அது என்ன "இன்கம் டேக்ஸ்" பிரிவு 80DDB? அதன் கீழ் வருமான வரி விலக்கு பெறுவது எப்படி? நோட் பண்ணுங்க

சென்னை: வருமான வரிச் சட்டத்தின் section 80DDBஇன் கீழ் தனிநபர்களுக்கு மருத்துவ சிகிச்சையில் ஏற்படும் செலவுகளுக்கு வரி விலக்கு அளிக்கப்படுகிறது. இந்த வரி விலக்கு குறிப்பிட்ட சில நோய்களுக்குப் பொருந்தும். இந்த சட்டத்தின் கீழ் குழந்தைகள், பெற்றோர்கள், உங்களின் வாழ்க்கைத்துணை போன்றவர்களுக்கு வரி விலக்கு அளிக்கப்படும்.

இந்த சட்டம் குறிப்பிட்ட சில நோய்களுக்கான மருத்துவச் செலவுகளுக்கான வரிகளைச் சேமிக்க உதவுகிறது. புற்றுநோய், டிமென்ஷியா, பார்கின்சன் நோய், எய்ட்ஸ் மற்றும் சிறுநீரக செயலிழப்பு போன்ற நோய்கள் இந்த திட்டத்தில் வரி விலக்கு பெறுகின்றன.

நீங்கள் இந்திய குடியுரிமை பெற்றவராக இருந்து,உங்கள் மனைவி, குழந்தைகள், பெற்றோர் அல்லது உடன்பிறந்தவர்களுக்கான சிகிச்சைக்காக பணத்தை செலவிட்டிருந்தால், இந்த section 80DDB சட்டத்தின் கீழ் நீங்கள் வரி விலக்கு கோரலாம்.

60 வயதிற்குட்பட்ட நோயாளிகளுக்கு செலுத்தப்பட்ட தொகைக்கு வரி விலக்காக ரூ.40,000 வரை பெறலாம். 60 வயது மற்றும் அதற்கு மேற்பட்ட நோயாளிகளுக்கு, வரி விலக்காக ரூ. 1 லட்சம் வரை பெற முடியும். மேலும் செலவழிக்கப்பட்ட தொகை அதற்கு குறைவாக இருந்தாலும், நீங்கள் வரிவிலக்கு கோரலாம்.

பிரிவு 80DDB இன் கீழ் விலக்கு பெற, தனிநபர்கள் மருந்துச் சீட்டு, பில், ரசீது உள்ளிட்ட மருத்துவச் செலவுகளின் முறையான ஆவணங்களை பாதுகாப்பாக வைத்திருக்க வேண்டும். கூடுதலாக, இந்த நன்மைகளைப் பெறும்போது அது தொடர்புடைய வரிச் சட்டங்கள் மற்றும் ஒழுங்குமுறைகளுக்கு இணங்குவது முக்கியம். வரி செலுத்துவோர் குறிப்பாக குறிப்பிட்ட நோய்களால் பாதிக்கப்பட்டிருந்தால், வருமான வரிக் கணக்கில், பிரிவு 80DDB இன் கீழ் விலக்கு கோருவதற்கான சான்றிதளைப் பயன்படுத்த வேண்டும்.

பிரிவு 80DDB இன் கீழ் வரி விலக்கு பெறுவதற்கான சான்றிதழ் அல்லது மருந்துச் சீட்டைப் பெறுவது எப்படி என்பதைப் பார்ப்போம்

சிறப்பு மருத்துவரைப் பார்வையிடவும்: நீங்கள் அல்லது உங்களைச் சார்ந்தவர் பாதிக்கப்பட்ட நோயில் நிபுணத்துவம் பெற்ற சிறப்பு மருத்துவரை சந்திக்க வேண்டும்.

மருத்துவ பரிசோதனை மற்றும் நோய் கண்டறிதல்: சிறப்பு மருத்துவர் உங்களை அல்லது உங்களை சார்ந்தவரை பரிசோதித்து நோயை கண்டறிவார். பின்னர் அவர் தேவையான சிகிச்சையை பரிந்துரைப்பார்.

மருந்துச் சீட்டுக்கான கோரிக்கை: விரிவான மருந்துச் சீட்டைத் தருமாறு சிறப்பு மருத்துவரிடம் கேளுங்கள். இதில் நோயாளியின் பெயர், நோய் கண்டறிதல், பரிந்துரைக்கப்பட்ட சிகிச்சை மற்றும் பிற முக்கிய விவரங்கள் இருக்க வேண்டும்.

பரிந்துரைக்கப்பட்ட வடிவம்: மருந்துச் சீட்டு ஒரு குறிப்பிட்ட வடிவத்தைப் பின்பற்றி, மருத்துவரின் பதிவு எண், மருத்துவமனை விவரங்கள் மற்றும் பிற தொடர்புடைய தகவல்களைக் கொண்டிருக்க வேண்டும்.

அனைத்து மருத்துவ பில்கள் மற்றும் ரசீதுகளை வைத்திருங்கள்: சிகிச்சைக்காக ஏற்படும் மருத்துவ செலவுகள் தொடர்பான அனைத்து ரசீதுகள் மற்றும் பில்களை வைத்திருங்கள். வரி விலக்கு கோரும்போது போது இந்த ஆவணங்கள் சான்றாக செயல்படும்.

உங்கள் வரி அறிக்கையுடன் மருந்துச் சீட்டைச் சமர்ப்பிக்கவும்: உங்கள் வரிக் கணக்கைத் தாக்கல் செய்யும் போது, அதற்கான பிரிவில் மருந்துச் சீட்டு மற்றும் மருத்துவச் செலவுகள் பற்றிய விவரங்களை வழங்கவும். அசல் மருந்துச்சீட்டு மற்றும் பிற ஆவணங்களை எதிர்கால குறிப்புக்காக பாதுகாப்பாக வைத்திருங்கள்.

அரசாங்கப் படிவம் தேவையில்லை: ஊனமுற்றோர் சான்றிதழ்களைப் போலன்றி, மருந்துச் சீட்டுக்கு குறிப்பிட்ட அரசாங்கப் படிவம் எதுவும் தேவையில்லை. பிரிவு 80DDB இன் கீழ் விலக்கு கோருவதற்கு மருந்துச் சீட்டு போதுமானது