வருமான வரி செலுத்துவோர் பட்ஜெட்டில் எதிர்பார்க்கும் முக்கியமான மாற்றங்கள் என்னென்ன?

பிப்ரவரி 1 அன்று தாக்கல் செய்யப்படவுள்ள பட்ஜெட் 2026 குறித்த எதிர்பார்ப்புகள் வரி செலுத்துவோர் மத்தியில் பலமடங்கு அதிகரித்துள்ளன. நிதியமைச்சர் நிர்மலா சீதாராமன் மீதான நம்பிக்கையும் உயர்ந்திருக்கிறது. சில வல்லுநர்கள், 2025-ஆம் ஆண்டில் தனிநபர் வருமான வரி மற்றும் ஜிஎஸ்டி விகிதக் குறைப்புகளால் அரசாங்கம் தனது நிதிச் சுமையை ஏற்கனவே கணிசமாக விரிவுபடுத்திவிட்டது என்றும், இதனால் பெரிய வரிச் சலுகைகள் இப்போதைக்கு ஒத்திவைக்கப்படலாம் என்றும் கருதுகின்றனர்.

இருப்பினும், பல்வேறு தொழில் அமைப்புகளும், வல்லுநர்களும், பெரிய அளவிலான விகிதக் குறைப்புகளுக்குப் பதிலாக, தற்போதைய வரி விதிகள் பலவற்றில் மேம்பாடுகளுக்கு இன்னும் இடமிருக்கிறது என்று கூறுகின்றனர். பட்ஜெட் 2026-ஐ முன்னிட்டு, நடுத்தர வர்க்கத்தினர் மற்றும் வரி செலுத்துவோர் எதிர்பார்க்கும் சில முக்கிய வரி மாற்றங்களை பார்க்கலாம்.

வீட்டு வாடகைப்படி (HRA) சலுகை: தற்போது, வீட்டு வாடகைப்படி (HRA) விலக்கு பெருநகரங்களில் சம்பளத்தில் 50% ஆகவும், பிற நகரங்களில் 40% ஆகவும் உள்ளது. இந்த முறை, தற்போதைய வாடகைப் பகுதியுடன் ஒப்பிடும்போது பொருந்தாததாக இருப்பதாக நிபுணர்கள் கருதுகின்றனர். குறிப்பாக இரண்டாம் நிலை நகரங்களில் வாடகை பெருநகரங்களுக்கு இணையாக உயர்ந்துவிட்ட நிலையில், தற்போதைய வாடகை நிலைக்கு ஏற்ப HRA விதிகளை மாற்றியமைக்க வேண்டும் என்று வல்லுநர்கள் பரிந்துரைக்கின்றனர்.

வெளிநாடு வாழ் இந்தியர்களுக்கான 182 நாள் விதி: வெளிநாடு வாழ் இந்தியர்கள் (NRIs) மற்றும் இந்திய வம்சாவளியினர் (PIOs) இந்தியாவுக்கு வரும்போது, முன்பு இருந்த 182 நாட்கள் விதியைத் திரும்பக் கொண்டுவர வேண்டும் என்று வல்லுநர்கள் தெரிவித்துள்ளனர். தற்போதைய விதிகள், என்ஆர்ஐக்கள் மற்றும் பிஐஓக்களுக்கான விதிமுறையில் அதிக சிக்கல்களை ஏற்படுத்தியுள்ளதாகவும், இது வரி செலுத்துவோருக்குக் குழப்பங்களையும் பல பிரச்சனைகளையும் உருவாக்கியுள்ளதாகவும் அவர்கள் சுட்டிக்காட்டுகின்றனர்.

அதிகபட்ச நிலையான கழிவு: புதிய வரி விதிப்பு முறையின் கீழ், சம்பளம் பெறுவோர் மற்றும் ஓய்வூதியதாரர்கள் ரூ75,000 நிலையான கழிவைப் பெறுகின்றனர். இந்தத் தொகையை குறைந்தபட்சம் ரூ1 லட்சம் ஆகவும், முடிந்தால் ரூ 1.5 லட்சம் ஆகவும் அதிகரிக்க வேண்டும் என்று வல்லுநர்கள் நம்புகின்றனர்.

மூலதன ஆதாயங்களுக்கான வரித் தள்ளுபடி: பட்ஜெட் 2025-ல் பிரிவு 87A-யின் கீழ் வரி தள்ளுபடி ரூ60,000 ஆக உயர்த்தப்பட்டதால், ரூ12 லட்சம் வரையிலான சாதாரண வருமானம் வரி விலக்கு பெற்றது. ஆனால், பங்குப் பத்திரங்கள் மற்றும் பரஸ்பர நிதிகள் மூலம் மூலதன ஆதாயங்கள் பெறும் வரி செலுத்துவோருக்கு இந்தத் தள்ளுபடி அனுமதிக்கப்படுவதில்லை. அவர்களின் மொத்த வருமானம் ரூ 12 லட்சத்திற்கும் குறைவாக இருந்தாலும் இது பொருந்தாது. இந்த வரித் தள்ளுபடியை பங்கு முதலீடுகளுக்கும் விரிவுபடுத்த வேண்டும் என்று வல்லுநர்கள் பரிந்துரைக்கின்றனர்.

