சீனாவை பின்னுக்கு தள்ளி இந்திய பொருளாதாரம் முன்னேறும்.. அமெரிக்க தொழிலதிபர் சொன்ன பாசிட்டிவ் தகவல்!

சர்வதேச அளவில் வேகமாக வளர்ந்து வரும் பொருளாதாரமாக இந்திய பொருளாதாரம் இருக்கிறது. இந்நிலையில் 2100 ஆம் ஆண்டில் இந்திய பொருளாதாரம் சீன பொருளாதாரத்தை மிஞ்சி இருக்கும் என அமெரிக்க தொழிலதிபரான ஜான் சேம்பர்ஸ் தெரிவித்துள்ளார். சிஸ்கோ சிஸ்டம்ஸ் (Cisco Systems) நிறுவனத்தின் தலைமை செயல் அதிகாரியும் அமெரிக்க தொழில்துறையின் முக்கியமான நபருமான ஜான் சேம்பர்ஸ் எக்னாமிக் டைம்ஸ் தளத்திற்கு பேட்டி அளித்துள்ளார்.

அதில் இந்திய பொருளாதாரம் குறித்து பல்வேறு பாசிட்டிவான தகவல்களை பகிர்ந்துள்ளார். புதுமை மற்றும் வளர்ச்சி ஆகிய இரண்டு பிரிவுகளிலும் அடுத்த சில ஆண்டுகளில் இந்தியா மிகச் சிறந்த வளர்ச்சி அடையும் என ஜான் சேம்பர்ஸ் நம்பிக்கை தெரிவித்துள்ளார்.

அமெரிக்கா மற்றும் இந்தியா இடையிலான உறவு சர்வதேச அளவில் பெரிய தாக்கத்தை ஏற்படுத்தி வருவதாக ஜான் சேம்பர்ஸ் தெரிவித்துள்ளார். மேலும் அடுத்த சில ஆண்டுகளில் அமெரிக்கா மற்றும் இந்தியா இடையிலான உறவு மேலும் வலுப்படும் என நம்பிக்கை தெரிவித்துள்ள அமெரிக்காவில் எந்த கட்சி ஆட்சி அமைத்தாலும் இந்தியாவுடன் சிறந்த நட்புறவை கொண்டிருப்பதற்கே விரும்புகின்றனர் எனக் கூறியுள்ளார்.

கடந்த 10 ஆண்டுகளாக மோடி தலைமையிலான அரசு இந்தியாவில் பல்வேறு சிறப்பான நடவடிக்கைகளை எடுத்து இருக்கிறது என்றும் அதன் காரணமாகவே மக்கள் அவருக்கு மூன்றாவது வாய்ப்பை தந்துள்ளனர் என்றும் அவர் கூறியுள்ளார்.

நரேந்திர மோடி தலைமையிலான அரசு மீண்டும் ஆட்சி அமைத்திருப்பதன் மூலம் வெளிநாட்டு நிறுவனங்கள் இந்தியாவில் முதலீடு செய்வதை பாதுகாப்பானதாக கருதுகின்றன என தெரிவித்துள்ளார். அடுத்த சில ஆண்டுகளில் இந்தியா உலகின் முன்னணி பொருளாதாரமாக உருவாகும் எனக் கூறியுள்ளார்.

நடப்பு நூற்றாண்டின் இறுதிக்குள் இந்திய பொருளாதாரம் சீன பொருளாதாரத்தை மிஞ்சிவிடும் என அவர் கணிப்பு தெரிவித்துள்ளார். அடுத்த 30 - 40 ஆண்டுகாலத்தில் இந்திய பொருளாதாரம் உலகின் இரண்டாவது பெரிய பொருளாதாரமாக உருவாகும் என்றும் அவர் கூறியுள்ளார். அதாவது சீனாவை விட 90% உயர்ந்த பொருளாதாரமாக இந்தியா மாறும் என தெரிவித்துள்ளார்.

செயற்கை நுண்ணறிவு, செமி கண்டக்டர் உள்ளிட்ட துறைகளில் இந்திய அரசும் , தொழில் நிறுவனங்களும் கவனம் செலுத்தி வருவதை அவர் சுட்டிக்காட்டியுள்ளார். இந்த நூற்றாண்டுக்கான நாடாக இந்தியா மாறும் என்றும் அதற்கு ஏற்ற வகையில் பொருளாதார திட்டங்களை கொண்டு வர வேண்டிய சவாலான பணி மோடி அரசுக்கும் இருப்பதாகவும் அவர் கூறியுள்ளார்.

Written by: Devika