கௌதம் அதானி-க்கு Z பிரிவு VIP பாதுகாப்பு.. மத்திய அரசு ஒப்புதல்..!

கௌதம் அதானி

மத்திய பாதுகாப்பு ஏஜென்சிகள் தயாரித்த அச்சுறுத்தல் அறிக்கையின் அடிப்படையில், 60 வயதான இந்தியாவின் பெரும் பணக்காரர் மற்றும் உலகின் 4வது பெரும் பணக்காரர் ஆக விளங்கும் கௌதம் அதானிக்கு மத்திய அரசு பட்டியலின் கீழ் பாதுகாப்பு அளிக்கப்பட்டு உள்ளது.

சிஆர்பிஎஃப் விஐபி பாதுகாப்பு

மத்திய ரிசர்வ் போலீஸ் படை (சிஆர்பிஎஃப்) விஐபி பாதுகாப்புப் பிரிவை இந்தப் பணியை மேற்கொள்ளுமாறு மத்திய உள்துறை அமைச்சகம் உத்தரவிட்டு உள்ளது. இந்தியாவில் பல தொழிலதிபர்களுக்கு இதுபோன்ற உயர்மட்ட பாதுகாப்புகள் வழங்கப்பட்டு உள்ளது. இந்தியாவில் Z பிரிவு பாதுகாப்பு என்பது 3வது தர பாதுகாப்பாகும்.

முகேஷ் அம்பானி

இந்தியாவின் மிகப்பெரிய வர்த்தகக் குழுமமாக இருக்கும் ரிலையன்ஸ் இண்டஸ்ட்ரீஸ் தலைவர் முகேஷ் அம்பானி-க்கு 2013 ஆம் ஆண்டு CRPF கமாண்டோக்களின் Z வகைப் பாதுகாப்பு மத்திய அரசால் வழங்கப்பட்டது குறிப்பிடத்தக்கது. இதைத் தொடர்ந்து சில ஆண்டுகளிலேயே முகேஷ் அம்பானியின் மனைவி நீதா அம்பானி-க்கு Z வகை அல்லாமல் குறைந்த பிரிவு பாதுகாப்பு வழங்கப்பட்டது.

33 பாதுகாப்பு அதிகாரிகள்

இந்த Z பிரிவு பாதுகாப்பில் 3 முதல் 4 CRPF கமாண்டோக்கள் மற்றும் சுமார் 30 காவல் துறை அதிகாரிகள் என 33 முதல் 35 பாதுகாப்பு அதிகாரிகள் எப்போது கௌதம் அதானி-யை சுற்றியே இருப்பார்கள். பொதுவாக இந்தப் பாதுகாப்பு மத்திய அரசு நாட்டின் பொருளாதாரம், அரசுக்கு முக்கியமானவர்கள், அச்சுறுத்தல் எதிர்கொள்ளும் முக்கிய நபர்களுக்கு வழங்கப்படும்.

மாபெரும் வளர்ச்சி

கௌதம் அதானி சொத்து மதிப்பு 2020 முடிவில் வெறும் 8.9 பில்லியன் டாலராக இருந்த நிலையில் 2 வருடத்தில் அதிகப்படியான நிறுவன கைப்பற்றல் மற்றும் வர்த்தக விரிவாக்கம் ஆகியவற்றின் மூலம் அதானியின் சொத்து மதிப்பு இன்றைய வர்த்தக முடிவில் சுமார் 134 பில்லியன் டாலராக உயர்ந்துள்ளது.