மொரார்ஜி தேசாய் முதல் நிர்மலா சீதாராமன் வரை: யார் அதிக எண்ணிக்கையில் பட்ஜெட்டை தாக்கல் செய்துள்ளனர்?

வரும் பிப்ரவரி 1ஆம் தேதி, மத்திய நிதியமைச்சர் நிர்மலா சீதாராமன் தனது ஒன்பதாவது தொடர்ச்சியான மத்திய பட்ஜெட்டை தாக்கல் செய்யவுள்ளார். அதிக பட்ஜெட்டுகளை நாடாளுமன்றத்தில் தாக்கல் செய்த முன்னாள் பிரதமர் மொரார்ஜி தேசாய்க்கு அடுத்தபடியாக, இவர் இரண்டாவது இடத்தைப் பிடிப்பார் என்று எதிர்பார்க்கப்படுகிறது.

நாட்டின் நிதித் திட்டமிடல் மற்றும் கொள்கைகளை கோடிட்டு காட்டும் முக்கிய ஆவணமாக மத்திய பட்ஜெட் திகழ்கிறது. இந்தியப் பொருளாதாரப் பாதையை வடிவமைத்த பல முக்கிய பட்ஜெட்டுகளை பல்வேறு நிதியமைச்சர்கள் தாக்கல் செய்துள்ளனர். அதிக மத்திய பட்ஜெட்டுகளை தாக்கல் செய்த நிதியமைச்சர்கள் குறித்த ஒரு சுருக்கமான பார்வை இங்கே.

மொரார்ஜி தேசாய்: முன்னாள் பிரதமராகவும், நிதியமைச்சராகவும் செயல்பட்ட மொரார்ஜி தேசாய், 1958 முதல் 1963 வரையிலும், மீண்டும் 1967 முதல் 1969 வரையிலும் நிதியமைச்சராகப் பதவி வகித்தார். இக்காலக்கட்டங்களில் அவர் மொத்தம் 10 மத்திய பட்ஜெட்டுகளை தாக்கல் செய்தார்.

இந்தியா சுதந்திரம் பெற்ற ஆரம்ப காலகட்டத்தில், அவரது கொள்கைகள் நிதி ஒழுக்கம், பொருளாதார தாராளமயமாக்கல் மற்றும் வரிச் சீர்திருத்தங்கள் மீது குவிந்தன. பணவீக்கத்தைக் கட்டுப்படுத்தவும், வரிச் சலுகைகள் மூலம் சேமிப்பை ஊக்குவிக்கவும் முக்கிய நடவடிக்கைகளை எடுத்தார்.

ப.சிதம்பரம்: தற்போதைய நிதியமைச்சர் நிர்மலா சீதாராமன் இந்த ஆண்டு தாக்கல் செய்யவுள்ள ஒன்பதாவது பட்ஜெட், ப. சிதம்பரத்தின் ஒன்பது பட்ஜெட் சமர்ப்பிப்புகளுக்கு இணையாகும். ப. சிதம்பரம், 1996 முதல் 2013 வரை பல்வேறு காலகட்டங்களில் நிதியமைச்சர் பொறுப்பை வகித்தார்.ப. சிதம்பரம் இந்தியாவின் வரிச் சீர்திருத்தங்களை அறிமுகப்படுத்தியதில் பெரிதும் புகழப்படுபவர். சரக்கு மற்றும் சேவை வரி (ஜிஎஸ்டி)க்கான அடித்தளத்தை அமைத்ததும், இந்தியாவின் வரி அமைப்பை சீரமைத்ததும் இதில் அடங்கும்.

1997 ஆம் ஆண்டில் அவர் தாக்கல் செய்த "கனவு பட்ஜெட்" ('Dream Budget') இந்திய வரலாற்றில் மிகவும் குறிப்பிடத்தக்க ஒன்றாகும். இது வரி விகிதங்களைக் குறைத்து, பொருளாதார வளர்ச்சியை ஊக்குவிக்க வரி முறையை எளிதாக்கியது.1991 ஆம் ஆண்டு தாராளமயமாக்கலுக்குப் பிறகு இந்தியப் பொருளாதாரத்தை மேலும் விரிவுபடுத்த ப. சிதம்பரம் உதவினார். நிதி ஒருங்கிணைப்பு, முதலீடுகளைத் திரும்பப் பெறுதல் மற்றும் அனைவரையும் உள்ளடக்கிய வளர்ச்சி ஆகியவற்றுக்கு அவர் முக்கியத்துவம் கொடுத்தார். அவரது பதவிக்காலத்தில் தகவல் தொழில்நுட்பத் துறைக்கு ஆதரவு வழங்கப்பட்டு, இந்தியாவை உலகளாவிய தொழில்நுட்ப மையமாக மாற்றினார்.

