ரியல் எஸ்டேட் முதல் உற்பத்தி துறை வரை: மத்திய பட்ஜெட்டில் என்னென அறிவிப்புகளை எதிர்பார்க்கலாம்?

நிதி அமைச்சர் நிர்மலா சீதாராமன் 2026-27 நிதியாண்டுக்கான மத்திய பட்ஜெட்டை பிப்ரவரி 1ஆம் தேதி தாக்கல் செய்யவுள்ளார். உலக பொருளாதாரம், வர்த்தக தடைகள் மற்றும் புவிசார் அரசியல் நிச்சயமற்ற தன்மைகளால் பாதிக்கப்பட்டுள்ள நிலையில் இந்த பட்ஜெட் அனைத்து துறைகளிலும் பெரும் எதிர்பார்ப்பை ஏற்படுத்தியுள்ளது.

உலகளாவிய பொருளாதார சூழல் நிலையற்றதாக இருந்தாலும், இந்திய பொருளாதாரம் வலிமையாக உள்ளது. பட்ஜெட் 2026 மக்கள் நலன் சார்ந்த நடவடிக்கைகளைத் தவிர்த்து, நிதி நிலைமையை சீரமைப்பதில் கவனம் செலுத்தி, மூலதன செலவினங்கள் மற்றும் சமூக உள்கட்டமைப்பு முதலீடுகளுக்கு முன்னுரிமை அளிக்கும் என ஆய்வாளர்கள் எதிர்பார்க்கின்றனர். மோர்கன் ஸ்டான்லி இந்த பட்ஜெட் எந்த துறைகளில் எல்லாம் கவனம் செலுத்த வேண்டும் என்ற பட்டியலை வெளியிட்டுள்ளது.

ரியல் எஸ்டேட் துறை: புதிய வருமான வரி விதிகளின் கீழ், சுய பயன்பாட்டு வீட்டுக் கடன்களுக்கான வட்டிக்கு விலக்கு அளிக்கும் வாய்ப்பை அரசு பரிசீலிக்கும் என மோர்கன் ஸ்டான்லி எதிர்பார்க்கிறது. தற்போது இத்தகைய விலக்கு இல்லை, ஆனால் பழைய வரி விதிமுறைப்படி ஆண்டுக்கு ரூ.2 லட்சம் வரை விலக்கு உண்டு. வீட்டுக் கடன்களுக்கான வட்டி இணைக்கப்பட்ட மானியத் திட்டத்தை (CLSS) மீண்டும் அறிமுகப்படுத்துமாறு ஆய்வாளர்கள் கோருகின்றனர். இது கடன் தொகையில் 3-4% மானியத்தை வழங்கும். மேலும், மலிவு விலை வீட்டுவசதிக்கான விலை வரம்பை தற்போதைய ரூ 45 லட்சத்திலிருந்து ரூ 75 லட்சமாக உயர்த்த வேண்டும் என்கிறது.

வாகனத் துறை: மின்சார வாகன (EV) உள்கட்டமைப்புக்கு அதிக நிதி ஆதரவு, மற்றும் அரிய வகை உலோகங்கள் (rare earth permanent magnets) உள்நாட்டு உற்பத்தியை ஊக்குவிக்கும் திட்டங்கள் குறித்த தெளிவான அறிவிப்புகள் எதிர்பார்க்கப்படுகின்றன.

நிதித் துறை: டிஜிட்டல் பணப் பட்டுவாடாவை ஊக்குவிப்பதற்கான சலுகைகள், பல்வேறு வகையான வைப்புநிதிகளுக்கான வட்டி வருவாயில் ஒரே மாதிரியான வரி விதிப்பு மற்றும் குறு, சிறு, நடுத்தர நிறுவனங்கள் (MSME) மற்றும் சிறு நிதி நிறுவனங்களுக்கான (MFI) கடன் உத்தரவாதத் திட்டங்களை விரிவுபடுத்துதல் ஆகியவற்றுக்கு ஆய்வாளர்கள் முக்கியத்துவம் அளிக்கின்றனர். பிரதம மந்திரி அவாஸ் யோஜனா (PMAY 2.0) திட்டத்தின் கீழ் வட்டி மானியங்களைப் பெறுவதற்கான நிதி ஒதுக்கீட்டை அதிகரிப்பது, செயல்முறைகளை எளிதாக்குவது, மற்றும் ஆயுள் காப்பீட்டு நிறுவனங்களுக்கான வரிக் கணக்கீட்டை சாதாரண கார்ப்பரேட் நிலைக்கு உயர்த்துவது போன்றவையும் எதிர்பார்க்கப்படுகின்றன.

