1 கோடிக்கு மேல் சம்பளம்.. இத்தனை பேரா..? ஐடி துறை வெளியிட்ட அதிரடி ரிப்போர்ட்..!

2022-23 ஆம் நிதியாண்டுக்கான வருமான வரி அறிக்கையை 99 சதவீதம் பேர் தாக்கல் செய்த நிலையில், பல முக்கியமான தரவுகள் தற்போது வெளியாகியுள்ளது. இதில் முக்கியமாக கொரோனா தொற்றுக்கு பின்பு பலர் பல நிறுவனங்களுக்கு மாறிய நிலையில் பெரும்பாலானோரின் சம்பளம் உச்சத்தை அடைந்துள்ளது.

2022-23 நிதியாண்டில் 1 கோடி ரூபாய்க்கு மேல் வருமானம் பெறுவதற்காக சுமார் 2.69 லட்சத்துக்கும் அதிகமானோர் வருமான வரிக் கணக்குகளை தாக்கல் செய்துள்ளனர், இது கொரோனா தொற்றுநோய்க்கு முந்தைய 2018-19 ஆண்டை ஒப்பிடுகையில் 49.4 சதவீதம் அதிகமாகும்.

வருமான வரித் துறையின் இ-ஃபைலிங் தரவுகளின்படி 2022-23 நிதியாண்டில் 1 கோடி ரூபாய்க்கு மேல் வருமானம் ஈட்டி 2.69 லட்சம் வருமான வரிக் கணக்குகளை தாக்கல் செய்துள்ளனர். இது 2021-22 ஆம் நிதியாண்டில் 1.93 லட்சமாகவும், 2018-19 ஆம் நிதியாண்டில் 1.80 லட்சமாகவும் உள்ளது.

இதேநேரத்தில் 5 லட்சம் ரூபாய் வரையிலான வருமானம் கொண்டவர்கள் தாக்கல் செய்யும் வருமான வரி அறிக்கைகளின் எண்ணிக்கை 1.4 சதவீதம் வரையில் மட்டுமே அதிகரித்துள்ளது. இப்பிரிவில் 2022-23 ஆம் நிதியாண்டில் 5 லட்சம் ரூபாய் வரையிலான வருமானத்துடன் அறிக்கை தாக்கல் செய்தவர்கள் எண்ணிக்கை 4.97 கோடி, 2021-22 ஆம் நிதியாண்டில் 4.75 கோடி, 2020-21 ஆம் நிதியாண்டில் இதன் எண்ணிக்கை 5.68 கோடியாகும்.

மாநில வாரியாக பார்க்கும் போதும் மகாராஷ்டிரா மாநிலத்தில் இருந்து சுமார் 1.12 கோடி பேர் வருமான வரி அறிக்கை தாக்கல் செய்துள்ளனர், உத்தர பிரதேசத்தில் இதன் எண்ணிக்கை 75.72 லட்சமாக உள்ளது, குஜராத்தில் இருந்து 75.62 லட்சம் பேரும், ராஜஸ்தானில் 50.88 லட்சம் பேரும் வருமான வரி அறிக்கையை தாக்கல் செய்துள்ளனர்.

இதில் ஒரு கோடி ரூபாய்க்கும் அதிகமாக வருமானம் கொண்டவர்களாக தாக்கல் செய்தோரின் எண்ணிக்கை 0.3 சதவீதமாக உள்ளது. இதே மொத்த வருமான வரி அறிக்கையில் 5 லட்சத்திற்கும் குறைவான வருமானம் கொண்டவர்களின் அளவு 72.6 சதவீதமாகும்.