ரஷ்யாவின் மெகா முதலீடு.. சென்னை, மும்பையில் பனி உடைக்கும் கப்பல்கள் முதல் பசுமை கப்பல்கள் வரை..!!

இந்தியா - ரஷ்யா இடையேயான இருதரப்பு உறவுகளை மேலும் வலுப்படுத்தும் வகையில், அடுத்த மாதம் டெல்லியில் பிரதமர் நரேந்திர மோடி மற்றும் ரஷ்ய அதிபர் விளாடிமிர் புடின் சந்திக்கும் உச்சி மாநாட்டிற்கான ஏற்பாடுகள் தீவிரமடைந்துள்ளன. இந்த மாநாட்டில், இரு நாடுகளுக்கும் இடையே ஒரு மிகப் பெரிய பொருளாதார மற்றும் தொழில்நுட்ப ஒத்துழைப்புக்கு அடித்தளம் போடப்பட உள்ளது. முக்கியமாக, இந்தியாவில் உலகத் தரத்திலான கப்பல் கட்டும் மற்றும் கப்பல் பழுதுபார்க்கும் மையங்களை அமைப்பதில் ரஷ்யா முதலீடு செய்வது குறித்து விவாதிக்கப்பட உள்ளது.

முக்கிய பொருளாதார மையங்களில் கவனம் : ரஷ்ய அதிபரின் உதவியாளரும், அந்நாட்டின் கடல்சார் வாரியத்தின் தலைவருமான நிகோலாய் பத்ருஷேவ், உச்சி மாநாட்டுக்கான ஆயத்தப் பணிகளுக்காக டெல்லியில் முக்கிய அதிகாரிகளை சந்தித்தார். அப்போது அவர், "இந்தியாவின் முக்கியமான பொருளாதார மையங்களான மும்பை அல்லது சென்னையில் ரஷ்யாவின் பங்களிப்புடன் கப்பல் கட்டும் மற்றும் பழுதுபார்க்கும் மையங்களை அமைப்பது குறித்து ஆலோசிக்கப்படும்" என்று கூறினார்.

மேலும் அவர் தேசியப் பாதுகாப்பு ஆலோசகர் அஜித் தோவல் உட்பட பல உயர் அதிகாரிகளை சந்தித்து, சிவில் கடல்சார் துறையில் ஒத்துழைப்பை வளர்ப்பது குறித்துப் பேசினார். குறிப்பாக, கப்பல் கட்டுமானம், துறைமுகங்களின் உள்கட்டமைப்பு மேம்பாடு மற்றும் கடல்சார் தளவாடங்கள் ஆகியவற்றில் அதிக கவனம் செலுத்தப்பட்டது. கடலில் ஆய்வு நடவடிக்கைகளுக்கான ஆராய்ச்சிகள் மற்றும் இந்தியக் குழுவினருக்கான பயிற்சி அளிப்பது குறித்தும் ஆலோசிக்கப்பட்டது.

ரஷ்யாவின் தனித்துவமான சலுகைகள் : ரஷ்யா தனது கப்பல் கட்டும் தொழில்நுட்பத்தில் இந்தியாவுக்கு பல தனித்துவமான சலுகைகளை வழங்க தயாராக உள்ளது. இது குறித்து பத்ருஷேவ் தெரிவிக்கையில், "மீன்பிடிப் படகுகள், பயணிகள் கப்பல்கள் மற்றும் துணை கப்பல்களுக்கான புதிய வடிவமைப்புகளை உருவாக்குவது உட்பட பல புதிய திட்டங்களை இந்தியாவிற்கு வழங்க முடியும்" என்று கூறினார்.

குறிப்பாக, கடுமையான பனிக்கட்டிகள் உள்ள பகுதிகளில் கூட செயல்படக்கூடிய பனி வகுப்பு கப்பல்கள் மற்றும் பனியை உடைக்கும் கப்பல்களை உருவாக்குவதில் ரஷ்யாவுக்கு சவாலாக வேறு யாரும் இல்லை என்பதையும் அவர் சுட்டிக்காட்டினார். மேலும், சுற்றுச்சூழல் நட்பு கப்பல் கட்டுமானம் தற்போது இந்தியாவின் முக்கிய முன்னுரிமையாக இருப்பதால், அந்த துறையில் ஒத்துழைக்க வாய்ப்புகள் இருப்பதாகவும் அவர் தெரிவித்தார்.

ரஷ்யா தனது அறிவார்ந்த ஆற்றலை செயின்ட் பீட்டர்ஸ்பர்க்கில் உள்ள கிரைலோவ் மாநில ஆராய்ச்சி மையம் மூலம் பல தசாப்தங்களாக வளர்த்துள்ளது. இந்த கடல்சார் தொழில்நுட்ப நிறுவனத்தின் உதவியுடன், தரப்படுத்தப்பட்ட கப்பல் வடிவமைப்புகளின் ஒரு கூட்டுத் தரவுத்தளத்தை உருவாக்கினால், அது இந்தியாவின் கப்பல் கட்டுமான செலவுகளை கணிசமாக குறைக்க உதவும் என்று புடின் உதவியாளர் நம்பிக்கை தெரிவித்தார். எனவே, இந்த உச்சி மாநாடு, இரு நாடுகளுக்கும் இடையேயான பாதுகாப்பு சார்ந்த உறவுகளை தாண்டி, பொருளாதார மற்றும் வர்த்தக உறவுகளையும் புதிய உச்சத்திற்கு எடுத்துச் செல்லும் என்று எதிர்பார்க்கப்படுகிறது.