உலோகங்கள் மற்றும் சிமென்ட்: அரசின் உள்கட்டமைப்பு உந்துதலுக்கு மத்தியில், சிமென்ட் மற்றும் எஃகு சார்ந்த துறைகளுக்கான நிதி ஒதுக்கீடுகள் ஒரு முக்கிய அம்சமாக இருக்கும். பிரதம மந்திரி அவாஸ் யோஜனா திட்டத்தின் கீழ் மலிவு விலை வீடுகளுக்கான அதிக ஒதுக்கீடுகள் மற்றும் அரிய வகை கனிமங்களுக்கான கொள்கை நடவடிக்கைகள் அல்லது செலவுகள் எதிர்பார்க்கப்படுகின்றன.

தொலைத்தொடர்புத் துறை: யுனிவர்சல் சர்வீஸ் ஆப்ளிகேஷன் ஃபண்ட் (USOF) நிதி வற்றாத வரை அதற்கான கட்டணங்களில் சலுகை கிடைக்கும் என மோர்கன் ஸ்டான்லி எதிர்பார்க்கிறது. அட்ஜஸ்டட் கிராஸ் ரெவென்யூ (AGR) நிலுவைக் கட்டணங்கள் தொடர்பான ஒரு சீர்திருத்தம், உச்ச நீதிமன்றத்தின் AGR தீர்ப்பால் ஏற்படும் அதிகரிக்கும் உரிமக் கட்டணங்கள் மற்றும் அலைக்கற்றை பயன்பாட்டு கட்டணங்களில் சேவை வரி விலக்கு, மற்றும் ஒட்டுமொத்த உரிமக் கட்டணக் குறைப்பு போன்ற பிற நடவடிக்கைகளும் எதிர்பார்க்கப்படுகின்றன.

வணிக இழப்புகளை முன்னோக்கி கொண்டு செல்லும் காலக்கெடுவை எட்டு ஆண்டுகளிலிருந்து 16 ஆண்டுகளாக நீட்டிக்கவும் ஆய்வாளர்கள் எதிர்பார்க்கின்றனர். டேட்டா சென்டர் உருவாக்குபவர்களுக்கு, திறன் அல்லது பசுமை ஆற்றல் இலக்குகளுடன் இணைக்கப்பட்ட வரி விடுமுறைகள், ஜிபியு போன்ற இறக்குமதி செய்யப்பட்ட உபகரணங்களுக்கான சுங்க வரி விலக்குகள், அல்லது அதிக ஜிஎஸ்டி உள்ளீட்டு வரி வரவுகள் போன்ற சலுகைகள் வழங்கப்படலாம்.

தொழில் துறை: உள்கட்டமைப்புக்கான ஒட்டுமொத்த ஒதுக்கீடு 8-10% அதிகரிக்கும் என எதிர்பார்க்கப்படுகிறது. திருத்தப்பட்ட 2026 நிதியாண்டு செலவின மதிப்பீடுகளை விட வளர்ச்சிக்கு முக்கியத்துவம் அளிக்கப்படும்.

ரயில்வே: பாதைகள், புதிய வழித்தடங்கள், பாதுகாப்பு அமைப்பு மற்றும் ரோலிங் ஸ்டாக் போன்ற துறைகளில் 5-6% ஒதுக்கீடு வளர்ச்சி எதிர்பார்க்கப்படுகிறது. மூன்று புதிய வழித்தடங்கள் மற்றும் புதிய ரயில்கள் (வந்தே பாரத் மற்றும் அம்ரித் பாரத்) பற்றிய அறிவிப்புகள் வெளியாகும் வாய்ப்புள்ளது.

