்கும் போது உங்களது ஆதார் கார்டின் முகவரியை நீங்கள் மாற்றிக் கொள்ளலாம். உங்களின் ஆதார் கார்டை துல்லியமாக வைத்திருப்பது முக்கியம். எனவே, நீங்கள் ஒவ்வொரு முறையும் உங்கள் வீடுகளை மாற்றும்போது கட்டாயம் ஆதார் கார்டில் உங்கள் முகவரியை புதுப்பிக்க வேண்டும்.

மேலும், மேலே கொடுக்கப்பட்டுள்ள இந்த மாற்றங்களை அன்றி வேறு ஏதேனும் மாற்றங்கள் இருந்தால் அது விதிவிலக்காக கருதப்படும். இதுபோன்ற சந்தர்ப்பங்களில் ஒரு ஆதார் மையத்தில் புதுப்பிக்க வேண்டிய கோரிக்கையை சமர்ப்பிக்க வேண்டும். பின்னர் UIDAI இன் தொடர்புடைய அலுவலகத்திற்கு சென்று ஒப்புதல் பெற வேண்டும். அங்கீகரிக்கப்பட்ட அதிகாரிகளின் முழுமையான மதிப்பீட்டின் பின்னர், உங்களது கோரிக்கை அங்கீகரிக்கப்படும் அல்லது நிராகரிக்கப்படும் என்பதைப் பற்றி தெரிவிப்பார்.