2026 மத்திய பட்ஜெட்: மீண்டும் செல்வ வரியை கொண்டு வருகிறதா மத்திய அரசு?

2026-27 ஆம் ஆண்டுக்கான மத்திய பட்ஜெட்டில், அதிக வருமானம் ஈட்டுபவர்களுக்கு விதிக்கப்படும் கூடுதல் வரிக் கட்டணங்களை (surcharge) அதிகரிக்கவோ அல்லது செல்வ வரியை மீண்டும் அறிமுகப்படுத்தவோ கூடாது என்று வரி நிபுணர்கள் மத்திய அரசுக்கு அறிவுறுத்தியுள்ளனர். அத்தகைய நடவடிக்கைகள், பெரும் பணக்காரர்களைக் குறைந்த வரி விதிக்கும் நாடுகளுக்குக் குடிபெயரத் தூண்டும் என்று அவர்கள் எச்சரித்துள்ளனர்.

தற்போது, ரூ. 50 லட்சம் முதல் ரூ. 1 கோடி வரையிலான வருமானத்திற்கு 10%, ரூ. 1-2 கோடிக்கு 15%, மற்றும் ரூ. 2-5 கோடிக்கு 25% கூடுதல் கட்டணம் விதிக்கப்படுகிறது. ரூ. 5 கோடிக்கு மேல் வருமானம் பெறும் தனிநபர்கள் புதிய வரி விதிமுறையின் கீழ் 25% செலுத்த, பழைய விதிமுறையின் கீழ் 37% வரி செலுத்துகின்றனர்.

தனியார் பொருளாதார வல்லுநர்களின் மதிப்பீடுபடி, GST விகிதக் குறைப்பு மற்றும் குறைந்த வருமான வரி வசூல், நடப்பு நிதியாண்டில் சுமார் ரூ. 2 லட்சம் கோடி இழப்பை அரசு கருவூலத்திற்கு ஏற்படுத்தக்கூடும். 2027 நிதியாண்டில் கூடுதல் வருவாய், பாதுகாப்பு உள்ளிட்ட துறைகளுக்குப் புதிய நிதி ஒதுக்கீட்டிற்கு உதவும்.

PWC & கோ LLP கூட்டாளர் அமித் ராணா, வருமான வரி விதிப்பில் 'செங்குத்துச் சமத்துவம்’ அவசியம் என்கிறார் வருவாய் அதிகரித்தால் வரிப் பொறுப்பும் உயரும். "நாம் ஒரு சிறந்த வரி அடுக்கு கொண்டிருக்கிறோம். இதில், அதிகபட்ச வருவாய்க்கு 42% செலுத்தப்படுகிறது, குறைந்தபட்ச வருவாய்க்கு கிட்டத்தட்ட பூஜ்ஜிய வரி விதிக்கப்படுகிறது," என்று PTI க்கு அவர் தெரிவித்தார்.

ஆனால், வரி விகிதங்கள் "மிகவும் கட்டுப்படுத்துவதாக" மாறும்போது, "அதிக வருமானம் ஈட்டுபவர்கள் இந்தியாவில் இருக்க விரும்ப மாட்டார்கள், இது இன்று சாத்தியம்" என ராணா சுட்டிக்காட்டினார். தொழில்கள் மற்றும் வேலைகளை உருவாக்குபவர்கள் இவர்களே என்பதால், இவர்களுக்கான வரி விதிப்பு "கவனமாகச் சமப்படுத்தப்பட வேண்டும்" என்றார்.

EY இந்தியாவின் சுர்பி மார்வா, கூடுதல் வரிக் கட்டணங்கள் அதிகரித்தால் அல்லது செல்வ வரி மீண்டும் அறிமுகப்படுத்தப்பட்டால், அதிக மதிப்புள்ள தனிநபர்கள் குறைந்த வரி விதிக்கும் நாடுகளுக்குச் சென்றுவிடும் ஆபத்து உள்ளதாக உறுதிப்படுத்தினார். மூலதன இடமாற்றம் மற்றும் குடியுரிமை தொடர்பான முடிவுகளில் "வரி நிச்சயமற்ற தன்மையும், அதிக பயனுள்ள வரிகளும்" முக்கியப் பங்கு வகிக்கலாம் என்றார்.