புதிய வரி விதிப்பின் கீழ் சுகாதார காப்பீட்டு கழிவு: புதிய வரி விதிப்பு முறையின் கீழ் சுகாதார காப்பீட்டு பிரீமியங்களுக்கான வருமான வரி விலக்கு சலுகையை வழங்க வேண்டும் என்று வல்லுநர்கள் கோரிக்கை விடுத்துள்ளனர். தற்போது, இந்த சலுகை பழைய வரி விதிப்பு முறையின் கீழ் மட்டுமே கிடைக்கிறது.

அதிக வீட்டுக் கடன் வட்டி கழிவு: வீட்டு விலைகள் அதிகரித்து வருவதாலும், வரிச் சலுகைகள் குறைவாக இருப்பதாலும், பல வரி செலுத்துவோருக்கு வீடு வாங்குவது எட்டாக் கனியாகிவிட்டது. எனவே, வீட்டுக் கடன் மீதான வட்டி கழிவை ரூ5 லட்சம் ஆக உயர்த்த வேண்டும் என்று வல்லுநர்கள் தெரிவித்துள்ளனர். மேலும், இந்தச் சலுகையை புதிய வரி விதிப்பு முறையின் கீழும் வழங்க வேண்டும் என்று அவர்கள் பரிந்துரைக்கின்றனர்.

வாடகை வருமான கணக்கீட்டை எளிதாக்குதல்: வாடகைக்கு விடப்பட்ட சொத்துக்களுக்கான வருமான வரி கணக்கீட்டை எளிதாக்க வேண்டும் என்று நிபுணர்கள் வலியுறுத்தியுள்ளனர். அதன்படி, வரி செலுத்துவோர் உண்மையான வாடகை வருமானத்தின் அடிப்படையில் வரி விதிக்கப்பட வேண்டும். இதற்கு எதிராக 30% நிலையான கழிவு மற்றும் நகராட்சி/உள்ளூர் வரிகள் மற்றும் வட்டிச் செலவுகளுக்கு முழுமையான கழிவு அனுமதிக்கப்பட வேண்டும் என்றும் அவர்கள் தெரிவித்துள்ளனர்.

இரண்டு TDS விகிதங்கள் மட்டும்: மூலத்தில் வரி பிடித்தம் (TDS) என்பது வருவாய் சேகரிப்புக்கானது அல்ல, அது ஒரு தணிக்கைப் பதிவாகவே செயல்பட வேண்டும். ஆனால், தற்போது 0.1%, 1%, 2%, 5%, 10% மற்றும் 20% என ஆறு வெவ்வேறு TDS விகிதங்கள் உள்ளன. இந்திய சான்றளிக்கப்பட்ட கணக்காளர்கள் நிறுவனம் (ICAI) இந்த TDS விகிதங்களை 1% மற்றும் 5% என இரண்டாகக் குறைக்கலாம் என்று பரிந்துரைத்துள்ளது.

நிகழ்நேர வருமான வரித் திரும்பப் பெறுதல் கண்காணிப்பு: 2025-ஆம் ஆண்டில் பல வரி செலுத்துவோர் வருமான வரித் திரும்பப் பெறுவதில் தாமதத்தால் பாதிக்கப்பட்டனர். பட்ஜெட் 2026-27-க்கான பரிந்துரைகளின் ஒரு பகுதியாக, வரி செலுத்துவோர் தளத்தில் நிகழ்நேரத் திரும்பப் பெறுதல் கண்காணிப்பு டாஷ்போர்டை உருவாக்க வல்லுநர்கள் கோரியுள்ளனர். மேலும், வரி பாக்கிக்கான வட்டி விகிதத்திற்கு இணையாக, வருமான வரித் திரும்பப் பெறுவதற்கான வட்டியையும் நிர்ணயிக்க வேண்டும் என்று அவர்கள் பரிந்துரைத்துள்ளனர்.

