இனி ஸ்பீடு அள்ளும்.. இந்தியாவின் முதல் தனியார் செயற்கைக்கோள் இணையம்.. சாதித்த அனந்த் டெக்னாலஜிஸ்..!!

இன்றைய டிஜிட்டல் காலகட்டத்தில் இணைய சேவை என்பது அடிப்படை தேவையாக மாறிவிட்டது. கல்வி, வேலைவாய்ப்பு, வணிகம், அரசுப் பணிகள் மற்றும் சமூக உறவுகள் எல்லாம் இணையத்தின் மூலம் நடைபெறுகின்றன. இணையம் இல்லாதது பலருக்கு தகவல், வாய்ப்பு மற்றும் வளர்ச்சியை அடைய தடையாகிறது. குறிப்பாக, கிராமப்புற பகுதிகள் மற்றும் தொலைதூரங்களில் இணைய வசதி இல்லாதிருப்பது வளர்ச்சிக்கு பெரும் தடையாக உள்ளது. அதிவேகமான இணைய வசதிகள் இல்லாமல் இந்த நவீன உலகில் முழுமையான வாழ்க்கை நடத்துவது கடினமாகிறது. எனவே, அனைவரும் இணையத்தை அணுகக்கூடியதாக செய்வது நியாயமான வளர்ச்சிக்கு மிக முக்கியம்.

அந்த வகையில், ஹைதராபாத்தை தலைமையிடமாகக் கொண்ட அனந்த் டெக்னாலஜிஸ் நிறுவனம், இந்தியாவின் முதல் தனியார் செயற்கைக்கோள் பிராட்பேண்ட் இணைய சேவையை தொடங்க அனுமதி பெற்றுள்ளது. இந்த திட்டத்திற்கு IN-SPACe (Indian National Space Promotion and Authorization Center) அங்கீகாரம் வழங்கியுள்ளது. இத்திட்டம் 2028ஆம் ஆண்டு தொடங்கப்படும் என எதிர்பார்க்கப்படுகிறது. இது முழுக்க முழுக்க இந்தியாவிலேயே தயாரிக்கப்பட்ட செயற்கைக்கோள்கள் ஆகும்.

இத்தகைய முயற்சி, ஸ்டார்லிங்க் (Starlink), ஒன்வெப் (OneWeb) மற்றும் அமேசானின் குய்பர் (Kuiper) போன்ற உலகளாவிய நிறுவனங்களுக்கு நேரடியான போட்டியாக பார்க்கப்படுகிறது. இந்தியாவில் தயாரிக்கப்பட்ட செயற்கைக்கோள்களை பயன்படுத்தி, விண்வெளி அடிப்படையிலான இணைய சேவையை வழங்க அனுமதி பெற்ற முதல் தனியார் இந்திய நிறுவனம் என்ற முக்கியமான இடத்தை அனந்த் டெக்னாலஜிஸ் நிறுவனம் பிடித்துள்ளது.

இந்த சேவை 2028ஆம் ஆண்டுக்குள் தொடங்கப்படும் என திட்டமிடப்பட்டுள்ளது. இதன் மூலம், விண்வெளியில் இருந்து நேரடியாக பிராட்பேண்ட் இணைய சேவை இந்தியா முழுவதும் வழங்கப்படும். குறிப்பாக, இணையம் இல்லாத அல்லது குறைவாக இருக்கும் கிராமப்புறங்கள் மற்றும் தொலைதூரப் பகுதிகள் இதில் மிகுந்த பயனடையும்.

இந்த சேவைக்கு பூமிக்கு மேல் 35,000 கி.மீ. உயரத்தில் அமைந்துள்ள ஜியோஸ்டேஷனரி ஆர்பிட்டில் (Geostationary Orbit) செயல்படும் செயற்கைக்கோள் பயன்படுத்தப்படும். இந்த வகை ஆர்பிட்டில் உள்ள செயற்கைக்கோள், பூமியின் ஒரு குறிப்பிட்ட இடத்தின் மீது நிலைத்திருக்கும். இதனால், அந்த பகுதிக்கான இணைய சேவையை தடையில்லாமல் மற்றும் தொடர்ச்சியாக வழங்க முடியும்.

