இந்தியாவை விட ஜெர்மனியில் நிம்மதியாக இருக்கலாம்.. ஏன் தெரியுமா? இந்திய ஐடி ஊழியரின் வைரல் பதிவு..!!

ஜெர்மனியில் வேலை பார்த்து வரும் ஒரு இந்திய மென்பொருள் பொறியாளர், இந்தியாவுக்கும் ஐரோப்பிய நாடுகளுக்கும் இடையிலான வேலை கலாச்சாரத்தில் இருக்கும் பெரிய வித்தியாசங்களை பற்றி வெளிப்படையாக பேசியுள்ளார். அவரது அனுபவம் குறித்த பதிவு, இந்தியர்கள் மத்தியில் இருக்கும் பணிச் சுமை குறித்த கவலைகளை எழுப்பியுள்ளது.

இந்தியாவில் 200% உழைப்பு : கௌஸ்தவ் பானர்ஜி என்ற அந்தப் பொறியாளர், தான் பட்டப்படிப்பை முடித்த 2013-ஆம் ஆண்டில் "வேலைக்கும் தனிப்பட்ட வாழ்க்கைக்கும் உள்ள சமநிலை" (Work-Life Balance) என்ற வார்த்தையை கேள்விப்பட்டதே இல்லை என்று கூறியுள்ளார்.

இந்தியாவில் ஊழியர்கள் தங்களால் முடிந்ததை விட 200% அதிகமாக உழைக்க வேண்டும் என்று எதிர்பார்க்கப்படுகிறார்கள். இதனால், அவர்கள் சீக்கிரமே சோர்வடைந்து மன அழுத்தத்திற்கு ஆளாகி உடல் நலம் பாதிக்கப்படுகிறார்கள்.

ஆரோக்கியத்தின் மீது கவலை இல்லை : இங்கு யாரும் உங்கள் தனிப்பட்ட ஆரோக்கியத்தைப் பற்றியோ, குடும்பச் சிக்கல்கள் பற்றியோ கவலைப்படுவதில்லை. "வேலை, வேலை, வேலை மட்டும்தான் ஒரே குறிக்கோள். வேகமாக காரியங்களை முடித்துக் கொண்டே இருக்க வேண்டும் என்ற அழுத்தம், ஓய்வுக்கே இடம் கொடுப்பதில்லை" என்று அவர் கவலை தெரிவித்துள்ளார்.

வார விடுமுறைக்கு போராட்டம் : இந்தியாவில் விடுமுறை நாட்கள் இருந்தாலும், அதை எடுக்க முயல்வது வாழ்க்கையிலேயே மிகப் பெரிய சவாலாக இருக்கும் என்று அவர் கூறியுள்ளார். விடுமுறைக்கு விண்ணப்பித்தாலும், அதை நிறுவனங்கள் அவ்வளவு எளிதில் அனுமதிப்பதில்லை. மேலும், வார இறுதி நாட்களில் அதிகமாக வேலை செய்தால், அதற்கு ஈடாக கிடைக்க வேண்டிய விடுமுறை நாட்களும் (Compensatory Off) பெரும்பாலும் கொடுக்கப்படுவதில்லை என்று அவர் குறிப்பிட்டுள்ளார்.

ஜெர்மனியில் நிம்மதி : ஆனால், ஜெர்மனிக்கு வேலைக்காக சென்ற பிறகு கௌஸ்தவ் பானர்ஜியின் நிலைமை முற்றிலும் மாறிவிட்டது. அங்கு அவர் தனிப்பட்ட நேரத்தை மதிக்கும் ஒரு வேலைச் சூழலை சந்தித்துள்ளார்.

மன ஆரோக்கியத்திற்கு முன்னுரிமை : ஜெர்மனியில் ஊழியர்களின் மன ஆரோக்கியத்திற்கு அதிக முக்கியத்துவம் கொடுக்கப்படுகிறது. அலுவலக நேரம் முடிந்தவுடன், ஊழியர்கள் தங்கள் வேலையில் இருந்து முழுமையாக துண்டித்துக் கொள்ள ஊக்குவிக்கப்படுகிறார்கள்.

எண்ணற்ற நன்மைகள் : தான் ஜெர்மனிக்கு வந்த பிறகு அனுபவித்த நல்ல விஷயங்களை "பட்டியலிட முடியாத அளவுக்கு அதிகம்" என்றும் அவர் உற்சாகத்துடன் கூறியுள்ளார்.

கௌஸ்தவ் பானர்ஜியின் இந்த கருத்தை ஆதரித்து ஏராளமானோர் கருத்துத் தெரிவித்து வருகின்றனர். அதேநேரம், அனைத்து இந்திய நிறுவனங்களையும் இப்படி சொல்ல முடியாது என்றும், இங்குள்ள வேலைச் சூழலும் மாறி வருகிறது என்றும் ஒரு சிலர் வாதிடுகின்றனர்.