இந்தியாவில் மட்டும் தான் இப்படியெல்லாம் நடக்கும்..!

உலக வங்கி சமீபத்தில் வெளியிட்ட ஆய்வில், கொரோனா தொற்றுநோயால் 2020 ஆம் ஆண்டில் வறுமை கோட்டிற்குத் தள்ளப்பட்ட மக்கள் தொகையில் கிட்டத்தட்ட 80 சதவீதம் பேர் இந்தியாவைத் தேர்ந்தவர்கள் எனத் தெரிவித்து இருந்தது.

இதேவேளையில் 100 மில்லியன் டாலருக்கும் அதிகமாகச் சொத்து மதிப்பு வைத்துள்ளது பணக்காரர்களைக் கொண்ட நாடுகளில் இந்தியா உலகளவில் மூன்றாவது இடத்திற்கு முன்னேறி உள்ளது.

உலகில் பிற எந்த நாடுகளிலும் இல்லாத வகையில் இந்தியாவில் ஏழை மற்றும் பணக்காரர்கள் மத்தியில் அதிகளவிலான வித்தியாசம் உருவாகியுள்ளது.

செண்டி மில்லியனர்கள்

$100 மில்லியன் சொத்துக்களைக் கொண்ட தனிநபர்களைச் செண்டி மில்லியனர்கள் என அழைக்கப்படுகிறது, அதாவது 830 கோடி ரூபாய்க்கு மேல் சொத்து வைத்திருப்பவர்கள். இந்த நிலையில் செண்டி மில்லியனர்கள் குறித்த முதல் உலகளாவிய ஆய்வில், அமெரிக்கா மற்றும் சீனா நாடுகளைத் தொடர்ந்து இந்தியா 3வது இடத்தில் உள்ளது.

இந்தியா

உலகளவில் முதலீடுகள் பெரிய அளவில் மாறியுள்ளதை அடுத்து இந்தியாவில் செண்டி மில்லியனர்கள் எண்ணிக்கை பெரிய அளவில் அதிகரித்துள்ளது. அடுத்தப் பத்து ஆண்டுகளில் இந்தப் பட்டியலில் அமெரிக்கா, சீனா-வை பின்னுக்குத்தள்ளி இந்தியா முதல் இடத்தைப் பிடிக்க அதிகளவிலான வாய்ப்புகள் உள்ளது எனச் சர்வதேச முதலீட்டு இடம்பெயர்வு ஆலோசனை நிறுவனமான ஹென்லி & பார்ட்னர்ஸ் புதிய அறிக்கையில் தெரிவிக்கப்பட்டு உள்ளது.

25,490 சென்டி மில்லியனர்கள்

உலகளவில் 25,490 சென்டி மில்லியனர்கள் உள்ள நிலையில், இங்கிலாந்து, ரஷ்யா மற்றும் சுவிட்சர்லாந்து போன்ற நாடுகளைப் பின்னுக்குத் தள்ளி 1,132 சென்டி மில்லியனர்கள் கொண்டு 3வது இடத்தில் உள்ளது. இப்பட்டியலில் தொழில்நுட்ப வல்லுனர்கள் , நிதியாளர்கள், பன்னாட்டுத் தலைமை நிர்வாக அதிகாரிகள் மற்றும் பணக்காரர்களின் வாரிசுகள் உள்ளனர்.

அமெரிக்கா, சீனா

அமெரிக்கா 9,730 பெரும் பணக்காரர்களுடன் முன்னணியில் உள்ளது, இதன் மூலம் உலகளவில் சென்டி-மில்லியனர்களில் 38% அமெரிக்காவில் உள்ளனர். சீனாவில் 2,021 சென்டி மில்லியனர்கள் உள்ளனர். இந்த எண்ணிக்கை 2032 ஆம் ஆண்டுக்குள் இந்தியா முந்திவிடும் என்று கணிக்கப்பட்டு உள்ளது.

100 மில்லியன் டாலர்

இங்கிலாந்து 968 சென்டி மில்லியனர்களுடன் 4வது இடத்திலும், ஜெர்மனி 966 பேருடன் 5வது இடத்திலும் உள்ளது. 1990களில் 30 மில்லியன் டாலர் வைத்திருந்தாலே super wealthy எனக் கூறப்பட்ட நிலையில் தற்போது சொத்துக்களின் மதிப்பு அதிகரிப்புக் காரணமாகச் சென்டி மில்லியனருக்கான அளவீடு 100 மில்லியன் டாலராக உயர்ந்துள்ளது.