வருமான வரி தாக்கல்: படிவம் 16 டவுன்லோட் செய்வது எப்படி..? ரொம்ப சிம்பிள்!

வருமான வரி கட்டுவது ஒவ்வொரு இந்திய குடிமகனுக்குமான கடமை. ஆனால், வருமான வரி தாக்கல் செய்வது பலருக்கு குழப்பமான செயல்முறையாகும். சம்பளம் வாங்குபவர்களுக்கு வருமான வரி தாக்கல் செய்வதற்கு உதவும் முக்கியமான ஆவணம் படிவம் 16 (Form 16) ஆகும். இன்று, படிவம் 16 என்றால் என்ன, அதில் என்ன தகவல்கள் இருக்கும், எப்படி அதைப் பெறுவது போன்ற விவரங்களைப் பற்றி காண்போம்.

பணியாளரின் சம்பளத்தில் இருந்து கழிக்கப்பட்ட வரியைக் காட்ட கம்பெனி சார்பில் இது வழங்கப்படுகிறது. வருமான வரி பிடித்தம் (TDS) பற்றிய விரிவான தகவல்களையும், ஊழியருக்கு வழங்கப்பட்ட சம்பளத் தொகையையும் படிவம் 16 கொண்டுள்ளது. மேலும், ஊழியர் பழைய வருமான வரி முறையை தேர்ந்தெடுத்து முதலீட்டுச் சான்றுகளை வழங்கினால், இந்த தகவல்களும் படிவம் 16-இல் சேர்க்கப்படும்.

ஒரு கம்பெனி ஊழியரிடமிருந்து வரி பிடித்தம் செய்தால் கட்டாயம் படிவம் 16-ஐ வழங்க வேண்டும்.

வருமான வரி தாக்கல்: ITR தாக்கல் செய்வதற்கான படிவம் 16, ஒவ்வொரு நிதியாண்டின் முடிவிற்குப் பிறகு ஆண்டுதோறும் வழங்கப்படுகிறது. இதில் ஊழியருக்கு வழங்கப்பட்ட சம்பளத் தகவல்களும், வரி பிடித்தம் செய்யப்பட்ட தகவல்களும் இருக்கும். வருமான வரி தாக்கல் செய்வதற்கு இந்த சான்றிதழ் அவசியம். படிவம் 16-ஐ வழங்குவதற்கான கடைசி நாள் ஜூன் 15 ஆகும்.

படிவம் 16 இல் உள்ள 2 பகுதிகள் யாவை?: படிவம் 16-இல் பகுதி A மற்றும் பகுதி B என 2 பகுதிகள் இருக்கும். அவை TRACES லோகோவைக் கொண்டிருப்பதை உறுதிசெய்ய வேண்டும். ஏனெனில் இரண்டு பகுதிகளும் அதிகாரப்பூர்வ வருமான வரி போர்ட்டலில் இருந்து பதிவிறக்கம் செய்யப்பட்டுள்ளன என்பதை இது உறுதிப்படுத்துகிறது.

படிவம் 16-இன் பகுதி A என்ன கொண்டுள்ளது?: படிவம் 16-இன் பகுதி A, ஒரு நிதியாண்டின் ஒவ்வொரு காலாண்டிலும் சம்பளத்தில் கழிக்கப்பட்ட வரியின் விவரங்களைக் கொண்டுள்ளது. அதில் முதலாளியின் பெயர் மற்றும் முகவரி,பணியாளரின் பெயர் மற்றும் முகவரி, PAN எண் மற்றும் முதலாளியின் TAN போன்ற தகவல்கள் இருக்கும்.

படிவம் 16 இன் பகுதி B எதைக் கொண்டுள்ளது?: படிவம் 16 இன் பகுதி B, ஒரு பணியாளருக்கு செலுத்தப்பட்ட அல்லது வரவு வைக்கப்பட்ட சம்பள விவரங்களைக் கொண்டுள்ளது. பகுதி A-ஐப் போலவே, இதிலும் முதலாளி மற்றும் பணியாளரின் பெயர்கள் மற்றும் முகவரிகள் மற்றும் பணியாளரின் PAN ஆகியவை இருக்கும்.

படிவம் 16 பதிவிறக்கம் செய்வது எப்படி?: TRACES என்பது இந்திய வருமான வரித் துறையின் அதிகாரப்பூர்வ இணையதளமாகும். இது முதன்மையாக TDS தொடர்பான பணிகளைக் கையாளவும், முதலாளிகள், வரி செலுத்துவோர் போன்ற நபர்களுக்கு சேவைகளை வழங்கவும் பயன்படுத்தப்படுகிறது. இந்த தளத்தின் மூலம், முதலாளிகள் படிவம் 16-ஐப் பெறலாம்.

ஸ்டெப் 1: வருமான வரித்துறையின் https://contents.tdscpc.gov.in/ என்ற அதிகாரப்பூர்வ இணையதளத்தைப் பார்வையிடவும்.

ஸ்டெப் 2: நீங்கள் பதிவு செய்த பயனராக இருந்தால், உங்கள் பான் கார்டு எண் (யூஸர் ஐடி) மற்றும் பாஸ்வேர்டைப் பயன்படுத்தி உள்நுழையவும். நீங்கள் இணையதளத்திற்கு புதியவராக இருந்தால், புதிய கணக்கை உருவாக்க பதிவு செய்ய வேண்டும்.

ஸ்டெப் 3: "Downloads" என்பதன் கீழ் "Form 16" என்பதைத் தேர்ந்தெடுக்கவும்.

ஸ்டெப் 4: படிவத்தின் வகையைத் தேர்ந்தெடுத்து, எந்த நிதியாண்டுக்கு படிவம் 16 தேவை என்பதைக் குறிப்பிடுங்கள்.

ஸ்டெப் 5: PAN மற்றும் பிற விவரங்களைச் சரிபார்க்கவும்.

ஸ்டெப் 6: அடுத்து நீங்கள் TDS ரசீது நம்பரை என்டர் செய்து, TDS தேதியைத் தேர்ந்தெடுக்க வேண்டும்.

ஸ்டெப் 7: மொத்தமாக பிடித்தம் செய்யப்பட்ட மற்றும் வசூலிக்கப்பட்ட வரியைச் சேர்க்கவும்.

ஸ்டெப் 8: "submit" என்பதைக் கிளிக் செய்து டவுன்லோட் செய்யவும்.