உலக நிறுவனங்களுக்கே இந்தியா தான் தலைமை.. 25 சிறந்த பணியிடங்களில் 16 நிறுவனங்கள் நம் நாட்டில் தான்.!

'கிரேட் பிளேஸ் டு வொர்க்' என்ற உலகப் புகழ்பெற்ற அமைப்பு, ஃபார்ச்சூன் மீடியாவுடன் இணைந்து 2025 ஆம் ஆண்டுக்கான 'உலகின் சிறந்த பணியிடங்கள்' பட்டியலை வெளியிட்டுள்ளது. இதில், உலகம் முழுவதும் ஊழியர்களுக்கு மிக சிறந்த பணிச் சூழலை வழங்கும் முதல் 25 நிறுவனங்கள் இடம்பெற்றுள்ளன. இந்த நிறுவனங்களில் 16 நிறுவனங்கள் இந்தியாவில் தங்கள் கிளைகளை அமைத்து செயல்படுவது, உலகளவில் நமது நாட்டின் உழைப்பு கலாச்சாரம் எந்த அளவுக்கு முக்கியத்துவம் பெறுகிறது என்பதை காட்டுகிறது.

இந்த தரவரிசையானது, 2024 மற்றும் 2025 ஆம் ஆண்டுகளில் உலகம் முழுவதும் உள்ள 25 மில்லியனுக்கும் அதிகமான ஊழியர்களிடம் பெறப்பட்ட 90 லட்சத்திற்கும் அதிகமான கருத்துக்கணிப்பு பதில்களின் அடிப்படையில் உருவாக்கப்பட்டுள்ளது. ஊழியர்கள் தங்கள் நிறுவனத்தின் மீதான நம்பிக்கை, பெருமை, நேர்மை மற்றும் சக ஊழியர்களுடனான நட்பு போன்ற மிக முக்கியமான விஷயங்களை மதிப்பிட்டுள்ளனர். அதிக எண்ணிக்கையிலான ஊழியர்களை நிர்வகிக்கும்போதும், சிக்கலான உலகளாவிய செயல்பாடுகளை வைத்திருந்தபோதும், நேர்மறையான பணிச் சூழலை பராமரித்த நிறுவனங்களுக்கு இந்த ஆண்டு அதிக முக்கியத்துவம் அளிக்கப்பட்டுள்ளது.

இந்தப் பட்டியலில், விருந்தோம்பல் துறையின் ஜாம்பவானான ஹில்டன் (Hilton) நிறுவனம் முதல் இடத்தைப் பிடித்துள்ளது. டி.ஹெச்.எல். எக்ஸ்பிரஸ் (DHL Express) இரண்டாவது இடத்திலும், தொழில்நுட்ப நிறுவனமான சிஸ்கோ (Cisco) மூன்றாவது இடத்திலும் உள்ளன. அசென்சர், மேரியட் இன்டர்நேஷனல், என்விடியா, அடோப் போன்ற பல உலகப் புகழ்பெற்ற நிறுவனங்களும் இதில் உள்ளன.

உலக அரங்கில் இந்தியாவின் ஆதிக்கம் : 'கிரேட் பிளேஸ் டு வொர்க்' இந்தியாவின் தலைமை செயல் அதிகாரியான பல்பிர் சிங், ஒரு நல்ல பணிச் சூழல் என்பது நாடுகளின் எல்லைகளைத் தாண்டிச் செயல்படும் என்று தெரிவித்துள்ளார். மேலும், இந்தச் சிறந்த 25 நிறுவனங்களில் 16 நிறுவனங்கள் இந்தியாவில் வலுவான செயல்பாட்டை கொண்டிருப்பது, உலகப் பணியிடக் கலாச்சாரத்தை வடிவமைப்பதில் இந்தியா ஒரு முக்கியப் பங்காற்றி வருவதை வெளிப்படுத்துகிறது என்று பெருமிதம் தெரிவித்தார்.

ஃபார்ச்சூன் பத்திரிகையின் தலைமை ஆசிரியர் அலிசன் ஷொண்டெல் கூறுகையில், இந்தப் பட்டியலில் உள்ள நிறுவனங்களில் ஊழியர்கள் நம்பிக்கையுடன், உற்சாகத்துடனும், அதிக அதிகாரத்துடனும் உணர்ந்து தங்கள் சிறந்த பணியை செய்ய முடிகிறது என்றும் குறிப்பிட்டுள்ளார்.

இந்தப் பட்டியலில் இடம்பெற, ஒரு நிறுவனம் உலகளவில் குறைந்தது 5,000 ஊழியர்களைப் பணியமர்த்தியிருக்க வேண்டும். மேலும் ஆசியா, ஐரோப்பா, வட அமெரிக்கா என 6 மண்டலங்களில் உள்ள சிறந்த பணியிடங்கள் பட்டியலில் குறைந்தது 5 இடங்களில் இடம்பெற்றிருக்க வேண்டும். ஊழியர்களின் கருத்துக்களை சேகரிக்கும் 'நம்பிக்கைக் குறியீட்டு ஆய்வு' (Trust Index Survey) முறையில், தலைமை பண்பு, மரியாதை, நேர்மை மற்றும் புதிய கண்டுபிடிப்புகளுக்கு உள்ள வாய்ப்புகள் போன்ற அம்சங்கள் விரிவாக ஆராயப்படுகின்றன. இந்த ஆய்வு, தங்கள் ஊழியர்களின் வளர்ச்சிக்கும், சமூகத்திற்கும் பங்களிக்கும் நிறுவனங்களை மட்டுமே அங்கீகரிக்கிறது. இது, நிறுவனங்கள் தங்கள் ஊழியர்களை வெறும் பணியாளர்களாக பார்க்காமல், வளர்ச்சிக்குரியவர்களாக பார்ப்பதை காட்டுகிறது.