சீனியர் சிட்டிசன்களுக்கு அடித்தது ஜாக்பாட்.. எஃப்டி மீதான வட்டியை உயர்த்திய இண்டஸ்இண்ட் வங்கி..!

நாட்டின் முன்னணி தனியார் துறை வங்கிகளில் ஒன்றான இண்டஸ் இண்ட் வங்கி, ரூ. 3 கோடிக்கும் குறைவான மதிப்புள்ள நிரந்தர வைப்புத்தொகைக்கான வட்டி விகிதத்தை உயர்த்தி அறிவித்துள்ளது. அதிகரிக்கப்பட்ட வட்டி விகிதங்கள் செப்டம்பர் 07, 2024 முதல் நடைமுறைக்கு வந்துள்ளதாக வங்கி தெரிவித்துள்ளது. தற்போது, ​​வங்கி 7 நாட்கள் முதல் 10 ஆண்டுகள் வரையிலான டெபாசிட்களுக்கு 3.5 சதவீதம் முதல் 7.99 சதவீதம் வரை வட்டி விகிதத்தை வழங்குகிறது. அதபோல், மூத்த குடிமக்களுக்கு வங்கி 4.00 சதவீதம் முதல் 8.49 சதவீதம் வரை வட்டியை வழங்குகிறது. ஒரு வருடம் 4 மாதங்கள் முதல் ஒரு வருடம் 6 மாதங்கள் வரையிலான நிலையான வைப்புத் தொகையில் பொது வாடிக்கையாளர்களுக்கு 7.99 சதவீத வட்டி விகிதத்தையும் மூத்த குடிமக்களுக்கு 8.49 சதவீத வட்டி விகிதத்தையும் வங்கி வழங்குகிறது. வழக்கமான வாடிக்கையாளர்களை விட மூத்த குடிமக்களுக்கு வங்கி 50 அடிப்படை புள்ளிகள் அதிக வட்டி விகிதத்தை வழங்குகிறது.

ஃபிக்ஸட் டெபாசிட்டுகளுக்கு இண்டஸ்இண்ட் வங்கி வழங்கும் வட்டி விகிதங்களைப் பொருத்தவரையில்,வங்கி இப்போது 7 நாட்கள் முதல் 30 நாட்கள் வரையிலான நிலையான வைப்புகளுக்கு 3.50 சதவீத வட்டி விகிதத்தை வழங்குகிறது. அதேபோல், 31 நாட்கள் முதல் 45 நாட்கள் வரையிலான நிலையான வைப்புகளுக்கு 3.75 சதவீத வட்டி விகிதத்தை வழங்குகிறது.

மேலும், வங்கி இப்போது 46 நாட்கள் முதல் 120 நாட்கள் வரையிலான நிலையான வைப்புகளுக்கு 4.75 சதவீத வட்டி விகிதத்தை வழங்குகிறது. அடுத்து 121 நாட்கள் முதல் 180 நாட்கள் வரையிலான நிலையான வைப்புகளுக்கு 5 சதவீத வட்டி விகிதத்தை வழங்குகிறது. அத்துடன் 181 நாட்கள் முதல் 210 நாட்கள் வரையிலான நிலையான வைப்புகளுக்கு 5.85 சதவீத வட்டி விகிதத்தை வழங்குகிறது. மேலும், 211 நாட்கள் முதல் 269 நாட்கள் வரையிலான நிலையான வைப்புகளுக்கு 6.10 சதவீத வட்டி விகிதத்தை வழங்குகிறது.

270 நாட்கள் முதல் 354 நாட்கள் வரையிலான நிலையான வைப்புகளுக்கு 6.35 சதவீத வட்டி விகிதத்தையும், 355 நாட்கள் முதல் 364 நாட்கள் வரையிலான நிலையான வைப்புகளுக்கு 6.50 சதவீத வட்டி விகிதத்தை வழங்குகிறது.

வங்கி இப்போது 1 வருடம் முதல் 1 வருடம் 4 மாதங்கள் வரையிலான நிலையான வைப்புகளுக்கு 7.75 சதவீத வட்டி விகிதத்தையும், 1 வருடம் 4 மாதங்கள் முதல் 1 வருடம் 6 மாதங்கள் வரையிலான நிரந்தர வைப்புகளுக்கு 7.99 சதவீத வட்டி விகிதத்தை வழங்குகிறது. 1 வருடம் 6 மாதங்கள் முதல் 2 ஆண்டுகள் வரையிலான நிரந்தர வைப்புகளுக்கு 7.75 சதவீத வட்டி விகிதத்தை வழங்குகிறது. 2 ஆண்டுகள் முதல் 61 மாதங்கள் வரையிலான நிரந்தர வைப்புத்தொகைகளுக்கு 7.25 சதவீத வட்டி விகிதத்தை வழங்குகிறது. அதேபோல், 61 மாதங்கள் மற்றும் அதற்குப் பிறகு நிலையான வைப்புகளுக்கு 7 சதவீத வட்டி விகிதத்தை வழங்குகிறது.

இறுதியாக, வங்கி தனது 5 வருட காலவரையறையுடன் கூடிய வரி சேமிப்பு நிலையான வைப்புகளுக்கு பொது வாடிக்கையாளர்களுக்கு 7.25 சதவீத வட்டி விகிதத்தையும் மூத்த குடிமக்களுக்கு 7.75 சதவீத வட்டி விகிதத்தையும் வழங்குகிறது.