பிரணாப் முகர்ஜி: பல்வேறு காலகட்டங்களில் நிதியமைச்சராகப் பணியாற்றிய பிரணாப் முகர்ஜி, எட்டு மத்திய பட்ஜெட்டுகளை தாக்கல் செய்தார். அவர் இந்தியாவின் வங்கிச் சீர்திருத்தங்கள், முதலீடுகளைத் திரும்பப் பெறுதல் உத்திகள் மற்றும் நேரடி வரி கொள்கைகளுக்கு வழி வகுத்தார். கிராமப்புற மற்றும் உள்கட்டமைப்பு மேம்பாட்டிற்கும் அவர் ஆதரவளித்தார்.

நேரடி வரி விதிப்புச் சட்டத்தை வலுப்படுத்துவதிலும், பின்னர் 2017 இல் நடைமுறைப்படுத்தப்பட்ட சரக்கு மற்றும் சேவை வரி (ஜிஎஸ்டி) கட்டமைப்பை உருவாக்குவதிலும் அவரது குறிப்பிடத்தக்க பங்களிப்புகள் இருந்தன. 2008 ஆம் ஆண்டின் உலகளாவிய நிதி நெருக்கடியின் போதும் இந்தியப் பொருளாதாரத்தை அவர் திறம்படக் கையாண்டார்.

நிர்மலா சீதாராமன்: தற்போதைய நிதியமைச்சர் நிர்மலா சீதாராமன், இந்தியாவின் முதல் முழுநேர பெண் நிதியமைச்சர் என்ற பெருமையைப் பெற்றவர். ஏற்கனவே எட்டு பட்ஜெட்டுகளை தாக்கல் செய்துள்ள இவர், பிப்ரவரி 1 ஆம் தேதி தனது ஒன்பதாவது பட்ஜெட்டை சமர்ப்பிக்க தயாராக உள்ளார்.

முந்தைய பட்ஜெட்டில், நிர்மலா சீதாராமன் பல முக்கிய நேரடி வரிச் சீர்திருத்தங்களை அறிமுகப்படுத்தினார். அத்துடன் பல வளர்ச்சித் திட்டங்களையும் அறிவித்தார். கோவிட்-19 பெருந்தொற்று காலத்தில் இந்தியாவின் பொருளாதாரத்தை வழிநடத்துவதில் அவர் முக்கியப் பங்காற்றினார். வணிகங்கள் மற்றும் தனிநபர்களுக்கு ஆதரவளிக்கப் பெரிய ஊக்கத் திட்டங்களையும் வெளியிட்டார்.

உள்கட்டமைப்பு தவிர, நிதியமைச்சர் சீதாராமன் டிஜிட்டல் பொருளாதாரம், உற்பத்தித் துறைக்கான ஊக்கத் திட்டங்கள் (PLI schemes) மற்றும் 'ஆத்மநிர்பர் பாரத்' (தற்சார்பு இந்தியா) ஆகியவற்றுக்கு முக்கியத்துவம் அளித்துள்ளார். அவர் கணிசமான கார்ப்பரேட் வரி குறைப்புகளையும் மேற்கொண்டு, பசுமை ஆற்றல் துறையில் முதலீடுகளை ஊக்குவித்தார்.

யஷ்வந்த் சின்ஹா: அடல் பிஹாரி வாஜ்பாய் அரசாங்கத்தின் கீழ் நிதியமைச்சராகப் பணியாற்றிய யஷ்வந்த் சின்ஹா, எட்டு மத்திய பட்ஜெட்டுகளைத் தாக்கல் செய்தார். அவரது பொருளாதாரச் சீர்திருத்தங்கள் இந்தியாவின் நிதி கொள்கைகளை வடிவமைத்தன. சரக்கு மற்றும் சேவை வரிக்கு (ஜிஎஸ்டி) முன்னோடியாகத் திகழ்ந்த மதிப்பு கூட்டு வரி (VAT) முறையை அவர் அறிமுகப்படுத்தி, மறைமுக வரிவிதிப்பை சீராக்க உதவினார்.

சின்ஹாவின் பதவிக்காலத்தில் தனியார்மயமாக்கல், வங்கிச் சீர்திருத்தங்கள் மற்றும் உள்கட்டமைப்பு மேம்பாட்டிற்கு முக்கியத்துவம் அளிக்கப்பட்டது. மேலும், அவரது 2001 ஆம் ஆண்டு பட்ஜெட் இந்தியாவின் தொலைத்தொடர்புத் துறையை விரிவுபடுத்துவதில் பெரும் பங்கு வகித்தது. இதன் மூலம் செல்போன்கள் சாமானிய மக்களுக்கு மலிவானதாக மாறின.