கூடுதல் வரி (சர்சார்ஜ்) வரம்பை உயர்த்துதல்: புதிய வரி விதிப்பு முறையின் கீழ் வரி அடுக்குகளில் மாற்றங்கள் வந்தாலும், கூடுதல் வரி (சர்சார்ஜ்) வரம்பு சீரமைக்கப்படவில்லை. மொத்த வருமானத்தின் அடிப்படையில் சர்சார்ஜ் விதிக்கப்படுவதால், எந்த கழிவையும் வழங்காத புதிய வரி விதிப்பு முறையில் இது எப்போதும் அதிகமாக இருக்கிறது. ரூ50 லட்சத்திற்கும் சற்று அதிகமான (எ.கா., ரூ2 லட்சம்) வருமானம் கூட மொத்த வரிப் பொறுப்பின் மீது 10% சர்சார்ஜ்-ஐத் தூண்டுகிறது. எனவே, புதிய வரி விதிப்பு முறையின் கீழ் சர்சார்ஜ் வரம்பை ரூ50 லட்சத்திலிருந்து ரூ75 லட்சமாக அதிகரிக்க நிபுணர்கள் முன்மொழிந்துள்ளனர்.

தங்கம் மற்றும் வெள்ளியை வைத்திருக்கும் கால அளவைக் குறைத்தல்: தற்போது, தங்க ஈடிஎஃப்கள் ஒரு வருடத்தில் நீண்ட கால முதலீடுகளாக மாறுகின்றன. ஆனால், பிசிக்கல் தங்கமும், தங்க பரஸ்பர நிதிகளும் இரண்டு ஆண்டுகளுக்கு குறையாமல் வைத்திருக்கப்பட்டாலே நீண்ட கால சொத்துக்களாகக் கருதப்படுகின்றன. இந்த ஏற்றத்தாழ்வை நீக்கி, பிசிக்கல் தங்கத்தை வைத்திருக்கும் கால அளவை ஒரு வருடமாகக் குறைக்க வேண்டும் என்று வல்லுநர்கள் பரிந்துரைத்துள்ளனர். இதன் மூலம் தங்க ஈடிஎஃப்களுக்கு இணையாக இது மாறும்.

திருமணமான தம்பதிகளுக்கான கூட்டு வரிவிதிப்பு விருப்பம்: திருமணமான தம்பதிகளுக்கு இந்தியாவில் ஒரு விருப்பமான கூட்டு வரி விதிப்பு முறையை அறிமுகப்படுத்த ICAI முன்மொழிந்துள்ளது. தற்போது, திருமணமான தம்பதிகள் தனித்தனி வரி செலுத்துவோராகக் கருதப்பட்டு, தனிப்பட்ட கணக்குகளைத் தாக்கல் செய்ய வேண்டும். இரண்டு வருமானம் பெறும் குடும்பங்களுக்கு இந்த அமைப்பு சிறப்பாகச் செயல்படுகிறது. இருப்பினும், ஒரு வருமானம் கொண்ட குடும்பங்களுக்கோ அல்லது ஒரு துணை மற்றவரை விட கணிசமாக அதிகமாக சம்பாதிக்கும் குடும்பங்களுக்கோ இது குறைவான பலனையே அளிக்கிறது.

இத்தகைய சூழ்நிலைகளில், முழு வரிச் சுமையும் ஒரு தனிநபரின் மீது விழுகிறது, இது பெரும்பாலும் வருமானத்தை உயர்ந்த வரி அடுக்குகளுக்குத் தள்ளி விடுகிறது. வீட்டை ஒரு பொருளாதார அலகாக அங்கீகரிப்பதன் மூலம் கூட்டு வரி விதிப்பு ஒரு நியாயமான வரி கட்டமைப்பை உருவாக்க முடியும் என்று ICAI குறிப்பிட்டுள்ளது. இத்தகைய அமைப்பு அமெரிக்கா மற்றும் இங்கிலாந்து போன்ற நாடுகளில் ஏற்கனவே நடைமுறையில் உள்ளது.

தேசிய ஓய்வூதிய அமைப்பு (NPS) மாற்றங்கள்: ஒரு பணியாளரின் என்.பி.எஸ். (தேசிய ஓய்வூதிய அமைப்பு) கணக்கிற்கு செய்யப்படும் பங்களிப்பு, சட்டத்தின் பிரிவு 17(1)(viii)-இன் விதிகளின்படி, அவருடைய 'சம்பளம்' என்ற வகையில் வரி விதிக்கக்கூடிய வருமானத்தில் சேர்க்கப்படுகிறது. இருப்பினும், நிதியியல் சட்டம் 2020, 'பயன்' (perquisite) வரையறையை திருத்தியது. இது சில சூழ்நிலைகளில் இத்தகைய பங்களிப்பையும் சேர்க்க அனுமதித்தது. இந்த மாற்றம் குழப்பத்தை ஏற்படுத்தி, இரட்டை வரிவிதிப்புக்கு வழிவகுக்கும் என்று வல்லுநர்கள் தெரிவிக்கின்றனர். பட்ஜெட் 2026 இதனை சரிசெய்ய வேண்டும் என்று அவர்கள் வலியுறுத்துகின்றனர்.