வரி வசூலில் புதிய உச்சம்..ரூ. 19.58 கோடி வசூல் செய்து வருமான வரித்துறை சாதனை!

சென்னை: இந்தியாவின் நேரடி வரி வசூல் கடந்த ஆண்டை விட 17.7 சதவீதம் அதிகரித்து, மார்ச் 2024 இல் முடிவடைந்த 2023 - 2024ஆம் நிதியாண்டில் ரூ. 19.58 கோடியை எட்டியுள்ளது. இது எதிர்பார்த்த தொகையை விட அதிக அளவு வித்தியாசத்தில் உள்ளது என்று ஞாயிற்றுக்கிழமை வருமான வரித் துறையின் அறிவிப்பில் தெரிவிக்கப்பட்டுள்ளது.

2023-2024 ஆம் நிதியாண்டில், வருமானம் மற்றும் கார்ப்பரேட் நிறுவனங்கள் மூலம் திரட்டப்பட்ட மொத்தத் தொகை, ஆரம்ப பட்ஜெட் மதிப்பீடுகளை விட ரூ. 1.35 லட்ச கோடியை தாண்டியுள்ளது, இது 7.40 சதவீதம் அதிகமாகும். மேலும், திருத்தப்பட்ட மதிப்பீடுகளை விட ரூ.13,000 கோடியை தாண்டியுள்ளது என வருமான வரித்துறை அறிவித்துள்ளது.

தனி நபர் வருமானம் மற்றும் கார்ப்பரேட் நிறுவனங்களின் வரிகளை உள்ளடக்கிய மொத்த வசூல் 2023-2024 நிதியாண்டில், 18.48 சதவீதம் அதிகரித்து ரூ.23.37 லட்சம் கோடியாக உள்ளது. ரீஃபண்டுகளை கணக்கிட்ட பிறகு, இந்த வரிகளின் நிகர வருமானம் 17.7 சதவீதம் அதிகரித்து ரூ. 19.58 லட்சம் கோடியாக உள்ளது. இந்த வளர்ச்சியானது நல்ல பொருளாதார முன்னேற்றம் மற்றும் தனிநபர்கள், நிறுவனங்களுக்கு வருமான அளவு அதிகரித்திருப்பதைச் சுட்டிக் காட்டுகிறது.

மத்திய நேரடி வரிகள் வாரியம் (CBDT) 2023-24 நிதியாண்டில் மொத்தம் ரூ.3.79 லட்சம் கோடி ரீஃபண்டு தோகை திருப்பிச் செலுத்தப்பட்டுள்ளதாகக் கூறியுள்ளது.

CBDT-இன் அறிக்கையின்படி, 2023-24ஆம் நிதியாண்டில் நேரடி நிகர வசூல் ரூ.19.58 லட்சம் கோடி என்று குறிப்பிடப்பட்டிருக்கிறது. இது முந்தைய நிதியாண்டான 2022-23ல் ரூ.16.64 லட்சம் கோடியாக இருந்தது. 2023-24 நிதியாண்டுக்கான பட்ஜெட் ஆரம்பத்தில் ரூ.18.23 லட்சம் கோடி வசூல் என்று மதிப்பிடப்பட்டிருந்தது, பின்னர் அது ரூ.19.45 லட்சம் கோடியாக மாற்றம் செய்யப்பட்டது.

2023-2024ஆம், நிதியாண்டில் நேரடி வரிகளின் மொத்த வசூல் ரூ.23.37 லட்சம் கோடியாக இருந்தது. இது முந்தைய நிதியாண்டான 2022-23-இல் ரூ.19.72 லட்சம் கோடியாக இருந்த மொத்த வசூலுடன் ஒப்பிடுகையில் 18.48 சதவீதம் அதிகமாகும்.

மொத்த கார்ப்பரேட் வரி வசூல் 13.06 சதவீதம் அதிகரித்து ரூ.11.32 லட்சம் கோடியை எட்டியுள்ளது, இது முந்தைய ஆண்டில் ரூ.10 லட்சம் கோடியாக இருந்தது. 2023-24 நிதியாண்டின் நிகர கார்ப்பரேட் வரி வசூல் ரூ.9.11 லட்சம் கோடியாக இருந்தது, இது முந்தைய ஆண்டு வசூலான ரூ.8.26 லட்சம் கோடியை விட 10.26 சதவீதம் வளர்ச்சியைக் குறிக்கிறது.

2023-24 நிதியாண்டில் பத்திரப் பரிவர்த்தனை வரி (STT) உட்பட மொத்த தனிநபர் வருமான வரி வசூல் ரூ. 12.01 லட்சம் கோடியாக இருந்தது, இது முந்தைய ஆண்டு வசூலான ரூ.9.67 லட்சம் கோடியுடன் ஒப்பிடுகையில் 24.26 சதவீதம் குறிப்பிடத்தக்க அதிகரிப்பைக் காட்டுகிறது.

2023-24 நிதியாண்டில் எஸ்டிடி உட்பட நிகர தனிநபர் வருமான வரி வசூல் ரூ.10.44 லட்சம் கோடியாக இருந்தது, இது முந்தைய நிதியாண்டின் ரூ.8.33 லட்சம் கோடியை விட 25.23 சதவீதம் வளர்ச்சியைக் குறிக்கிறது.