கூமாபட்டி விட ஒரு பெரிய விஷயம் நடந்திருக்கு.. 6 வருட சரிவு.. வாவ்..!!

கூமாபட்டி என்ற சிறிய கிராமம் தற்போது தமிழ்நாடு முழுவதும், ஏன் இந்தியா முழுவதும் வைரலாகியுள்ளது. கூமாபட்டி குறித்து பெரியவர்கள் முதல் சிறியவர்கள் வரையில் பேசி சிலித்துப்போன நிலையில், அனைத்து தரப்பு மக்களையும் நேரடியாக பாதிக்கும் ரீடைல் பணவீக்கம் குறித்து மத்திய அரசு இன்று மாலை தெரிவித்துள்ளது, பல கவனிக்க மறந்துள்ளனர்.

இந்தியாவில் அனைத்து தரப்பு மக்களையும் பாதிக்கும் ஒரு முக்கியமான விஷயம் பணவீக்கம், பணக்காரராக இருந்தாலும் சரி, ஏழையாக இருந்தாலும் சரி பணவீக்கத்தின் பாதிப்பு அனைவருக்கும் கட்டாயம் இருக்கும். இப்படிபட்ட பணவீக்கம் 6 வருட சரிவை எட்டியுள்ளது என்றால் சாதாரண விஷயமா..?

மத்திய அரசு இன்று வெளியிட்டுள்ள சில்லறை பணவீக்கம் (retail inflation) தரவுகளில் ஜூன் மாதத்தின் CPI விகிதம் ஆறு ஆண்டுகளில் குறைந்த அளவான 2.10% ஆக பதிவாகியுள்ளது என தெரிவித்துள்ளது. ஜூன் மாதம் பணவீக்கம் குறைய முக்கியமான காரணம் உணவு விலைவாசி குறைந்தது தான்.

நுகர்வோர் விலை குறியீட்டில் (CPI) உணவு பணவீக்கம் மட்டும் சுமார் 50 சதவீத பங்கை வகிக்கும் வேளையில் மே மாதத்தில் உணவு பணவீக்கம் 0.99% இருந்து ஜூன் மாதத்தில் -1.06% ஆக குறைந்துள்ளது. இந்தியாவில் காய்கறிகள், கடல் உணவு, பருப்பு வகைகள், சர்க்கரை, பால் மற்றும் மசாலாப் பொருட்களின் விலைகள் குறைந்ததால் உணவு பணவீக்கம் குறைந்துள்ளது.

ஜனவரி 2019-இல் பதிவான குறைவான அளவுக்கு பின்பு தற்போது குறைவான உணவு பணவீக்கம் அளவு பதிவாகியுள்ளது. மேலும் இந்திய கிராமப்புறங்களில் உணவு பணவீக்கம் -0.92% ஆகவும், நகர்புறங்களில் -1.22% ஆகவும் உள்ளது. உணவு பணவீக்கம் குறைந்தது சாமானிய மக்களுக்கு பெரும் நிவாரணமாக உள்ளது.

மேலும், எரிபொருள் மற்றும் மின்சார பணவீக்கம் மே மாதத்தில் 2.84% இருந்து ஜூன் மாதத்தில் 2.55% ஆக குறைந்து, இது பொருளாதாரத்தில் நிலையான பாதையை காட்டுகிறது.

நாட்டின் ரீடைல் பணவீக்கம் ஐந்தாவது மாதமாக தொடர்ந்து இந்திய ரிசர்வ் வங்கியின் (RBI)இலக்கான 4%க்கும் கீழேயும், எட்டாவது தொடர் மாதமாக 6% என்ற உயர்மட்ட வரம்புக்கும் கீழேயும் இருந்து சாதனை படைத்துள்ளது.