உற்பத்தி மற்றும் உள்கட்டமைப்பு மேம்பாட்டுக்கு பட்ஜெட்டில் முக்கியத்துவம் அளிக்க FICCI கோரிக்கை

2027ஆம் நிதி ஆண்டுக்கான இந்தியாவின் வளர்ச்சி வாய்ப்புகள் குறித்து, இந்தியப் பெருநிறுவனங்கள் (India Inc) நம்பிக்கையுடன் உள்ளன. இந்திய வர்த்தக மற்றும் தொழில்துறை கூட்டமைப்பு (FICCI) நடத்திய ஆய்வில், பெருநிறுவனத் துறை நல்ல ஜி.டி.பி வளர்ச்சி மற்றும் நிதி சார்ந்த ஒழுங்கை எதிர்பார்ப்பது உறுதிப்படுத்தப்பட்டுள்ளது.

இந்திய வர்த்தக மற்றும் தொழில்துறை கூட்டமைப்பு நடத்திய பட்ஜெட்டுக்கு முந்தைய ஆய்வுப்படி, 80 சதவீதத்திற்கும் அதிகமான இந்திய நிறுவனங்கள் 2027ஆம் நிதியாண்டில் நாட்டின் பொருளாதார எதிர்காலம் மீது நம்பிக்கை கொண்டுள்ளன. சுமார் 50 சதவீத ஆய்வில் பங்கேற்றவர்கள், ஜி.டி.பி வளர்ச்சி 7 முதல் 8 சதவீதம் வரை இருக்கும் என கணித்துள்ளனர்.

ஆய்வில் பங்கேற்றவர்களில் 42 சதவீதம் பேர், 2025-26 நிதியாண்டில் 4.4 சதவீத ஜி.டி.பி இலக்கிலான நிதிப் பற்றாக்குறையை அடைய முடியும் என நம்புவதாக ஃபிக்கி தெரிவித்தது. 2026 பட்ஜெட்டுக்கான முக்கிய பொருளாதார எதிர்பார்ப்புகளில் வேலைவாய்ப்பு உருவாக்கம், உள்கட்டமைப்பு உந்துதல், மற்றும் ஏற்றுமதி ஆதரவு ஆகியவை அடங்கும்.

உற்பத்தி மற்றும் உள்கட்டமைப்புத் துறைகளில் அரசின் மூலதனச் செலவினத் திட்டங்களை இந்தியப் பெருநிறுவனங்கள் பெரிதும் எதிர்பார்க்கின்றன. உற்பத்தி மற்றும் மூலதனச் செலவினங்களில் அரசு தொடர்ந்து கவனம் செலுத்த வேண்டும் என ஃபிக்கி வலியுறுத்தியுள்ளது. உற்பத்தியாளர்கள் (OEMs), மின்னணு உற்பத்தி சேவை நிறுவனங்கள் (EMS) மற்றும் உதிரிபாக சப்ளையர்களை ஒருங்கிணைக்கும் பெரிய மின்னணு தொழில்துறை மையத்தை நிறுவுவது இத்துறைக்கு உத்வேகம் அளிக்கும் என்றும் அக்கூட்டமைப்பு குறிப்பிட்டது.

"பாதுகாப்பு உற்பத்தியில் அழுத்தம் கொடுப்பதும் சமமாக முக்கியம். முன்னணி உபகரணங்கள், ஆளில்லா விமானங்கள் (UAVs), ஆளில்லா விமான எதிர்ப்பு அமைப்புகள், மின்னணு போர் அமைப்புகள் (EW Systems) மற்றும் செயற்கை நுண்ணறிவு (AI) சார்ந்த திறன்களை நவீனமயமாக்க பாதுகாப்பு ஒதுக்கீடுகளில் மூலதனச் செலவினப் பங்கை 30% ஆக அதிகரிக்க வேண்டும்" என்று ஃபிக்கி கூறியது.

மேலும், "ட்ரோன் உற்பத்தி சார்ந்த ஊக்கத்தொகை (PLI) திட்ட ஒதுக்கீட்டை ரூ. 1,000 கோடியாக உயர்த்துவதும், ரூ. 1,000 கோடி மதிப்பிலான ட்ரோன் ஆராய்ச்சி மற்றும் மேம்பாட்டு நிதியை உருவாக்குவதும் இந்த வளர்ந்து வரும் துறைக்கு பெரும் ஊக்கத்தை அளிக்கும்" என்றும் ஃபிக்கி சுட்டிக்காட்டியது.

உலகளாவிய வர்த்தக சிக்கல்கள் அதிகரித்து, வரிக் கட்டணங்கள் மற்றும் வரிக் கட்டணம் அல்லாத தடைகள் குறித்த நிச்சயமற்ற தன்மை கூடுகையில், ஏற்றுமதித் துறை மத்திய பட்ஜெட்டில் ஒரு விரிவான ஆதரவுத் தொகுப்பை எதிர்பார்க்கிறது.

"இந்தியாவின் ஏற்றுமதி செயல்திறனை வலுப்படுத்தவும், உலகளாவிய மதிப்புச் சங்கிலிகளில் அதன் ஒருங்கிணைப்பை மேம்படுத்தவும், வர்த்தக வசதிகளை சீரமைத்தல் மற்றும் சுங்க செயல்முறைகளை மேம்படுத்துதல், தளவாட மற்றும் துறைமுகம் தொடர்பான தடைகளைக் குறைத்தல், அத்துடன் ஏற்றுமதி ஊக்கத்தொகை மற்றும் பணத்தைத் திரும்பப் பெறும் வழிமுறைகளை வலுப்படுத்துதல் ஆகியவற்றின் அவசியத்தை ஆய்வில் பதிலளித்தவர்கள் வலியுறுத்தியுள்ளனர்." சுங்கவரிக் கட்டணங்களை மூன்று நிலைகளாகக் குறைப்பதன் மூலம் எளிமையான அமைப்பு, அதிக தெளிவு மற்றும் குறைந்த இணக்கச் செலவுகளை உருவாக்க முடியும் என ஃபிக்கி பரிந்துரைத்தது.