நவம்பர் 15 முதல்.. ஐசிஐசிஐ பேங்க் கிரெடிட் கார்டுகளில் முக்கிய மாற்றம்.. கட்டண விதிகள் இதுதான்!

தற்போது கிரெடிட் கார்டுகளைப் பயன்படுத்தாத நபர்களை பார்ப்பதற்கு அரிதாக உள்ளது. அவசர காலத்திற்கு உதவும் முக்கிய கருவியாக கிரெடிட் கார்டுகள் மாறிவிட்டன. ஐசிஐசிஐ பேங்க், HDFC பேங்க் போன்ற பல்வேறு முன்னணி வங்கிகளும் கிரெடிட் கார்டுகளுக்கு சலுகைகளை வாரி வழங்குகிறது. ஐசிஐசிஐ பேங்க் கிரெடிட் கார்டுகளைப் பலரும் பயன்படுத்தி வருகின்றனர். இந்நிலையில் பேங்க் ஒரு முக்கிய செய்தியை வெளியிட்டுள்ளது. நவம்பர் 15-ஆம் தேதி முதல் ஐசிஐசிஐ பேங்க் கிரெடிட் கார்டு வைத்திருப்பவர்களுக்கு புதிய கட்டணங்களை அறிவித்துள்ளது.

எரிபொருள் பரிவர்த்தனைகளுக்கான கட்டணம்: புதிய விதிகளின்படி எரிபொருள் பரிவர்த்தனை தொகை 50,000 ரூபாய்க்கு மேலிருந்தால், பரிவர்த்தனை செய்யப்பட்ட தொகையில் ரூ.1 சதவீதத்தை வங்கி வசூலிக்கும்.

கல்வி தொடர்பான பேமெண்ட்கள்: கிரெடிட் கார்டைப் பயன்படுத்தி பள்ளி, கல்லூரி அல்லது சர்வதேச கட்டணத்தை செலுத்தும் போது எந்தவித கட்டணமும் வசூலிக்கப்படாது. ஆனால் அதிகாரப்பூர்வமற்ற மூன்றாம் தரப்பு அப்ளிகேஷன் மூலம் பள்ளி, கல்லூரி கட்டணங்களை செலுத்தினால் அதற்கு கட்டணம் வசூலிக்கப்படும்.

யூட்டிலிட்டி பேமெண்ட்களுக்கான கட்டணம்: ரூ.50,000-த்திற்கு மேல் செய்யப்படும் யூட்டிலிட்டி பேமண்டுகளுக்கு பரிவர்த்தனை செய்யப்பட்ட தொகையில் 1 சதவீதம் கட்டணமாக வசூலிக்கப்படும்.

எரிபொருள்களுக்கான கூடுதல் கட்டணம்: எரிபொருளுக்கான பரிவர்த்தனைகளை செய்யும்போது பரிவர்த்தனை மதிப்பில் 1 சதவீதம் கட்டணமாக வசூலிக்கப்படும். இருப்பினும் எரிபொருள் பரிவர்த்தனைகளுக்கு நீங்கள் அமேசான் பே கார்டை பயன்படுத்தினால் இந்த கூடுதல் கட்டணம் முற்றிலும் தள்ளுபடி செய்யப்படும்.

வாடகை செலவு: ஐசிஐசிஐ பேங்கின் கிரெடிட் கார்டுகள் மூலம் செய்யப்படும் வாடகை பேமெண்ட்களுக்கு 1 சதவீதம் கட்டணம் வசூலிக்கப்படும்.

வட்டி: கிரெடிட் கார்டுகளுக்கு செலுத்த வேண்டிய மொத்த தொகையை குறிப்பிட்ட தேதிக்குள் செலுத்தாவிட்டில் வட்டி விதிக்கப்படும். முந்தைய நிலுவைத் தொகைகள் முழுமையாக செலுத்தப்படும் வரை மொத்த தொகை மற்றும் அனைத்து புதிய பரிவர்த்தனைகளின் மீதும் வட்டி கணக்கிடப்படும்.

ஒருவேளை வட்டி கட்ட தவறினால் அதிகபட்சமாக மாதத்திற்கு 3.8 சதவீதம் வரை வட்டி விகிதம் நீட்டிக்கப்படலாம். இந்த வட்டி விகிதத்தில் பார்க்கும்போது ஆண்டுக்கு 46 சதவீதம் வரை வட்டி செலுத்த வேண்டிய நிலை ஏற்படும்.

எனவே கிரெடிட் கார்டு பெற்றவர்கள் புதிய கட்டணங்களின் விதிமுறைகளை தெரிந்து கொண்டு, சரியாக பில் செலுத்தும் பட்சத்தில் கூடுதல் கட்டணங்களைத் தவிர்க்கலாம்.