மூலதனத்தையும் திறமையையும் தக்கவைப்பது நோக்கமாக இருக்கும்போது, வரி விதிப்பில் ஸ்திரத்தன்மையும், ஊகிக்கக்கூடிய தன்மையும் முக்கியம் என மார்வா கூறினார். நிர்வாக முயற்சிக்கு ஏற்ப வசூல் இல்லாததால் 2015-ல் செல்வ வரி ரத்து செய்யப்பட்டது. நிர்வாக ரீதியாக, செல்வ வரியை விட கூடுதல் வரிக் கட்டணம் பொதுவாக திறமையானதாகவும், குறைவான சர்ச்சைக்குரியதாகவும் பார்க்கப்படுகிறது.

அரசிடம் GST, CRS போன்ற வலுவான தரவுப் பதிவுகள் உள்ளதால், சொத்து அடிப்படையிலான வரி விதிப்பு முறைகளை விட, கூடுதல் வரிக் கட்டணச் சரிசெய்தல்களைக் கொள்கை வகுப்பாளர்கள் எளிமையான ஒரு விருப்பமாகக் கருதலாம்," என்று மார்வா கூறினார்.

ஷர்துல் அமர்சந்த் மங்கல்தாஸ் & கோ கூட்டாளர் கௌரி பூரி, வரி விகித அதிகரிப்பு, மூலதனப் புலம்பெயர்வுக்கு வழிவகுக்கும், தொழில்முனைவோரையும், வேலை உருவாக்கத்தையும் ஊக்கமிழக்கச் செய்யும் என்றார். செல்வ வரியை மீண்டும் கொண்டுவருவது நிர்வாகச் சிக்கல்களையும், இணக்கச் செலவுகளையும் அதிகரிக்கும் என அவர் கவலை தெரிவித்தார்.

"குறைந்த வரி விகிதங்கள் கொண்ட பிற நாடுகளுக்குக் குடும்பங்கள் குடிபெயர முடியும் என்பதால், மூலதனப் புலம்பெயர்வு ஒரு உண்மையான ஆபத்து. வரி விதிப்பு முறைகளை முதலீட்டாளர்களுக்கு ஏற்றதாக வைத்திருக்க எப்போதும் உலகளாவிய போட்டி நிலவுகிறது. இந்தியாவில் கடுமையான வரிகள் முதலீட்டைத் தடுத்து, மூலதனத்தை வெளியே தள்ளக்கூடும்," என்று பூரி மேலும் விளக்கினார்.

டெலாய்ட் இந்தியாவின் கூட்டாளர் அலோக் அகர்வால், 2023 பட்ஜெட்டில், ரூ. 5 கோடிக்கு மேல் வருமானம் உள்ள தனிநபர்களுக்கான அதிகபட்ச கூடுதல் வரிக் கட்டணத்தை 37% லிருந்து 25% ஆக அரசு குறைத்தது என்றார். இதனால், அத்தகைய வரி செலுத்துவோருக்கு அதிகபட்ச இறுதி வரி விகிதம் சுமார் 42.7% லிருந்து 39% ஆகக் குறைந்தது. புதிய வரி விதிமுறைக்கு மட்டுமே 2023 ஏப்ரல் 1 முதல் இது பொருந்தும். "ஆகவே, மூன்று ஆண்டுகளுக்குள் அரசு இதை மீண்டும் உயர்த்த வாய்ப்பில்லை," என்று அவர் குறிப்பிட்டார்.

செல்வ வரியைப் பொறுத்தவரை, கடந்த சில ஆண்டுகளாக பட்ஜெட் அறிவிப்புக்கு முன்னதாக நிறைய ஊகங்கள் நிலவி வருவதாக அகர்வால் தெரிவித்தார். இருப்பினும், கடந்த கால அனுபவத்தின் அடிப்படையில், செல்வ வரி மூலம் கிடைக்கும் வசூல், ஒரு புதிய வரி விதிப்பை நிர்வகிக்கும் செலவுடன் ஒப்பிடும்போது குறிப்பிடத்தக்கதாக இருக்காது.

"எனவே, தொழில்நுட்பத்தைப் பயன்படுத்துதல், பிற நாடுகளுடன் தகவல்களைப் பகிர்ந்துகொள்ளுதல் போன்ற வலுவான வரிச் சட்டம் அமலாக்கத்தின் மூலம் வரி வசூலை மேம்படுத்துவதில் அரசு கவனம் செலுத்துகிறது," என்று அவர் முடித்தார்.