ஹெச்யுஎல் கொடுத்த இன்ப அதிர்ச்சி.. ஜூன் காலாண்டில் ரூ.1,881 கோடி லாபம்.. டிவிடெண்ட் ரூ.9.5..!

இந்தியாவின் மிகப்பெரிய நுகர்வோர் பொருட்கள் உற்பத்தி நிறுவனமான ஹிந்துஸ்தான் யூனிலீவர் லிமிடெட் நிறுவனம், இந்தியாவின் மும்பையை தலைமையிடமாகக் கொண்டது.

இந்த நிறுவனத்தில் ஆங்கிலோ டச்சு நிறுவனமான யூனிலீவர் 52% பங்குகளைக் கொண்டுள்ளது.

இந்த நிறுவனம் வீட்டு உபயோகப் பொருட்கள், தனி மனித உபயோக பொருட்கள், உணவு மற்றும் பானங்கள் என வேகமாக நுகரப்படும் எஃப்எம்சிஜி துறையில் முன்னணியில் உள்ள ஒரு நிறுவனமாகும். நாட்டில் கொரோனா வைரஸ் தாக்கத்திற்கும் மத்தியிலும் பாதிக்கப்படாத ஒரே துறை இது தான். இதன் எதிரொலியை இந்த நிறுவனத்தில் காண முடிகிறது.

நிகர லாபம்

நாட்டில் கொரோனா வைரஸ் தாக்கம் பரவலாக அதிகரித்து வரும் நிலையிலும் கூட, அதிக பிரச்சனை இல்லாமல் வேகமாக நுகரக்கூடிய பொருட்கள் விற்பனையானது பெரிதும் பாதிக்கப்படவில்லை என்றே கூறலாம். அதன் எதிரொலியாகத் தான் இந்த நிறுவனம் அதன் ஏப்ரல் முதல் ஜூன் காலாண்டில் நிகரலாபம் 7 சதவீதம் அதிகரித்து, 1,881 கோடி ரூபாயாக அதிகரித்துள்ளது. இது முந்தைய ஆண்டில் இதே காலாண்டில் 1,775 கோடி ரூபாயாக லாபம் கண்டுள்ளது.

வருவாய் அதிகரிப்பு

இதே இந்த நிறுவனத்தின் வருவாயானது கடந்த ஆண்டை காட்டிலும் 4 சதவீதம் அதிகரித்து, 10,406 கோடி ரூபாயாக அதிகரித்துள்ளது. எனினும் வட்டி, வரி முந்தைய லாபம் கடந்த ஆண்டை காட்டிலும் 0.1 சதவீதம் குறைந்து, 2,644 கோடி ரூபாயாக குறைந்துள்ளது. இதே மார்ஜின் விகிதம் 120 அடிப்படை புள்ளிகள் குறைந்து 25% ஆக குறைந்துள்ளது.

கடந்த ஆண்டிற்கான டிவிடெண்ட்

கொரோனாவின் தாக்கமானது சற்று இத்துறையில் பாதிப்பினை ஏற்படுத்தியுள்ளதாக இந்த நிறுவனம் தெரிவித்துள்ளது. எனினும் இந்த வங்கி மார்ச் 31, 2021வுடன் முடிவடைந்த நிதியாண்டிற்காக 9.50 ரூபாய் இடைக்கால டிவிடெண்டாக அறிவித்துள்ளது. உண்மையில் இது முதலீட்டாளர்களுக்காக நல்லதொரு விஷயமே.

வலுவான வளர்ச்சி

ஜூன் காலாண்டில் பல சவால்களுக்கும் மத்தியில் எங்களது செயல்திறன், போர்ட்போலியோவின் உள்ளார்ந்த வலிமை, செயல்பாடுகளில் சுறுசுறுப்பு என வலுவான செயல்பாட்டின் காரணமாக சிறப்பான வளர்ச்சியினை காண முடிந்ததாக இந்த நிறுவனத்தின் தலைவரும், நிர்வாக இயக்குனருமான சஞ்சீவ் மேத்தா தெரிவித்துள்ளார்.