பாதுகாப்பு: பாதுகாப்புத் துறை ஒதுக்கீடு 12-15% அதிகரிக்கும் என எதிர்பார்க்கப்படுகிறது. உள்நாட்டு மற்றும் தனியார் பாதுகாப்பு நிறுவனங்களுக்கான ஒதுக்கீடு முக்கியமாக கவனிக்கப்பட வேண்டிய ஒன்று.

மின் உற்பத்தி: புதுப்பிக்கத்தக்க ஆற்றல், பேட்டரி ஆற்றல் சேமிப்பு அமைப்புகள் (BESS), அணுசக்தி (சிறிய மாடுலர் ரியாக்டர்கள் உட்பட), மற்றும் பம்ப் செய்யப்பட்ட சேமிப்பு திட்டங்கள் உள்ளிட்ட தூய ஆற்றல் மீது அரசின் உந்துதல் மீண்டும் வலியுறுத்தப்படும்.

மின் விநியோகம்: மின் விநியோக நிறுவனங்களுக்கான (டிஸ்காம்ஸ்) நிதி நிலைமையை மேம்படுத்தவும், சாத்தியமான தனியார்மயமாக்கல்/பங்குகளை விற்பனை செய்யவும் சீர்திருத்தங்களை மேற்கொள்ள நிபந்தனைகளுடன் கூடிய நிதித் தொகுப்பு எதிர்பார்க்கப்படுகிறது.

எலெக்ட்ரானிக்ஸ்: இந்தியாவில் மதிப்பு கூட்டலை அதிகரிக்கவும், சுற்றுச்சூழல் அமைப்பை மேம்படுத்தவும் மத்திய அரசு செமிகண்டக்டர் 2.0 திட்டத்தை மேம்படுத்தலாம்.

இணையம், இ-காமர்ஸ்: AI/ML, குவாண்டம் கம்ப்யூட்டிங் மற்றும் பிளாக்செயின் போன்ற வளர்ந்து வரும் தொழில்நுட்பங்களை ஏற்றுக்கொள்ளும் ஸ்டார்ட்அப்களுக்கு சலுகைகளை மோர்கன் ஸ்டான்லி எதிர்பார்க்கிறது. ESOP-களுக்கான பரந்த வரி சலுகைகள் மூலம் அதிக ஸ்டார்ட்அப் ஊழியர்களை உள்ளடக்கும் வாய்ப்பையும் ஆய்வாளர்கள் காண்கின்றனர்.

ஊடகம்: டிடிஎச் உரிமக் கட்டணம் குறைப்பு மற்றும் டிடிஎச் சேவைகள் குறித்த ட்ராய் (TRAI) பரிந்துரைகளின்படி பிற கொள்கை மாற்றங்கள் எதிர்பார்க்கப்படுகின்றன.

மருந்து துறை: பொது சுகாதாரச் செலவினங்களை அதிகரிப்பதில் தொடர்ந்து கவனம் செலுத்தப்படும் என ஆய்வாளர்கள் எதிர்பார்க்கின்றனர். இதில் முதன்மை சுகாதாரப் பாதுகாப்பு, மருத்துவமனை உள்கட்டமைப்பு மற்றும் பணியாளர் திறன் மேம்பாட்டுக்கு முக்கியத்துவம் அளிக்கப்படும். இந்தியாவின் 'உலக மருந்தகம்’ என்ற நிலையை மேலும் வலுப்படுத்த புத்தாக்கத்திற்கான சலுகைகள், ஆராய்ச்சி மற்றும் மேம்பாட்டிற்கான வரிச் சலுகைகள், மற்றும் செலவு போட்டித்தன்மையை மேம்படுத்தும் நடவடிக்கைகள் ஆகியவை சாத்தியமானவை.

மேலும், பிஎல்ஐ (PLI) திட்டங்கள் மூலம் ஆக்டிவ் பார்மாசூட்டிகல் இன்கிரிடியன்ட்ஸ் (API) ஆதரவு, முக்கியமான மருந்துகளுக்கான இறக்குமதி சார்புநிலையைக் குறைத்தல், ஆயுஷ்மான் பாரத் திட்டத்தை விரிவுபடுத்துதல், அத்தியாவசிய மருந்துகள் மற்றும் நாள்பட்ட நோய் மேலாண்மைக்கான அணுகலை மேம்படுத்துதல் போன்றவையும் எதிர்பார்க்கப்படுகின்றன.