2019 அளவீட்டை அடைய முடியாத இந்திய பொருளாதாரம்..!

இந்தியப் பொருளாதாரத்தின் ஜூன் காலாண்டு முடிவுகள் இன்று மத்திய அரசு கட்டுப்பாட்டில் இருக்கும் தேசிய புள்ளியியல் அலுவலகம் வெளியிட்டுள்ளது. கடந்த ஆண்டை ஒப்பிடுகையில் இந்திய பொருளாதாரம் நடப்பு நிதியாண்டில் முதல் காலாண்டில் அதாவது ஏப்ரல் - ஜூன் காலாண்டில் அனைவரும் எதிர்பார்த்தபடியே 20.1 சதவீதம் என்ற வரலாற்று உயர்வைப் பதிவு செய்துள்ளது.

ஆனால் மத்திய அரசு 2 முறை நாட்டின் வளர்ச்சிக்காக ஊக்குவிப்புத் திட்டங்களை அறிவித்தும் 2019-20ஆம் ஆண்டின் ஜூன் காலாண்டு அளவீட்டை இன்னமும் அடையவில்லை என்பது தான் தற்போது வருத்தமான செய்தியாக உள்ளது.

இந்திய பொருளாதாரம் வளர்ச்சி

இந்திய பொருளாதாரம் 2021-22 நிதியாண்டின் ஜூன் காலாண்டில் 32.38 லட்சம் கோடி ரூபாய் அளவிற்கு உயர்ந்துள்ளது. இது கடந்த நிதியாண்டில் அதாவது கொரோனா தொற்று காலகட்டமான 2020-21 நிதியாண்டின் ஜூன் காலாண்டில் 26.95 லட்சம் கோடி ரூபாயாகச் சரிந்தது. இவ்விரு காலாண்டை ஒப்பிடுகையில் தற்போது நாட்டின் மொத்த ஜிடிபி அளவு 20.1 சதவீதமாக உயர்ந்துள்ளது.

பொருளாதார ஊக்குவிப்புத் திட்டம்

கடந்த ஆண்டின் ஜூன் காலாண்டில் இந்தியாவின் ஜிடிபி அளவு சுமார் -24.4 சதவீதம் வரையில் சரிந்துள்ளது யாராலும் மறக்க முடியாது. ஆனால் இதேவேளையில் மத்திய அரசு 2 முறை மிகப்பெரிய தொகைக்குப் பொருளாதார ஊக்குவிப்புத் திட்டத்தை அறிவித்தது. ஆனாலும் இந்தியப் பொருளாதாரம் 2019-20 ஜூன் காலாண்டு அளவீட்டை அடையவில்லை.

வளர்ச்சி அளவீடுகள்

முக்கியத் துறைகள் நடப்பு நிதியாண்டின் ஜூன் காலாண்டில் ஏற்பட்டு உள்ள வளர்ச்சி அளவீடுகள்

விவசாயம், மீன்பிடி துறை : 4.65 லட்சம் கோடியில் இருந்து 4.86 லட்சம் கோடி ரூபாயாக உயர்ந்துள்ளது. இது கிட்டதட்ட 4.5 சதவீதம் வளர்ச்சி

இதேபோல் சுரங்கம் மற்றும் குவாரி : 18.6 சதவீதம் வளர்ச்சி
உற்பத்தி துறை : 49.6 சதவீதம் வளர்ச்சி
மின்சாரம், கேஸ், தண்ணீர் விநியோகம் : 14.3 சதவீதம் வளர்ச்சி
கட்டுமான துறை : 68.3 சதவீதம் வளர்ச்சி
வர்த்தகம், ஹோட்டல், போக்குவரத்து, கம்யூனிகேஷன், சேவை துறை : 34.3 சதவீதம் வளர்ச்சி
நிதியியல் ரியல் எஸ்டேட் : 3.7 சதவீதம் வளர்ச்சி
பொது நிர்வாரம், பாதுகாப்பு மற்றும் இதர சேவை துறை : 5.8 சதவீதம் வளர்ச்சி

 

8 முக்கியத் துறைகள்

இந்த 8 முக்கியத் துறைகள் 2020-21 ஜூன் காலாண்டில் -22.4 சதவீத சரிவை எதிர்கொண்டு இருந்த நிலையில் நடப்பு ஆண்டில் 18.8 சதவீதமாக உயர்ந்துள்ளது. இதேபோல் GVA அளவு கடந்த நிதியாண்டில் 25.65 லட்சம் கோடி ரூபாயாக இருந்து, தற்போது 30.47 லட்சம் கோடி ரூபாயாக உயர்ந்துள்ளது.

2019 அளவீடு

ஆனால் 2019-20 நிதியாண்டில் ஜூன் காலாண்டில் 33.05 லட்சம் கோடி ரூபாயாக இருந்தது. இந்த அளவீட்டை இன்றளவும் அடையவில்லை என்பது தான் தற்போதைய பிரச்சனை.