இந்தத் திட்டம் இந்தியாவின் தனியார் விண்வெளி நிறுவனங்களுக்கு அதிகாரம் அளிக்கும் IN-SPACe மூலம் அங்கீகாரம் பெற்றுள்ளது. இது இந்தியாவின் விண்வெளி துறையை தனியார் நிறுவனங்களுக்கு திறந்து, புதிய கண்டுபிடிப்புகள் மற்றும் வேகமான வளர்ச்சிக்கு ஊக்குவிப்பதாகும். இதுவரை இந்தியாவில் விண்வெளி அடிப்படையிலான இணைய சேவையை வழங்கிய அல்லது வழங்க திட்டமிட்டிருந்தது வெளிநாட்டு நிறுவனங்கள் மட்டுமே. உதாரணமாக எலான் மஸ்கின் ஸ்டார்லிங், ஒன்வெப் மற்றும் அமேசான் குய்பர் போன்றவை. இப்போது அனந்த் டெக்னாலஜிஸ் இந்த துறையில் நுழைந்ததன் மூலம், இந்தியாவுக்கு இந்த முக்கிய தொழில்நுட்பத்தில் உள்ள தனித்துவமான நிறுவனம் உருவாகியுள்ளது.

அனந்த் டெக் இந்தத் திட்டத்தை முடிக்க சுமார் ரூ.3,000 கோடி முதலீடு செய்ய திட்டமிட்டுள்ளது. இது, சாதாரண மொபைல் டவர்கள் அல்லது ஃபைபர் கேபிள்கள் இல்லாத இடங்களிலும் விரைவான இணைய சேவையை இந்தியாவின் அனைத்து பகுதிகளுக்கும் வழங்க முனைகிறது. இதன் மூலம் கிராமப்புறங்களில் கல்வி, சுகாதாரம், வியாபாரம் மற்றும் தொடர்பாடல் மேம்படும் என்று எதிர்பார்க்கப்படுகிறது. ஆனால், இந்நிறுவனத்தால் இன்னும் துல்லியமான தொடக்க தேதி அறிவிக்கப்படவில்லை. செயற்கைக்கோள் பணிகள் மற்றும் சேவை திட்டமிடல் ஏற்கனவே நடைபெற்று வருவது குறிப்பிடத்தக்கது.

கடந்த மாதம், வோடாஃபோன் ஐடியா (Vi) அமெரிக்காவில் உள்ள AST SpaceMobile என்ற நிறுவனத்துடன் கூட்டணி ஏற்பாடு செய்துள்ளது. இதன் மூலம் இந்தியாவில் சாதாரண ஸ்மார்ட்போன்களில் இருந்து நேரடியாக செயற்கைக்கோள் தொலைபேசி சேவைகள் கிடைக்கும். AST SpaceMobile, விண்வெளியில் இருந்து முழுமையாக இயங்கும் உலகின் முதலாவது செல்லுலார் இணையதள நெட்வொர்க்கை உருவாக்கி வருகிறது. இது வணிகத்துறை மற்றும் அரசு துறைகளுக்கு சேவை வழங்க திட்டமிடப்பட்டுள்ளது.

வோடாஃபோன் ஐடியா வெளியிட்ட அறிக்கையில், "Vi மற்றும் AST SpaceMobile இந்தியாவில் இணைக்கப்படாத, தொலைதூர பகுதிகளில் மொபைல் இணையத்தை விரிவுபடுத்தும் நோக்கில் இந்த கூட்டணியை ஏற்படுத்தியுள்ளன. AST SpaceMobile, சாதாரண மொபைல் தொலைபேசிகளை பயன்படுத்தி விண்வெளியில் இருந்து முதல்முறையாக குரல் மற்றும் வீடியோ அழைப்பை வெற்றிகரமாக செய்து, தங்கள் தொழில்நுட்பத்தின் திறனை நிரூபித்துள்ளது" என குறிப்பிடப்பட்டுள்ளது.