ஐடி ஊழியர்களின் சம்பள உயர்வை குறைத்த ஐடி நிறுவனங்கள்.. ஷாக் தகவல்..!!

தகவல் தொழில்நுட்ப நிறுவனங்களில் ஊழியர்களுக்கான ஊதிய உயர்வு ஒரு இலக்கத்திற்கு குறைந்து இருப்பது தெரியவந்துள்ளது. இந்தியாவில் செயல்பட்டு வரக்கூடிய தகவல் தொழில்நுட்ப நிறுவனங்கள் தங்கள் நிறுவன ஊழியர்களுக்கு இரண்டு இலக்கங்களில் ஊதிய உயர்வினை வழங்கி வந்த நிலையில் இந்த ஆண்டு அது ஒரு இலக்கமாக குறைந்துள்ளது.

ஐடி நிறுவனங்களின் ஆண்டு நிதி அறிக்கை அடிப்படையில் டைம்ஸ் ஆஃப் இந்தியா வெளியிட்டுள்ள செய்தியில், 2024ஆம் நிதியாண்டில் பெரும்பாலான ஐடி நிறுவனங்கள் தங்களது ஊழியர்களுக்கு 5% - 9% வரை ஊதிய உயர்வு வழங்கி இருப்பது தெரிய வந்துள்ளது. வழக்கமாக தங்களது ஊழியர்களுக்கு அதிகபட்ச ஊதிய உயர்வு வழங்குவது இன்போசிஸ் நிறுவனம் தான். ஆனால் இந்த முறை இன்போசிஸ் நிறுவனமே ஊழியர்களுக்கு சராசரியாக 9% ஊதிய உயர்வினை மட்டுமே தந்துள்ளது.

2024 ஆம் நிதி ஆண்டில் டிசிஎஸ் நிறுவனம் தங்களது ஊழியர்களுக்கு 7%- 9% ஊதிய உயர்வினை தந்துள்ளது. இன்போசிஸ் நிறுவனம் 9%, விப்ரோ 9.4 %, டெக் மகேந்திரா 5.6% என தங்களது ஊதிய உயர்வு விகிதத்தினை குறைத்துள்ளன. இதே நிறுவனங்கள் 2022ஆம் நிதியாண்டில் 10% - 15 % சதவீதம் வரை ஊதிய உயர்வு தந்திருந்தன.

தற்போது நிலவி வரக்கூடிய பொருளாதார சூழல் காரணமாக ஐடி நிறுவனங்கள் தங்களுடைய செலவினங்களை குறைக்கும் நடவடிக்கைகளில் ஈடுபட்டு வருகின்றன இதன் ஒரு பகுதியாக தங்கள் ஊழியர்களுக்கான ஊதிய உயர்வினை குறைத்து இருப்பதாக நிபுணர்கள் கூறுகின்றனர்.

ஐடி நிறுவனங்களில் மொத்த தொழிலுக்கான செலவு அதிகரித்து வருவது மற்றும் இந்தியாவில் நுழைவு நிலையில் வேலைக்கு அதிகமானவர்கள் தயாராக இருப்பது ஆக இரண்டு காரணங்களால் ஐடி நிறுவனங்கள் ஊதிய உயர்வினை குறைத்து இருப்பதாக தெரிவிக்கிறது ஐடி நிறுவனங்களுக்கு ஊழியர்களை பணிக்கு தேர்வு செய்யும் ஒரு அமைப்பு.

அதே வேளையில் ஐடி நிறுவனங்கள் தகவல் தொழில்நுட்பத்தில் ஆழ்ந்த அறிவு கொண்ட திறமையான பணியாளர்களுக்கு 12 முதல் 15 % வரை ஊதிய உயர்வு அளித்து அவர்களை தக்க வைத்துள்ளன துறை சார்ந்த நிபுணர்கள் கூறுகின்றனர். செயற்கை நுண்ணறிவு, மிசின் லேர்னிங், சைபர் செக்யூரிட்டி, கிளவுட் கம்ப்யூட்டிங் மற்றும் டேட்டா அனலிட்டிக்ஸ் ஆகியவற்றில் சிறந்து விளங்கக்கூடிய நபர்களுக்கான ஊதிய உயர்வு இரண்டு இலக்கத்தில் தான் இருக்கிறது என கூறுகின்றனர்.

எனவே ஐடி துறையில் கால் பதிக்க விரும்புவோர் இது போன்ற துறைகளில் நிபுணத்துவம் பெற்றுக் கொள்வது அதிகபட்ச ஊதிய உயர்வுக்கு வழி வகுக்கும்.

Story written by: Devika