16 மாத உச்சத்தில் வேலைவாய்ப்பின்மை.. தமிழ்நாட்டின் நிலைமை என்ன தெரியுமா..?

2023 புத்தாண்டு பிறந்தது ஆனால் 2022 ஆம் ஆண்டு மிகவும் மோசமான நிலை உடன் முடிவடைந்துள்ளது. 2022 ஆம் ஆண்டில் இந்தியாவில் ரூபாய் மதிப்பு, நடப்பு கணக்குப் பற்றாக்குறை, ஏற்றுமதி அளவுகள் சரிவு, உற்பத்தியில் மந்த நிலை, உள்நாட்டு தேவையில் பெரிய மாற்றம் இல்லாதது எனப் பல விஷயங்கள் மோசமானதாக மாறிய நிலையில் தற்போது டிசம்பர் மாதம் இந்தியாவின் வேலைவாய்ப்பின்மை பெரிய அளவிலான பாதிப்பை உருவாக்கியுள்ளது.

மத்திய அரசு லட்சம், கோடி வேலைவாய்ப்புகளை உருவாக்கியதாகக் கூறி வருவது மட்டும் அல்லாமல் வருடக் கணக்கில் நாட்டின் பெரும்பாலான மாநிலங்கள் வருடம் முழுவதும் புதிய முதலீடுகளை ஈர்த்ததாகவும், இதன் மூலம் பல ஆயிரம் வேலைவாய்ப்புகளை உருவாக்க உள்ளதாக அறிவித்து வருகிறது.

இந்த நிலையில் டிசம்பர் மாதம் நாட்டின் வேலைவாய்ப்பின்மை அளவீடு 16 மாதம் உச்சத்தைத் தொட்டு உள்ளது.

வேலைவாய்ப்பின்மை விகிதம்

இந்தியாவின் வேலைவாய்ப்பின்மை விகிதம் டிசம்பர் மாதம் யாரும் எதிர்பார்க்காத வகையில் 8.30% ஆக உயர்ந்துள்ளது. இது கடந்த 16 மாதங்களில் இந்தியா எப்போது பார்த்திடாத அளவாக உள்ளது. இதற்கிடையில் 2023 ஆம் ஆண்டின் வல்லரசு நாடுகள் ரெசிஷனுக்குள் நுழையும் எனக் கணக்கிடப்பட்டு உள்ள வேளையில் டிசம்பர் மாதத்திலேயே 16 மாத உச்சத்தை வேலைவாய்ப்பின்மை அளவீட்டில் எட்டியது அதிர்ச்சி அளிக்கிறது.

டிசம்பர் மாத டேட்டா

இந்தியாவின் வேலைவாய்ப்பின்மை அளவு டிசம்பர் மாதத்தில் 8.30% உடன் 16 மாத உச்சத்தைத் தொட்டு உள்ள நிலையில் நவம்பர் மாதத்தில் 8.00% ஆக இருந்தது என்று இந்திய பொருளாதாரக் கண்காணிப்பு மையத்தின் (CMIE) தரவு ஞாயிற்றுக்கிழமை காட்டியது.

நகர்ப்புற வேலைவாய்ப்பின்மை

டிசம்பர் மாதம் ஒட்டுமொத்த இந்தியாவில் வேலைவாய்ப்பின்மை அளவீடு 8.30% ஆக இருந்த நிலையில், நகர்ப்புற வேலைவாய்ப்பின்மை விகிதம் 8.96% இல் இருந்து 10.09% ஆக உயர்ந்துள்ளது. அதே நேரத்தில் கிராமப்புற வேலைவாய்ப்பின்மை விகிதம் 7.55% இல் இருந்து 7.44% ஆகச் சரிந்துள்ளது என்று CMIE தரவு காட்டுகிறது.

மக்கள் தொகையின் பங்கீடு

இதில் முக்கியமான விஷயம் என்னவென்றால் வேலைவாய்ப்புச் சந்தைகளில் ஒட்டுமொத்த மக்கள் தொகையின் பங்கீடு 40.48 சதவீதமாக உயர்ந்துள்ள நிலையில், வேலைவாய்ப்பின்மை அளவு நவம்பர் மாதத்தில் 8.00% அளவில் இருந்து டிசம்பர் மாதத்தில் 8.30% வரை உயர்ந்தது பெரிய பாதிப்பு இல்லை என CMIE அமைப்பின் தலைவர் மகேஷ் வியஸ் தெரிவித்துள்ளார்.

தமிழ்நாடு

இதற்கிடையில் தமிழ்நாட்டின் வேலைவாய்ப்பின்மை அளவு டிசம்பர் மாதத்தில் 4.1 சதவீதமாக உள்ளது. நவம்பர் மாதம் இதன் அளவு 3.8 சதவீதமாகவும், அக்டோபர் மாதம் 3.3 சதவீதமாகவும், செப்டம்பர் மாதம் 4.1 சதவீதமாகவும் இருந்தது. கடந்த ஆண்டு இதே டிசம்பர் மாதம் 6.9 சதவீதமாக உள்ளது.

பிற மாநிலங்கள்

ஒடிசா - 0.9 சதவீதம்
குஜராத் - 2.3 சதவீதம்
கர்நாடகா - 2.5 சதவீதம்
மேகாலயா - 2.7 சதவீதம்
மகாராஷ்டிரா - 3.1 சதவீதம்
மத்திய பிரதேசம் - 3.2 சதவீதம்
சத்தீஸ்கர் - 3.4 சதவீதம்
தமிழ்நாடு - 4.1 சதவீதம்
தெலுங்கானா - 4.1 சதவீதம்
உத்தரகாண்ட் - 4.2 சதவீதம்
உத்தரப்பிரதேசம் - 4.3 சதவீதம்
அசாம் - 4.7 சதவீதம்
புதுச்சேரி - 4.7 சதவீதம்
மேற்கு வங்காளம் - 5.5 சதவீதம்
பஞ்சாப் - 6.8 சதவீதம்
கேரளா - 7.4 சதவீதம்
ஹிமாச்சல பிரதேசம் - 7.6 சதவீதம்
ஆந்திரப் பிரதேசம் - 7.7 சதவீதம்
கோவா - 9.9 சதவீதம்
சிக்கிம் - 13.6 சதவீதம்
திரிபுரா - 14.3 சதவீதம்
ஜம்மு & காஷ்மீர் - 14.8 சதவீதம்
ஜார்கண்ட் - 18 சதவீதம்
பீகார் - 19.1 சதவீதம்
டெல்லி - 20.8 சதவீதம்
ராஜஸ்தான் - 28.5 சதவீதம்
ஹரியானா - 37.4 சதவீதம்