8 வருட சரிவில் சில்லறை பணவீக்கம்.. அடிதூள் இது வேற லெவல் சம்பவமாச்சே..!!

இந்தியாவின் சில்லறை பணவீக்கம் ஜூலை மாதத்தில் 1.55 சதவீதமாக குறைந்துள்ளது. இது கடந்த எட்டு ஆண்டுகளில் இல்லாத அளவுக்குக் குறைந்தபட்ச சதவீதமாகும். மத்திய அரசு வெளியிட்டுள்ள அதிகாரப்பூர்வத் தகவல்படி, ஜூன் மாதத்தில் 2.1 சதவீதமாக இருந்த பணவீக்கம் தற்போது 1.55 சதவீதமாக குறைந்துள்ளது. கடந்த 2019 ஜனவரி மாதத்திற்குப் பிறகு, சில்லறை பணவீக்கம் 2 சதவீதத்திற்கும் கீழே குறைவது இதுவே முதல் முறை. இதேபோல் ஜூலை 2017 அளவை காட்டிலும் குறைவான அளவீட்டை பதிவு செய்துள்ளது.

கடந்த ஆறு மாதங்களாக 4 சதவீதத்திற்கும் குறைவாக இருந்த சில்லறை பணவீக்கம், ஏப்ரல் மாதம் முதல் சராசரியாக 3 சதவீதத்திற்கும் குறைவாகவே இருந்து வருகிறது. உணவுப் பொருட்களின் பணவீக்கம் தொடர்ந்து இரண்டாவது மாதமாக எதிர்மறையாகவே பதிவாகியுள்ளது கவனிக்க வேண்டிய விஷயமாக உள்ளது. ஜூன் மாதத்தில் -1.1 சதவீதமாக இருந்த பணவீக்கம், தற்போது -1.8 சதவீதமாக குறைந்துள்ளது. சில்லறை பணவீக்கத்தில் உணவு பொருட்கள் பணவீக்கம் பெரும் பங்கு வகிக்கிறது.

சமீபத்தில் நடைபெற்ற ரிசர்வ் வங்கியின் நாணய கொள்கை கூட்டத்தில், இந்திய ரிசர்வ் வங்கி நடப்பு நிதியாண்டுக்கான பணவீக்க கணிப்பை 3.7 சதவீதத்திலிருந்து 3.1 சதவீதமாகக் குறைத்தது. மேலும், இரண்டாவது காலாண்டில் பணவீக்கம் சராசரியாக 2.1 சதவீதமாகவும், மூன்றாவது காலாண்டில் 3.1 சதவீதமாகவும், நான்காவது காலாண்டில் 4.4 சதவீதமாகவும் இருக்கும் என மத்திய வங்கி மதிப்பிட்டுள்ளது.

கிராமப்புறங்களில் உணவு பணவீக்கம் -1.74% ஆகவும், நகர்ப்புறங்களில் -1.90% ஆகவும் பதிவாகியுள்ளது. இந்த வீழ்ச்சிக்கு முக்கிய காரணம், பயறு வகைகள், காய்கறிகள், தானியங்கள், முட்டை, சர்க்கரை மற்றும் இனிப்பு பொருட்களின் விலைகள் குறைந்ததாகும். இந்த பொருட்களின் விலை குறைவு, சந்தையில் புழக்கத்தில் உள்ள பொருட்களின் அளவு மற்றும் சாதகமான அடிப்படை விளைவுகள் ஆகியவற்றால் ஏற்பட்டுள்ளது. இதனால், பொதுமக்களுக்கு அத்தியாவசிய உணவு பொருட்களை மலிவு விலையில் வாங்குவது சாத்தியமாகியுள்ளது.

கிராமப்புற மற்றும் நகர்ப்புற பகுதிகளில் ஒட்டுமொத்த பணவீக்கம் குறைந்துள்ளது. கிராமப்புறங்களில் முதன்மை பணவீக்கம் ஜூன் மாதத்தில் 1.72% ஆக இருந்தது, ஜூலையில் 1.18% ஆக குறைந்தது. அதேபோல், நகர்ப்புறங்களில் பணவீக்கம் 2.56% இலிருந்து 2.05% ஆக குறைந்துள்ளது. இந்த வீழ்ச்சி, உணவு பொருட்களின் விலைகள் குறைந்ததோடு, பொருளாதாரத்தில் மற்ற முக்கிய துறைகளிலும் ஏற்பட்ட மாற்றங்களால் உருவானது.

வீட்டு வசதி தொடர்பான பணவீக்கம் (Housing inflation) 3.17% ஆக நிலையாக உள்ளது, இது கடந்த மாதங்களில் பெரிய மாற்றங்களை காட்டவில்லை. இது, வீட்டு வசதி துறையில் செலவுகள் குறித்து ஒரு நிலையான சூழ்நிலை இருப்பதை காட்டுகிறது.

மறுபுறம், கல்வி தொடர்பான பணவீக்கம் 4.00% ஆக குறைந்துள்ளது, இது மாணவர்கள் மற்றும் பெற்றோர்களுக்கு கல்வி செலவுகளை சற்று குறைக்கிறகு.

சுகாதார துறையில் பணவீக்கம் 4.57% ஆக சற்று உயர்ந்துள்ளது. இது மருத்துவ சேவைகள் மற்றும் மருந்து விலைகளில் ஏற்பட்ட சிறு உயர்வைக் குறிக்கிறது. இதற்கு மருத்துவ உபகரணங்கள் மற்றும் சேவைகளின் தேவை அதிகரித்தது ஒரு காரணமாக இருக்கலாம்.

எரிபொருள் மற்றும் மின்சாரம் தொடர்பான பணவீக்கம் 2.67% ஆக சிறிது உயர்ந்துள்ளது. இந்த உயர்வு, சர்வதேச எரிபொருள் விலைகளில் ஏற்படும் ஏற்ற இறக்கங்களால் பாதிக்கப்பட்டிருக்கலாம் என்று வல்லுநர்கள் கருதுகின்றனர்.

போக்குவரத்து மற்றும் தொலைத்தொடர்பு துறையில் பணவீக்கம் 2.12% ஆக குறைந்துள்ளது, இது குறிப்பிடத்தக்க வீழ்ச்சியாகும். இந்த குறைவு, பயண செலவுகள் மற்றும் தொலைத்தொடர்பு சேவைகளின் விலைகள் குறைந்ததால் ஏற்பட்டுள்ளது.