AI முதல் சைபர் செக்யூரிட்டி வரை டெக் நிறுவனங்கள் பட்ஜெட்டில் எதிர்பார்ப்பது என்ன?

பிப்ரவரி 1, 2026 அன்று நிதியமைச்சர் நிர்மலா சீதாராமன் தாக்கல் செய்யவுள்ள 2026ஆம் ஆண்டு பட்ஜெட், இந்தியத் தொழில்நுட்பத் துறையினரால் ஆவலுடன் எதிர்பார்க்கப்படுகிறது. உற்பத்தித் துறையில் சலுகைகள், செயற்கை நுண்ணறிவு (AI) வர்த்தக விதிகளை மேம்படுத்துதல் ஆகியவை இத்துறையின் முக்கிய எதிர்பார்ப்புகள்.

ஓராண்டு மட்டுமன்றி, எதிர்கால வளர்ச்சிக்கான செயல்திட்டத்தை பட்ஜெட் முன்வைக்கும் என இத்துறை சார்ந்தவர்கள் எதிர்பார்க்கின்றனர். பென் க்யூ இந்தியா மற்றும் தெற்காசிய நிர்வாக இயக்குனர் ராஜீவ் சிங், “ரூ10,000 கோடி நிதி ஒதுக்கீட்டுடன் மேம்படுத்தப்பட்ட PLI 2.0 திட்டம், அதிநவீன 4K/8K பேனல்கள், லேசர் ப்ரொஜெக்ஷன் தொழில்நுட்பம் ஆகியவற்றை உள்ளூர்மயமாக்க 7-10 சதவீத சலுகைகளை வழங்க வேண்டும். இது, இறக்குமதி சார்ந்திருத்தலை 45 சதவீதத்திலிருந்து 10 சதவீதத்திற்கும் கீழ் குறைத்து, உற்பத்தித் திறனை அதிகரிக்கும்” என்றார். இந்த உள்ளூர்மயமாக்கல் அதிக வேலை வாய்ப்புகளை உருவாக்கும்.

ஹைசென்ஸ் இந்தியா தலைமை செயல் அதிகாரி பங்கஜ் ராணா,“செமிகண்டக்டர்கள், டிஸ்ப்ளே தொழில்நுட்பம், அசெம்பிளி லைன்களுக்கான திறன் மேம்பாட்டுப் பயிற்சிக்கு எனத் தனியான ஒரு நிதி, தொழில்நுட்ப நிறுவனங்களுடன் இணைந்து ஆண்டுக்கு 5 லட்சம் இளைஞர்களுக்குப் பயிற்சி அளித்து, எலெக்ட்ரானிக்ஸ் மதிப்புச் சங்கிலியில் 2 மில்லியன் வேலைகளை உருவாக்கும்” என்று சுட்டிக்காட்டினார்.

செல்லெகார் இணை நிறுவனர் மற்றும் நிர்வாக இயக்குனர் ரவி அகர்வால், “திறன் மேம்பாடு, எலக்ட்ரானிக்ஸ் கிளஸ்டர்கள், MSME சப்ளையர் நெட்வொர்க்குகளில் முதலீடுகள் மூலம் இந்தியாவின் உற்பத்திச் சூழலை வலுப்படுத்துவது, மதிப்புச் சங்கிலியில் முன்னேறவும், இறக்குமதியைக் குறைக்கவும் அத்தியாவசியமானது” என வலியுறுத்தினார்.

செயற்கை நுண்ணறிவும் சைபர்பாதுகாப்பும் ஒன்றிணைந்து செயல்பட்டாலும், இத்துறையினர் பரந்த ஆதரவையும், தடையற்ற வர்த்தகத்திற்கான குறைந்த கட்டுப்பாடுகளையும் எதிர்பார்க்கின்றனர். அவாலி நிறுவனர் மற்றும் தலைமை செயல் அதிகாரி ஸ்ரீவித்யா கண்ணன், "AI ஆராய்ச்சி, மேம்பாட்டுக்குத் தொடர்ச்சியான ஆதரவு – மானியங்கள், சலுகைகள், கொள்கை நடவடிக்கைகள் உட்பட – நிறுவனங்கள் AI மற்றும் ஆட்டோமேஷனை ஏற்றுக்கொள்ள, செயல்திறனை வலுப்படுத்த, தரவு அடிப்படையிலான முடிவுகளை எடுக்க ஊக்கப்படுத்த வேண்டும்" என்று தெரிவித்தார்.

எனர்ஜி போட்ஸ் இணை நிர்வாக இயக்குனர் முரளி மந்தரவாடி, இந்த பட்ஜெட் நீண்ட காலத் தொழில்நுட்பத் திறன் மேம்பாட்டில் கவனம் செலுத்த வாய்ப்பளிக்கிறது என்றார். அவர் மேலும், “AI, கிளவுட், சைபர்பாதுகாப்பு, டீப் டெக் ஆகியவற்றைத் தேசிய டிஜிட்டல் உள்கட்டமைப்பாகக் கருத வேண்டும். கணக்கீட்டுத் திறன், டேட்டா சென்டர் விரிவாக்கம் ஆகியவற்றுக்கான மூலோபாய ஒதுக்கீடுகளுடன், வலுவான ஆராய்ச்சி, மேம்பாட்டு வரிச் சலுகைகள், புரோடோடைப்பிலிருந்து தயாரிப்பிற்கான விரைவான வழிகள் இந்தியாவின் தொழில்நுட்பத் தளத்தின் பொருளாதாரத் திறனை வெளிக்கொணரும்” என்று வலியுறுத்தினார்.

தொழில்நுட்பத் துறை பிரதிநிதிகள், செயற்கை நுண்ணறிவு மற்றும் டேட்டா கிளவுட் துறைகளில் உள்ளூர் நிறுவனங்களின் திறனை உணர்ந்துள்ளனர். இத்தொழில்நுட்பம் பல பத்தாண்டுகளுக்குத் தனது இடத்தைப் பலப்படுத்த உள்ள நிலையில், நாட்டின் எதிர்காலத்தைக் கருத்தில்கொண்டு, வர்த்தக விதிமுறைகளும், வரிகளும் தளர்த்தப்பட வேண்டும் என எதிர்பார்க்கப்படுகிறது.