காப்பீடு திட்டங்களுக்கான பிரீமியங்கள் குறையுமா? மத்திய பட்ஜெட்டில் காப்பீட்டு துறையின் எதிர்பார்ப்பு என்ன?

2026ஆம் ஆண்டுக்கான மத்திய பட்ஜெட்டில் காப்பீட்டுத் துறைக்கு நீண்டகாலச் சீர்திருத்தங்கள் தேவை என இத்துறை சார்ந்தவர்கள் வலியுறுத்துகின்றனர். காப்பீட்டை அனைவரும் அணுகும் வகையில் மலிவாக்குதல், வரம்பை அதிகரித்தல் மற்றும் நுகர்வோர் நம்பிக்கையை மேம்படுத்துதல் ஆகியவற்றை அடிப்படையாக கொண்டு மாற்றம் வரவேண்டும் என கோருகின்றனர்.

காப்பீட்டைப் பரவலாக்குவதற்கு, குறுகியகால சலுகைகளை விட, கொள்கை நிலைத்தன்மை, தெளிவான விதிகள், யதார்த்தமான வரிச் சலுகைகளே மிக முக்கியம் எனத் துறைத் தலைவர்கள் வலியுறுத்துகின்றனர். அண்மைய ஜிஎஸ்டி சீர்திருத்தங்கள் காப்பீட்டை அணுக உதவியுள்ளன. எனினும், அடுத்த கட்டமாக ஸ்திரத்தன்மை மற்றும் சிறு நகரங்கள், கிராமப்புறங்களில் காப்பீட்டை ஆழமாகப் பரவலாக்குவதில் அரசு கவனம் செலுத்த வேண்டும்.

இன்சூரன்ஸ்தேகோ (InsuranceDekho) நிறுவனத்தின் முதன்மை வருவாய் அதிகாரி அபிஷேக் பன்சல், துறையின் நீண்டகால வளர்ச்சிக்குக் கொள்கை நிலைத்தன்மை அவசியம் என்று வலியுறுத்தினார். "கடந்த ஆண்டு ஜிஎஸ்டி சீர்திருத்தங்கள், காப்பீட்டின் மலிவுத்தன்மை மற்றும் அணுகலை மேம்படுத்துவதில் ஒரு நேர்மறையான படியாகும். 2026 மத்திய பட்ஜெட்டில், கொள்கை நிலைத்தன்மை மற்றும் ஒழுங்குமுறைத் தெளிவு ஆகியவை 2047-க்குள் அனைவருக்கும் காப்பீடு என்ற தொலைநோக்குப் பார்வையை முன்னேற்றுவதற்கு மிக முக்கியமானதாக இருக்கும்" என்று அவர் தெரிவித்தார்.

பின்தங்கிய பிரிவினரைச் சென்றடைய குறுங்காப்பீட்டை (micro-insurance) வலுப்படுத்த வேண்டியதன் அவசியத்தையும் அவர் எடுத்துக்காட்டினார். வணிகம் செய்வதை எளிதாக்கும் சீர்திருத்தங்கள் நிலையான, புதுமையான காப்பீட்டுச் சூழல் அமைப்பை உருவாக்க உதவும் என்று அவர் வலியுறுத்தினார்.

காப்பீட்டுப் பரவல் அதிகரித்திருந்தாலும், மருத்துவச் செலவுகள் உயர்ந்து வருவதால், பல குடும்பங்களுக்கு சுகாதாரக் காப்பீடு போதுமானதாக இல்லை எனத் துறை வல்லுநர்கள் தெரிவிக்கின்றனர். சாய்ஸ் இன்சூரன்ஸ் புரோக்கிங் (Choice Insurance Broking) நிறுவனத்தின் முதன்மை வளர்ச்சி அதிகாரி ராஜேந்திர உபாத்யாயா, தனிநபர் பிரீமியங்களுக்கு பூஜ்ஜிய ஜிஎஸ்டி மற்றும் அதிக அந்நிய நேரடி முதலீட்டு வரம்புகள் இத்துறைக்கு உந்துதலை அளித்துள்ளதாகக் குறிப்பிட்டார்.

"தனிநபர் பிரீமியங்களுக்கான 0% ஜிஎஸ்டி மற்றும் அந்நிய நேரடி முதலீட்டு வரம்புகளை 100% ஆக உயர்த்தியது போன்ற முக்கியச் சீர்திருத்தங்கள் மூலம் இந்தியக் காப்பீட்டுத் துறை சமீபத்தில் ஒரு மாற்றமான சகாப்தத்தில் நுழைந்துள்ளது, இது குறிப்பிடத்தக்க உத்வேகத்தை அளித்துள்ளது" என்று உபாத்யாயா தெரிவித்தார். இருப்பினும், பிரிவு 80D இன் கீழ் உள்ள தற்போதைய வரி விலக்கு, இன்றைய மருத்துவச் செலவுகளைப் பிரதிபலிக்கவில்லை எனவும் அவர் சுட்டிக்காட்டினார்.

நான்கு பேர் கொண்ட குடும்பத்திற்கான ரூ.10 லட்சம் சுகாதாரக் காப்பீடு, தற்போதுள்ள விலக்கு வரம்புகளை அடிக்கடி மிஞ்சிவிடுகிறது என்பதையும் உபாத்யாயா விளக்கினார். "மத்திய பட்ஜெட் 2026, தனிநபர்களுக்கு ரூ.50,000 ஆகவும் மூத்த குடிமக்களுக்கு ரூ.1 லட்சமாகவும் பிரிவு 80D வரம்புகளைத் திருத்துவதன் மூலம் சுகாதாரக் காப்பீட்டை மேலும் மலிவாக்கும் என்று நாங்கள் எதிர்பார்க்கிறோம்” என்றார். இது மருத்துவப் பணவீக்கத்தை எதிர்கொள்ள குடும்பங்களுக்கு உதவும் என்றும் அவர் குறிப்பிட்டார்.

நீண்டகால சேமிப்பை ஊக்குவிக்கவும், இந்தியாவின் பாதுகாப்பு இடைவெளியைக் குறைக்கவும் ஆயுள் காப்பீட்டு நிறுவனங்களும் மாற்றங்களை எதிர்பார்க்கின்றன. ஆக்சிஸ் மேக்ஸ் லைஃப் இன்சூரன்ஸ் (Axis Max Life Insurance) நிறுவனத்தின் நிர்வாக இயக்குனர் மற்றும் தலைமைச் செயல் அதிகாரி சுமித் மதன், வரவிருக்கும் பட்ஜெட்டில் குடும்பங்களின் நிதிப் பாதுகாப்பு ஒரு மையக் கவனமாக இருக்க வேண்டும் என்று வலியுறுத்தினார்.

"இந்தியா தனது அடுத்த கட்டப் பொருளாதார வளர்ச்சிக்கு நகரும்போது, குடும்ப நிதிப் பாதுகாப்பை வலுப்படுத்துவது மத்திய பட்ஜெட் FY27 இன் ஒரு முக்கிய மைய முன்னுரிமையாக இருக்க வேண்டும்" என்று மதன் வலியுறுத்தினார். காப்பீட்டைப் பரவலாக்குவதற்காக, பிரிவுகள் 80C, 80CCC மற்றும் 80CCD ஆகியவற்றின் கீழ் அதிக மற்றும் எளிமையான வரிச் சலுகைகளை அவர் பரிந்துரைத்தார்.

மேலும், நாடு முழுவதும் ஆயுள் காப்பீட்டு வரம்பை மேம்படுத்த, தற்போதுள்ள 80C வரம்பிற்கு வெளியே, pure term insuranceக்க தனி வரி விலக்கு அளிக்க வேண்டும் என்றும் சுமித் மதன் கோரினார். மொத்தத்தில், 2026 பட்ஜெட்டில் இருந்து காப்பீட்டுத் துறையின் எதிர்பார்ப்புகள் ஒரு தெளிவான இலக்கை நோக்கியே உள்ளன: காப்பீட்டை மேலும் மலிவானதாகவும், பொருத்தமானதாகவும், எளிதில் அணுகக்கூடியதாகவும் மாற்றுவது. யதார்த்தமான வரிச் சலுகைகள், ஒழுங்குமுறைத் தெளிவு மற்றும் நீண்டகாலக் கொள்கைப் பார்வை ஆகியவை 2047-க்குள் "அனைவருக்கும் காப்பீடு" என்ற இந்தியாவின் இலக்கை அடைய உதவும் என்று தலைவர்கள் நம்புகின்றனர்.